Ég heiti Steinunn Arnþrúður Björnsdóttir. Það var lengi vel varðveitt leyndarmál og flestir vina minna þekktu mig aðeins undir gælunafni mínu sem er Adda Steina. Ég nota lengri útgáfuna öðru hvoru, til dæmis á banka-uppáskriftir en svara yfirleitt bara styttri versjóninni.
Ég er guðfræðingur og starfa á Biskupsstofu sem verkefnastjóri samkirkju- og upplýsingamála. Ég hef einnig starfað sem blaðamaður og fréttamaður og á sviði almannatengsla.
Öðru hvoru hef ég búið eða dvalið langdvölum utan landssteinanna, meðal annars í Ungverjalandi, Belgíu, Kazakstan og Malasíu.
Þegar kemur að áhugasviði er mér fátt mannlegt óviðkomandi, nema kannski íþróttafréttir. Þær finnst mér leiðinlegar.
Ég hef mikinn áhuga á málefnum sem tengjast trú og trúarlífi. Fólk og fréttir er alltaf áhugavert og börn og barnauppeldi er málefni sem er mér hugleikið.
Mér leiðist hins vegar dónaskapur og þurrka út öll ummæli sem ég tel fara yfir mörk kurteisinnar.