fara í valmynd

Noregur? 31. október 2008

Fært af arikuld undir Alþjóðamál, Efnahagur, Stjórnmál, Umræðan. 3 ummæli

Við sonur minn, (11 ára) horfðum saman á fréttirnar áðan í sjónvarpinu. Þar koma fram að búið væri að fresta öllum stórframkvæmdum á norðausturlandi, álveri á Bakka, borunum í Þingeyjarsýslu, frestun á Vaðlaheiðargöngum, efnahagsmálin, osvfr. Þá sagði drengurinn: “pabbi, 5 klukkutímar til að pakka niður, svo flytjum við til Noregs, við getum farið með Norrænu.” Svo mörg voru þau orð. Ekki svo fjarlægur möguleiki er það?

Nýtt Ísland

Fært af arikuld undir Stjórnmál, Umræðan. rita ummæli

Jæja, gert er gert og við getum ekkert gert til að breyta fortíðinni. Hér er allt í klessu í okkar stórkostlega landi, landi sem við erum svo stolt af og elskum. Á afar stuttum tíma hrapaði landið frá því að vera eitt af stöndugustu löndum veraldar í að vera eitt af þeim verst stöddu efnahagslega. Ég ætla ekki að ræða það núna af hverju né benda á sökudólga. Ég ætla aðeins að leggja til að nú þurfum við að horfa fram á við og gera upp við okkur hvers konar þjóðfélag við viljum. Fortíðin verður gerð upp, á því er engin vafi. Úr því við munum verða vitni að fæðingu nýs Íslands á komandi misserum og árum er ekki úr vegi að taka upp nýjan þjóðsöng. Lagið og texti fær mann til að tárast og fyllast stolti um leið. Fyllir mann löngun til að leggja allt í sölurnar fyrir land og þjóð. Jafnframt nístir það hjarta mitt að vita, finna og skilja að örfáir einstaklingar og afdankaðir spiltir stjórnmálaflokkar eyðilögðu land okkar, þjóð og orðspor og hnepptu okkur í fjötra, fjötra sem hefði mátt koma í veg fyrir en sökum græðgi og heimsku kusu þeir að gera það ekki. Hvað um það, hlustið á lagið og syngið með. Ég læt textann fylgja með sem og lagið sem ég fann á youtube.

http://www.youtube.com/watch?v=7181bP_fedg

Ísland er land þitt og ávallt þú geymir
Ísland í huga þér hvar sem þú ferð.
Ísland er landið sem ungan þig dreymir
Ísland í vonanna birtu þú sérð.
Ísland í sumarsins algræna skrúði,
Ísland með blikandi norðljósa traf.
Ísland sem feðranna afrekum hlúði,
Ísland er foldin sem lífið þér gaf
Íslensk er þjóðin sem arfinn þinn geymir,
íslensk er tunga þín skýr eins og gull.
Íslensk sú lind sem um æðar þér streymir.
Íslensk er vonin af bjartsýni full.
Íslensk er vornóttin albjört sem dagur,
íslenk er lundin með karlmennsku þor.
Íslensk er vísan, hinn íslenski bragur.
Íslensk er trúin á frelsisins vor.
Ísland er land þitt, því aldrei skal gleyma,
Íslandi helgar þú krafta og starf.
Íslenska þjóð þér er ætlað að geyma
íslenska tungu hinn dýrasta arf.
Ísland sé blessað um aldanna raðir,
íslenska moldin sem lífið þér gaf.
Ísland sé falið þér eilífi faðir,
Ísland sé frjálst meðan sól gyllir haf
PS. En mikið er pirrandi að vinna með texta í þessu bloggforriti. Nánast ómögulegt ef maður þarf að kópera og líma. Fer allt í steik!!!

