fara í valmynd

Doðin 28. janúar 2010

Fært af arikuld undir Óflokkað. 2 ummæli

Ég er að verða ónæmur og dofinn. Ónæmur og dofin fyrir spillingunni og vibbanum sem vellur frá forarpyttum helvítis á hverjum degi. Á nánast hverjum degi frá því að landið hrundi birtast fréttir um ný spillingarmál. Hvernig bankarnir voru mergsognir að innan. Hvernig vílað og dílað var með fyrirtæki landsmanna. Hvernig efnahagskerfið var skuldsett áratugi fram í tímann með markvissum blekkingum, lygum og svikum útrásardóna, stjórnmálamanna og bankamanna. Brotin blasa við og siðleysið algjört. Þingmenn og foringjar stjórnmálaflokks eru uppvísir af vafasömum fjármálagjörningum. Bera fyrir sig vanþekkingu. Afsakið en menn sem sýna af sér slíkt dómgreindarleysi eru ekki til þess hæfi að gegna trúnaðarstörfum fyrir þjóðina. Flóknara er það ekki.

Maður hristir bara hausinn. Getur ekkert gert annað en vonað að sérstakur saksóknari og hans lið færi okkur réttlæti. Reyndar berast þaðan góðar fréttir svo því sé haldið til haga.

Svo er það icesave. Þjóðaratkvæðagreiðsla framundan í því máli. Sýnir best hve fáránlegt það mál er. Heil þjóð er spurð að því hvort hún vilji samþykkja þennan klafann eða hinn! Taka á sig skuldir sem glæpamannabanki stofnaði til erlendis með vitund og  samþykki vanhæfra stjórnvalda! Hvað sem menn kunna að segja um skyldur þjóðarinnar þá var stofnun og rekstur icesave glæpsamlegt að teknu tilliti til getur og hæfni bankans til að standa við skyldur sínar sem banki. Íslensk stjórnvöld, bresk og hollensk ásamt esb sýndu af sér glæpsamlega vanhæfni og dómgreindarleysi með þvi að leyfa stofnun þessara reikninga. Ætlast svo til að íslenskur almenningur borgi svo brúsann að mestu leyti, 300 þúsund manns! Auðvitað eiga allir þessir aðilar að viðurkenna sameiginlega ábyrgð og deila þessu niður á sanngjanan hátt t.d. deila þessu niður á löndin skv. höfðatölu eða einhverju slíku.

Enn fær þjóðin að bíða eftir rannsóknarskýrslunni. Krassandi verður hún líklega ef marka má orð nefndarmanna sem oft hafa verið gráti nær að eigin sögn. Ég er reyndar komin á þá skoðun að þessir flokkar sem eru á þingi hafi enga getu til að takast á við afleiðingar þjóðargjaldþrotsins og eftirmála þess. Við þurfum byltingu, henda þessum handónýtu flokkum af þingi og fá utanþingsstjórn með aðkomu erlendra aðila sem hægt er að treysta. Ég treysti ekki íslenskum stjórnmálaflokkum og -mönnum. Ég ætla til dæmis ekki að kjósa í næstu sveitarstjórnakosningum fyrr en búið er að koma á persónukjöri. Sama gildir um næstu alþingiskosningar. Annars er ég blogglatur, er mest á fésbók að rífa kajft, þar er oft gaman.

Kveðja að norðan.

Bréf til þingmanna 2. desember 2009

Fært af arikuld undir Óflokkað. 5 ummæli

Eftirfarandi bréf sendi ég á alla starfandi þingmenn. Á so sem ekki von á neinu svari en maður veit aldrei? En hér kemur það:

Akureyri 2. des. 2009

Efni: Niðurstöður og gögn Rannsóknarnefndar um bankahrunið

Alþingismenn!

Nú liggur fyrir breytingafrumvarp á Alþingi. Frumvarpi þessu er ætlað að breyta lögum sem sett voru á síðasta ári um Rannsóknarnefnd sem rannsaka á aðdragenda hruns hins íslenska efnahagslýðveldis. Nefndinni var ætlað samkvæmt þessum lögum að birta niðurstöður sínar 1 nóvember 2009. Því var frestað til 1. febrúar 2010. Gott og vel. Stundum þarf meiri tíma en menn ætla sér í fyrstu.