Er ESB tabú? 30. október 2008

Fært af arikuld undir Alþjóðamál, Efnahagur, Stjórnmál, Umræðan. 5 ummæli

Einn af ráðherrum ríkisstjórnarinnar segir að þeir sem vilji ræða aðildarumsókn að ESB séu veruleikafirrtir. Ég vil fyrir alla muni ræða þessi mál. Er ég þá veruleikafirrtur? Dööööö……. það finnst mér ekki. Ef það er ekki tíminn til þess núna eftir katastroffu undangengina vikna, hvenær þá? Það er einmitt rétti tíminn til þess núna! Ef einhverjir eru veruleikafirrtir þá eru það…………… Við vitum fullvel hver afstaða hans flokks er í evrópumálum og þurfum þá ekkert með í þá umræðu. Við hin getum rætt þessi mál og undirbúið framtíðina. Við þurfum að sjá ljósið við endan á göngunum. Við þurfum að vita að eitthvað nýtt og betra taki við eftir þessa hörmungar tíma. Óbreytt sjórnarfar og óbreytt efnahagsstefna mun ekki skila okkur betri tímum með blóm í haga. Ef menn vilja ekki ræða framtíðina þegar slíkar katastroffur ríða yfir hvað er þá að? Hvað eru menn að forðast? Hafa menn ekki tíma? Er þá ekki í lagi að segja það þá bara hreint út í stað þess að kalla það veruleikafirringu? í lokin, hvað er eiginlega tabú við slíkar umræður og aðildarumsókn? Ég bara spyr. Góðar stundir.

Æðsti strumpur 29. október 2008

Fært af arikuld undir Efnahagur, Umræðan. 4 ummæli

Hannes Hólmsteinn Gissurarson æðsti strumpur frjálshyggjunnar, skrifar í Vísbendingu, (sem er e-ð tímarit um hagfræði held ég) eftirfarandi orð: Atburðarásin haustið 2008 leiddi hins vegar eitt í ljós: Með öllum sínum óköstum var íslensk króna fljótvirkasta og friðsamlegasta tækið til að laga hagkerfið að nýjum aðstæðum. Með gengisfalli krónunnar voru laun snarlækkuð án blóðsúthellinga. Almenningur fékk skýr skilaboð um það, að hann yrði að spara og beina kaupum sínum frekar að innlendri vöru en innfluttri. Þessi skilaboð hefðu ekki borist eins greiðlega um hagkerfið, hefðu Íslendingar notað evru í stað krónu

Sló mig svolítið orðalag hans þegar hann segir: laun lækkuð án blóðsúthellinga. Er hann hræddur? Um hvað, um byltingu? Svo þessi tónn: Almenningur fékk skýr skilaboð?  Hljómar eins og: Þetta var gott á ykkur, helvítin ykkar! Sparið og kaupið íslenskan mat flónin ykkar! Hann er líka ánægður með launalækkunina og væntanlega afleiðingar frjálshyggjunnar. Er ég einn um þessa upplifun á skrifun hans? Reyndar telur HHG að frjálshyggjan hafi ekki haft nógu frjálsar hendur og því fór sem fór. Jamm, góðar stundir

Ekki á minni vakt 28. október 2008

Fært af arikuld undir Alþjóðamál, Efnahagur, Stjórnmál, Umræðan. rita ummæli

Meginþema stjórnarflokkana þessi dægrin er: Ekki á minni vakt! Gengi krónunnar átti ekki að falla, ekki á minni vakt sagði forsætisráðherra. Botninum er náð var svo tilkynnt einu sinni í viku. Botninum er ekki enn náð, ekki á hans vakt. Erlendir hagfræðingar og fleiri vöruðu við falli bankana. Ekki á minni vakt sagði ríkisstjórnin. Sömu aðilar ásamt innlendum fræðimönnum og fleiri “sérvitringum” reyndu að gefa góð ráð. Ekki á minni vakt sagði ríkisstjórnin, enga breytingar á minni vakt. Þjóðin vill tala við ríkisstjórnina, ekki á minni vakt segir ríkisstjórnin. Þjóðin vill að við tölum við umheiminn og fáum að vera með. Ekki á minni vakt segir ríkisstjórnin. Þjóðin vill fá að vita hvað gerðist, af hverju og hverjir klúðruðu feitt? Ekki á minni vakt segir ríkisstjórnin, nei annars voru þetta ljótir menn í ljótum seðlabönkum í ljótum löndum sem gerðu ljótt við ísland.

Tilbrigði við þemað er. Nei, hann ekki ég, nei þeir ekki við. Bjöggarnir - Seðlabankinn. Seðlabankinn - Bjöggarnir. Svo er það: íslenska ríkisstjórnin - breska ríkisstjórnin. Breska ríkisstjórnin - íslenska ríkisstjórnin. Við borgum - nei við borgum ekki. Nei við borgum ekki - við borgum.

Icesave málið er að verða furðulegt. Ráðherrar ríkisstjórnarinnar eru missaga um þróun þess. Björgvin vildi borga, bréfið sem sent var í byrjun sept. tekur af öll tvímæli um það. Kannski gerði hann sér ekki grein fyrir umfangi reikningana. Maður skyldi samt ælta að maður í hans stöðu vissi um umfang reikningana. Svo ákveður ríkisstjórnin og seðlabankinn að erlendar skuldir bankana yrðu ekki greiddar þ.á.m. innistæður á icesave reikningum. Meira bullið. Maður getur eiginlega ekki annað er brosað orðið að þessu. Nú koma þeir fram í fjölmiðlum, útrásartröllin með sínar skýringar og kenna flestu öðru en sjálfum sér um hrunið. Kannski fórum við of geyst segir Hannes Smárason. Jú það er alheimskreppa í uppsiglingu og allt það, það vitum við. Það afsakar samt ekki þetta hrikalega kjaftshögg og þjóðargjaldþrot af þeirra völdum og gerðum og aðgerðaleysi ríkisstjórnarinnar.

Nú gengur forsætisráðherra með betlistaf um norðurlönd. Gangi þér vel Geir Hilmar. Þú ert ekki í öfundsverðu hlutverki. Kláraðu málið, þér er það skylt. Sýndu svo af þér visku og boðaðu til kosninga strax eftir jól og gefðu þjóð þinni tækifæri til að velja sér nýja forystu, hún á það skilið eftir þessar hrakfarir. Góðar stundir.

Mér að kenna? 27. október 2008

Fært af arikuld undir Efnahagur, Stjórnmál, Umræðan. rita ummæli

Menn leita ákaft þessa daganna að sökudólg, a.m.k. einhverjum sem hægt er að segja við: Þetta er þér að kenna. Menn kenna bönkunum um, stjórnmálamönnum, eftirlitsstofnunum, erlendum seðlabönkum jafnvel, ljótum köllum í útlöndum og síðast en ekki síst samfélaginu sem heild. Það síðast nefnda svíður mér sárast. Ég og mín fjölskylda ásamt öllum þeim sem ég þekki tilheyra þessu svokallaða samfélagi. Ég þekki persónulega engan sem tók þátt í þessari svokölluðu útrás sem er að setja landið á hausinn. Við erum sek um það eitt að hafa trúað og tekið mark á mönnum þegar þeir fullyrtu að allt væri í gúddí og ekkert að óttast. Við værum vitni að einstökum aðburði þar sem áður óþekkt dirfska, hugrekki, snilli, útsjónarsemi, þekking, orka og tilfinning fyrir tækifærum væri að lyfta íslensku samfélagi í nýjar hæðir og skapa því nýjan sess í alþjóðasamfélaginu. Við trúðum þessu enda kepptust stjórnmálamenn, útrásarmenn og síðast en ekki síst fjölmiðlar við að halda því að okkur. Engir nema heimskir útlendingar og örfáir öfundsjúkir íslenskir nördar leyfðu sér að efast opinberlega. Skildu ekki hinar sér íslensku aðstæður og hina sér íslensku kænsku sem sigra myndi heiminn.