En nú er réttlætiskennd minni nánast misþyrmt af tilgangi þessa breytingafrumvarps sem ætlað er að hjúpa þau gögn sem nefndin skoðar allt að 80 ára leynd. Auk þess á að skipa nefnd þingmanna sem á að fjalla um niðurstöður rannsóknarnefndarinnar og móta tillögur um viðbrögð við skýrslunni. Ljóst má vera að í þessum gögnum mun koma ýmislegt misjafnt fram: lögbrot, sviksemi, umboðssvik, fjárdráttur, mútur og margs kynns önnur spilling sem snertir fjármálafyrirtækin, einstaklinga og fyrirtæki þeim tengd, tengsl við stjórnmálaflokka, ráðherra, þingmenn, jafnvel ættingja og vini. Allt saman athafnir fyrirtækja og fólks sem olli því að ísland verður aldrei samt aftur og efnahagslegri velferð þjóðarinnar ógnað svo jaðri við landráð.

Í ljós alls sem á undan er gengið, fyrir og eftir hrun þá er Alþingi ekki treystandi fyrir jafnmikilvægu hlutverki og að vinna úr niðurstöðum og gögnum nefndarinnar sem auk þess á að halda leyndum fyrir þjóðinni. Verði þetta breytingafrumvarp að veruleika, óbreytt, er næsta víst að gjáin milli þings og þjóðar verði seint brúuð og geri ekki annað en stækka. Öll gögn sem rannsóknarnefndin skoðar í vinnu sinni á að opinbera. Öðruvísi mun Alþingi ekki endurvinna traust þjóðarinnar. Komi einhver núgildandi lög í veg fyrir slíkt þá á Alþingi einfaldlega að einhenda sér í breytingar á þeim lögum og sýna vilja í verki. Mál þetta er af þeirri stærðargráðu að þjóðin hefur aldrei upplifað annað eins og mun vonandi aldrei henda hana aftur.Málið varðar alla núlifandi íslendinga, börn þeirra, barnabörn og komandi kynslóðir. Gleymið því aldrei að þjóðin er aðili málsins og á rétt á öllum upplýsingum sem fram koma. Það er þjóðin sem borgar fyrir brjálæðið og sá sem borgar á rétt á öllum upplýsingum um “vöruna.” Gleymið því heldur aldrei hverjir kusu ykkur til starfa á hinu virðulega Alþingi, hverjir greiða ykkur laun með sköttum sínum, að þið eruð kosnir til að gæta hagsmuna almennings og einskis annars, að samviska og hjörtu ykkar á að slá með þjóðinni en ekki gegn. Gleymið því heldur aldrei að íslensk lög gilda fyrir ALLA íslendinga, ekki suma og einkum og sér í lagi almenning. Íslensk lög gilda einnig um útrásardólga, fjármálafyrirtæki, eignarhaldsfélög, einkahlutafélög, hlutafélög, lánastarfsemi, bankastarfsemi, verðbréfaviðskipti, stjórnmálamenn, stjórnmálaflokka, ráðherra og þingmenn.

Festið ykkur í minni og gleymið aldrei að án réttlætis verður hér aldrei nein uppbygging. Án réttlætis vinnið þið ekki hjarta almennings. Íslenska þjóðin er tilbúin til að leggja mikið á sig til að endurreisa landið, skapa frið og nýtt Ísland, land jöfnuðar, land samkenndar, land tækifæranna, land þar sem allir hafa jöfn tækifæri til menntunar, byggja upp og viðhalda frábærri heilbrigðisþjónustu, byggja upp framúrskarandi velferðaþjónustu og horfa stolt og brosandi framan í umheimin. Án réttlætis mun henni ekki verða þetta kleift.

Nú verðið þið Alþingismenn að leggja til hliðar alla flokkshagsmuni, sérhagsmunagæslu og sérgæsku. Minni ykkur á orð ykkar sjálfra í kosningabaráttunni í vor: “Allt upp á borðið.”

Sá tími er liðin þar sem þingmenn og ráðherrar fóru sínu fram hvað sem almannahag leið. Að gerast dómari í eigin sök, ef hún er til staðar, er ávísun á ….. ja, ég læt ykkur eftir að ráða í það.