Íslensk alþýða ræddi þessi mál stundum yfir kaffibolla í fermingarveislum sín á milli og velti því fyrir sér hvort sala á pappír milli eignarhaldsfélaga væri virkilega svona arðbær? Hvort ekki sé tími til komin að stofna eignarhaldsfélag og hætta þessu daglega brauðstriti úr því aðrir gátu það svo auðveldlega. Bankarnir héldu að okkur alls kyns lánum og við létum blekkjast, stjórnmálamenn sem við treystum sungu útrásarsöngin óaðfinnanlega og útrásartröllin unnu hvern sigurinn af öðrum. Fífl voru þeir kallaðir sem efuðust og ekki vildi alþýðan vera fífl. Sú er okkar eina sök. Þetta er því allt mér að kenna og ég óska eftir að vera dregin til ábyrgðar. Get ég verið áfram á íslandi og tekið þátt í uppbyggingu nýs íslands? Já það get ég. Get ég komið inn með fjármuni í samfélagið og lagt þá í púkkið? Að sjálfsögðu, ég á ekkert val enda er búið að binda meirihluta framtíðartekna minna til þess arna: hærri skattar, hærri vextir, meiri verðbólga, hærra vöruverð, gjaldeyrisskömmtun osvfr. Þar með er búið að frysta mínar tekjur til framtíðar og ég farinn að taka út mína refsingu. Það á bara eftir að rétta yfir mér fyrir landráð. Ætli ég verði ekki að verja mig sjálfur, hef ekki efni á lögfræðing lengur. Bömmer! Sjáumst í réttarsal. Góðar stundir.

Samviskan og ríkisstjórnin 25. október 2008

Fært af arikuld undir Alþjóðamál, Efnahagur, Stjórnmál, Umræðan. 1 ummæli fram að þessu

Það er ekki oft sem ég hef verið sammála ríkisstjórninni en er það núna. Engin lán vegna Icesave reikinga. Samviska manna lét loks til sín heyra greinilega. Meira að segja Pétur Blöndal einn harðasti frjálshyggjupostull landsins gat ekki hugsað sér að binda íslensku þjóðina í þrældóm vegna þessa. Skoraði prik hjá mér. Eina litla flís. Annars ætla ég að blogga lítið næstu daga, er að vinna talsvert þessa daganna, taka til heima, skila af mér íbúðinni sem ég var að flytja úr og reyna koma mér fyrir í þeirri nýju. Auk þess hef ég svo mikið að segja að ég kem mér varla að því og veit varla hvar á að byrja. Meira síðar. Góðar stundir.

Þingmenn og samviskan 23. október 2008

Fært af arikuld undir Stjórnmál, Umræðan. 2 ummæli

Bráðlega verður skrifað endanlega undir samkomulag við Breta varðandi “Icesave” reikningana ef að líkum lætur. Ef ég man rétt þá er búið að klára málið við Hollendinga, set þó fyrirvara um það. Hvað um það, málið er umdeilt, afar umdeilt. Verði skrfað undir fyrir hönd þjóðarinnar er þó eitt eftir og það er samþykki Alþingis. Sem betur fer getur ríkisstjórnin ekki skuldbundið þjóðina án þess að alþingi samþykki. Við höfum enn sem komið er stjórnarskrá sem virkar. Stjórnarskráin er afdráttarlaus:

40. gr. Engan skatt má á leggja né breyta né af taka nema með lögum. Ekki má heldur taka lán, er skuldbindi ríkið, né selja eða með öðru móti láta af hendi neina af fasteignum landsins né afnotarétt þeirra nema samkvæmt lagaheimild.

Samþykki ríkisstjórnin og skrifi undir samninga við Breta þarf hún klárlega að leggja málið fyrir þingið. Þá kemur til kasta þingmanna lofað hafa að: 

48. gr. Alþingismenn eru eingöngu bundnir við sannfæringu sína og eigi við neinar reglur frá kjósendum sínum. 

Hér er sannfæring lykilorð. Sannfæring kemur þá beint við samvisku þeirra. Munu þeir hafa samvisku til að skuldbinda núlifandi og ófæddar kynslóðir íslendinga í nokkra áratugi jafnvel? Fólkið sem kaus þá, fólkið sem borgar launin þeirra, fólkið sem byggði landið og fólkið sem greiðir eftirlaun þeirra. Leyfir samviska þeirra þeim að leggja þessar byrgðar á þjóðina burtséð frá flokkshagsmunum og slíku argaþrasi? Eða skiptir samviskan engu máli þegar kemur að flokki? Svokallaður flokksagi hefur ráðið samvisku þingmanna svo lengi sem ég man. Ætli það breytist nokkuð? Það verður í það minnsta æði forvitnilegt þegar öll þessi mál fara fyrir þingið. Góðar stundir.

Ehemm 22. október 2008

Fært af arikuld undir Alþjóðamál, Efnahagur, Stjórnmál, Umræðan. 5 ummæli

Margir spyrja þessa daganna hvað líður björgunaraðgerðum Íslenskra stjórnvalda og IMF. Hverju veldur þessi dráttur? Er það einfaldlega vinnan við það, skilyrðin sem sett verða, umfang eða eitthvað annað sem við vitum ekki? Er eitthvað huss huss í gangi? Eitthvað sem ekki eða engin þorir að segja frá? Rýnum aðeins í stöðuna.

Rætt er um að skellurinn sé um 12 föld landsframleiðsla þ.e. landsframleiðsla 12 ára. Landsframleiðsla árið 2007 var rétt ríflega 1.293 þúsund miljarðar. Skellurinn nemur því um 15.516 þúsund milljörðum, fimmtán þúsund fimmhundruð og sextán milljörðum isk. Ég er nánast ónæmur orðin fyrir slíkum upphæðum. Langstærstur hluti þessarar skuldar er tilkomin vegna bankana. IMF er skv. erlendum fjölmiðlum ásamt nokkrum öðrum þjóðum tilbúin til að lána tæplega 700 milljarða. Tæplega 700 milljarða í þetta svarthol. Eða sem svarar rétt rúmlega 4% upp í stóra skellinn. Hvernig eigum við að fara að því að greiða hin 94 prósentin? 700 hundruð milljarða lán er risalán og vaxtagreiðslur einar og sér hlaupa á milljörðum árlega. Mér skilst á fjölmiðlum að lán þetta ætti að liðka fyrir lánum annarsstaðar. Annarsstaðar? Hvar? Hver í veröldinni getur hugsað sér að lána einhverjum meira þegar viðkomandi skuldar 12 ára tekur fram í tíman? Ef svo ólíklega vildi til að við fengjum lán fyrir öllu þessu þá tæki það meira en 12 ár að greiða það niður, meira en 24 ár að greiða það niður. Lætur nærri að það tæki ekki minna en 48 ár að greiða það niður. Af hverju? Jú, með landsframleiðslu greiðum við fyrir:

Það sem eftir er fer til greiðslu skulda ef e-ð er eftir. Undanfarin ár höfum við verið svo lánsöm að við höfum getað greitt niður skuldir ríkisins hratt og ríkissjóður því nánast skuldlaus, en það hrekkur skammt þegar skellurinn er af þessari stærðargráðu. Hvað þýðir þetta allt saman? Jú, ef við verðum látin greiða fyrir brjálæðið þá er afar líklegt að:

Ef þetta er ekki þjóðargjaldþrot eða efnahagslegt hrun, tja hvað er það þá? Það þorir bara engin að segja okkur það. IMF telur það ekki hlutverk sitt að tilkynna okkur það, hafa eflaust sagt ríkisstjórninni það og hún hefur ekki kjarkinn til þess enn sem komið er. Er það skýringin á flótta ráðherra undan fjölmiðlum? Er það ekki skýringin á orðum Ingibjargar Sólrúnar þegar hún segir að staðan er mun alvarlegri en hún átti von á þegar hún kom frá New York? Geir segir að IMF bíði eftir þjóðhagsáætlun, er hægt að koma fram með slíkt plagg ef ástandið er jafnvont og það virðist vera? Yrði slík áætlun yfirhöfuð raunhæf í þessari stöðu? Hæpið og því má álykta sem svo að IMf bara bíði þar til ríkisstjórnin gefist upp og þá taki IMf og ESB yfir öll okkar mál og sjálfstæði okkar liðin tíð. Bölmóður, svartsýnisþrugl og vitleysa, já, sammála því en upplýsingaskortur, fát og vandræðagangur ríkisstjórnarinar gefur fullt tilefni til þess, nema ég sé að misskilja þetta herfilega, líkt og Georg Bjarnfreðason. Vonandi er ég að misskilja allt saman og þetta sé allt saman í gúddí. En svona í framhaldi, eigum við e-ð að ræða þetta með landráð???