Að lokum vil ég vara ykkur við því að beri ykkur ekki gæfa til að skipa óháða nefnd til að fara yfir gögnin, móta frekari tillögur um framhaldið og opinbera gögnin þá er veruleg hætta á annari búsáhaldabyltingu, slík er reiðin í íslenskum almenningi ef ykkur er hún ekki ljós nú þegar. Annað er móðgun við skynsemina og réttlætið. Sjálfur samfélagssáttmálin er við það að rofna. Trúið mér, ég tala við marga íslendinga á hverjum degi. Auk þess er ég sjálfur borin og barnfæddur íslendingur sem elskar land sitt og þjóð og er við það að missa trú mína og traust á fulltrúa þjóðarinnar.

Með vinsemd og virðingu

Arinbjörn Kúld

Kjarnagötu 16

600 Akureyri

MSc í stjórnun og stefnumótun. BSc í rekstarfræðum. Diploma í fiskeldi

Heimasími 431-4565 og GSM 864-7082

Úpps! 30. nóvember 2009

Fært af arikuld undir Óflokkað. 2 ummæli www.visir.is Efast um að Alþingi ráði við endurreisn efnahagslífsins

Um þessar “sumar ástæður” á að upplýsa almenning um. Nema hann verði kolvitlaus auðvitað sem er ástæðan fyrir leyndinni. Þessi frétt gefur ímyndunaraflinu lausan taumin. Verður landið hernumið ef ekki? Sett á hafnbann? Erlend viðskipti fryst? Viðskiptaþvinganir? Hver veit, en ljótt er það.

Djöfladansinn 25. nóvember 2009

Fært af arikuld undir Óflokkað. 3 ummæli

Þessi misserin er stigin hrikalegur djöfladans í íslensku samfélagi. Sá dans er stigin af miklum móð inní bönkunum, í stjórnmálum og viðskiptalífi. Í bönkunum víla menn og díla um fallin fyrirtæki og leifar þeirra. Hverjir fá og hverjir fá ekki en einkum og sér í lagi hverjir fá. Okkur má vera fullkomlega ljóst að til stendur að reisa hina föllnu dólga við og reyndar búið að afgreiða þá suma með því að leyfa þeim að skjóta undan þeim fyrirtækjum sem lífvænleg eru þ.e. þeir seldu sjálfum sér góðu bitana úr hinum föllnu eignarhaldsfélögum og fengu til þess lán úr gömlu bönkunum síðustu mánuðina fyrir hrun, kölluðu það hagræðingu og endurskipulagningu. Þessar vikurnar eru margir óðir yfir fyrirhugðuðum afskriftum á eitthvað fyrirbæri sem heitir 1998 ehf. sem á Haga, sem hefur um 60% markaðshlutdeild á smásölumarkaðinum. Þessar afskriftir eru, ef fréttir eru réttar, löngu afstaðnar. Það er, ef rétt er að hinn nýji Arion banki hafi metið það svo að Hagar gætu staðið undir 17 milljarða skuld við bankann. KB-banki heitin lánaði eigendum 1998 ehf. 30 milljarða ef ég man rétt um mitt ár 2008 til að kaupa Haga út úr Baugi heitnum. Þessir 30 milljarðar urðu svo 47 milljarðar við fall krónunnar. Arion banki tekur svo skuldina yfir af gamla bankanum og gefur fyrir hana 17 milljarða. Þar með er búið að afskrifa 30 milljarða þ.e. allt upphaflega lánið.  Einhverra hluta vegna virðast fréttir leka úr þessum Arion banka um þessar afskriftir en fátt fréttist af djöfladansinum úr hinum bönkunum. Hvernig skyldi standa á því? Hvar er allt gegnsæið sem lofað var? Í eðlilegu ástandi samfélags eiga stjórnmálamenn ekki að skipta sér af viðskiptalífinu en hér er ekkert eðlilegt ástand. Á tímum sem þessum eiga stjórnmálamenn að tryggja það að gagnsæi ríki við uppgjör og ákvörðun um framhaldslíf lífvænlegra fyrirtækja. Þeir eiga að tryggja það að eignarhald þeirra fari ekki til þeirra sem rændu landi innan frá þ.e. fyrrum eigenda bankana og leppa þeirra.