Landráð? 20. október 2008

Fært af arikuld undir Alþjóðamál, Efnahagur, Stjórnmál, Umræðan. 3 ummæli

Rétt er að taka fram strax að eftirfarandi skrif eru eingöngu vangaveltur, pælingar og hugleiðingar, það er lögfræðinga að skera úr um hvort lög hafi verið brotin eður ei. Í þessum skrifum fellst engin ásökun á einn né neinn enda um grafalvarleg mál að ræða og ég þori varla að ræða þetta en samt. Allt frá því að bankarnir hrundu og þá sérstaklega þegar martröðin með “Icesave” reikninga Landsbankans sem og “Egde” reikninga KB-banka komu í ljós þá hef ég velt því fyrir mér hvort afleiðingar af stofnun þessara reikninga sé ekki í raun og veru landráð. Landráð af stórkostlegu gáleysi enda afleiðingarnar hrikalegar fyrir land og þjóð. Hér er ég eingöngu að ræða stofnun og rekstur þessara reikinga sem og bakábyrgðina sem stofnað var til. Auðvitað er alþjóðleg fjármálakreppa í gangi sem hafði margar ófyrirséðar afleiðingar þ.á.m. hrun þessara reikninga eða öllu heldur innistæðuleysi þeirra. Við getum ekki einvörðungu kennt kreppunni um afleiðingar þessara reikninga, hér þarf að skoða málið í aðeins víðara samhengi held ég.

Skoðum aðeins kafla X. Landráð í almennum hegningarlögum, 88. gr., 91. gr. og 100. gr. En þar segir: 88. gr. Hver, sem opinberlega í ræðu eða riti mælir með því eða stuðlar að því, að erlent ríki byrji á fjandsamlegum tiltækjum við íslenska ríkið eða hlutist til um málefni þess, svo og hver sá, er veldur hættu á slíkri íhlutun með móðgunum, líkamsárásum, eignaspjöllum og öðrum athöfnum, sem líklegar eru til að valda slíkri hættu, skal sæta …1) fangelsi allt að 6 árum. (gat því miður ekki feitletrað)

Hvað er verið að segja þarna? Jú, þarna er verið að segja að geri einhver eitthvað sem verður til þess að erlent ríki grípi til einhverra aðgerða eða ráðstafana sem skaða íslenska ríkið og eða hagsmuna þess hafi framið landráð. Bresk stjórnvöld gripu til hryðjuverkalaga gegn íslenskum hagsmunum vegna athafna íslenskra aðila á erlendri grund og ollu þar með eignaspjöllum og móðgunum gagnvart landi og þjóð og því að bretar fóru að hlutast til um málefni okkar. Ergó: þeir sem stóðu að stofnun þessara reikninga komu af stað atburðarás sem skaðaði íslenska hagsmuni í nútíð og framtíð.

91gr. almennra hegningarlaga hljóðar svo: 91. gr. Hver, sem kunngerir, skýrir frá eða lætur á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skal sæta fangelsi allt að 16 árum. (gat því miður ekki feitletrað)

Hér segir að láti menn uppi eða skýri frá samningum og slíku er ríkið komi beint að hafi framið landráð. Hverning kemur þetta heim og saman við stofnun þessara reikninga? Jú, þarna var framin gjörningur af íslenskum einkaaðilum sem skuldbatt íslenska ríkið og þegna þess til greiðslu á milljörðum króna, hundruðum milljarða ef ekki þúsundum milljarða. Íslenskir þegnar voru aldrei spurðir leyfis og engin í íslenski ríkisstjórn hefur getað svarað þeirri eðlilegu spurningu hvort ríkisstjórnin hafi heimilað þetta. Þess ber að geta í þessu samhengi að alþjóðlegar reglur kveða víst á um að yfirvöld ríkja séu ábyrg fyrir gjörningum af þessu tagi. Ég býst við að þeir sem sömdu þessar reglu hafi ekki haft ímyndunarafl til að sjá þessi ósköp fyrir. Heil þjóð bundin á skuldaklafa sökum gjörða þeirra á erlendri grund. Hagsmunir Íslands og þegna þess sem og orðspor varanlega skaðað. Er það ekki alvarlegur glæpur?

100. gr. almennra hegningarlaga hljóðar svo:”100. gr. a. Fyrir hryðjuverk skal refsa með allt að ævilöngu fangelsi hverjum sem í þeim tilgangi að valda almenningi verulegum ótta eða þvinga með ólögmætum hætti íslensk eða erlend stjórnvöld eða alþjóðastofnun til að gera eitthvað eða láta eitthvað ógert eða í því skyni að veikja eða skaða stjórnskipun eða stjórnmálalegar, efnahagslegar eða þjóðfélagslegar undirstöður ríkis eða alþjóðastofnunar fremur eitt eða fleiri af eftirtöldum brotum, þegar verknaðurinn í ljósi eðlis hans eða með hliðsjón af aðstæðum þegar og þar sem hann er framinn getur skaðað ríki eða alþjóðastofnun alvarlega:
1. manndráp skv. 211. gr.,
2. líkamsárás skv. 218. gr.,
3. frelsissviptingu skv. 226. gr.,
4. raskar umferðaröryggi skv. 1. mgr. 168. gr., truflar rekstur almennra samgöngutækja o.fl. skv. 1. mgr. 176. gr. eða veldur stórfelldum eignaspjöllum skv. 2. mgr. 257. gr. og þessi brot eru framin á þann hátt að mannslífum sé stefnt í hættu eða valdið miklu fjárhagslegu tjóni, (gat því miður ekki feitletrað)

Hér er talað um hryðjuverk. Stofnun þessara reikninga og afleiðingar þeirra eru ekkert annað en fjárhagslegt hryðjuverk skv. þessari grein. Þetta er líklega afdráttarlausasta greinin. Hér er notast við orðalag eins og: valda almenningi verulegum ótta, þvinga íslensk eða erlend stjórnvöld til að gera e-ð eða láta ógert, veikja eða skaða efnahaglegar og þjóðfélagslegar undirstöður ríkisins. 4. töluliður sömu greinar tekur m.a. til mikils fjárhagslegs tjón. Hvað hefur komið á daginn? Hér hefur ríkt almennur ótti við afleiðingar bankahrunsins, afleiðingar aðgerða manna í bankageiranum sem og aðgerðaleysi. Bresk stjórnvöld telja sig hafa verið þvinguð til að nota hryðjuverkalög til að tryggja hag bresks almennings og annara aðila þar í landi s.s. líknarfélaga, sveitarstjórna ofl. Íslensk stjórnvöld urðu að setja neyðarlög til að tryggja hag íslensks almennings í kjölfarið. Þjóðfélagslegar og efnahagslegar undirstöður íslenks þjóðfélags eru afar veikar í dag sökum aðgerða þessara manna sem og aðgerðaleysis þeirra. Þess ber að geta að svipaðir reikningar voru stofnaðir í Hollandi, Belgíu, Luxemborg, Noregi, Svíþjóð og Finnlandi. Þar erum við einnig í djúpum skít svo vægt sé til orða tekið.

Kannski er túlkun mín á þessum lagagreinum full frjálsleg og einkennist af fávísi og vanþekkingu að ég tali ekki um heimsku. Það er þá bara mitt mál og mitt að bæta úr fávísi og vanþekkingu. Get takmarkað gert til að draga úr heimskunni. Bið ég því um að mér verði sýnt umburðarlyndi, þolinmæði og kærleikur enda kannski vitlaus maður á vitlausum tíma og vitlausum stað.

Vísir Fréttir Lífið Íþróttir Viðskipti Vefmiðlar
Blogg.Vísir.is Innskráning Nýskráning