Niðurlæging íslenskra stjórnmálamanna er algjör. Forsætisráðherra er varla virtur viðlits af starfsbræðrum sínum erlendis. Þingmenn og ráðherrar stjórnarinnar ræða varla á þingi stærsta mál íslandssögunnar, icesave, þó það sé til umræðu eftir að ríkisstjórnin var neydd til að breyta þeim lögum sem alþingi setti um málið í sumar. Til upplýsinga þá voru það erlendar þjóðir sem neyddu hana til þess. Frjáls þjóð? Ekki það að stjórnarandstaðan yrði nokkuð betri. Til þess eru sjálfstæðisflokkurinn og framsókn of innvinkluð og innmúruð í hrunið að þeir flokkar geti leitt þjóðina á komandi árum.  Fyrrum þingmenn Borgarahreyfingarinnar létu verkin tala í sumar og drápu þá miklu von og traust sem um 14 þúsund kjósendur báru til þeirra.  Þeim er betur lagið að tvístra en sameina virðist vera.

Ég held að í raun og veru þá skiptir ekki máli hvort hér sé ríkisstjórn eða ekki. Formlega séð verður þó að vera einhver sem kvittar undir þær ákvarðanir sem AGS tekur fyrir okkur. Jæja, okei, Alþingi setur einhver lög og svona en þau skipta bara engu máli héðan af. Örlög okkar eru ráðin. Landið er gjaldþrota. Svokallaðir erlendir lánardrottnar tapa þúsundum milljarða á íslenskum bönkum, mun hærri tölu en menn gera sér grein fyrir í dag segir sjálfur fjármálaráðherrann. Líklega um 10-12 þúsund milljörðum gæti ég trúað. Er nema von að trúverðugleiki landsins sé lítill sem engin.  Hvort sem okkur líkar betur eða verr þá munum við ganga í ESB. Öðruvísi mun landið seint og illa ná sér efnahagslega eða standa á eigin fótum líkt og við höfum þekkt. Í það minnsta verður Ísland aldrei samt aftur. Væntanleg þjóðaratkvæðagreiðsla um aðild er og verður kölluð ráðgefandi. Eins og við vitum þá hlusta íslenskir stjórnmálamenn ekki á nein ráð og því verður sú atkvæðagreiðsla tilgangslaus.

Þetta verður samt ekki átakalaus innganga, langt í frá. Það eru öfl í samfélaginu sem munu stíga trylltan djöfladans í aðdraganda þessara tilgangslausu kosninga í þeirri von að þjóðin dansi með og hafni aðild. Ég óttast þau átök, jafnvel að eitthvað verulega slæmt muni gerast áður en til kosninga komi.

Okkur er hollt að velta aðeins fyrir okkur stöðu okkar í umheiminum. Við búum á eyju langt norður í ballarhafi, langt frá næsta byggða bóli, á mörkum hins byggilega heims. Við erum verulega háð innflutningi aðfanga og matvæla og útflutningi á fiski, áli og ýmsum öðrum vörum og þjónustu. Ferðaþjónusta gefur af sér stóran hluta gjaldeyristekna okkar. Það er nánast sama hvert maður lítur í kring um sig, alls staðar sér maður innflutta hluti. Bifreiðin er innflutt, olía og bensín, varahlutir, húsgögnin, raftækin, fötin að megninu til, stór hluti matvæla og húsin okkar eru að stórum hluta til innfluttir hlutir, raflagnir, klæðningar, stoðir, þök, gler og fl. Við ættum því að temja okkur örlitla auðmýkt í samskiptum við erlendar þjóðir þrátt fyrir lélega framkomu erlendra stjórnmálamanna í okkar garð og þá einkum og sér í lagi Geira Brúna og Alla elsku. Ég á reyndar erfitt með að trúa öðru en að framkoma erlendra stjórnmálamanna eigi sér skýringu, ég hef bara ekki verið upplýstur um ástæðuna ennþá. Ég held að þegar við heyrum þá skýringu þá munum við fyrirgefa þeim. Ég hef það nefnilega á tilfinningunni að stjórnmálamenn okkar og útrásardólgar hafi í sameiningu kallað á þessa framkomu með framferði sínu á erlendri grundu misserin fyrir hrun.

Annars er ég bara hress og kátur, bara að velta þessu fyrir mér. :-)

Borgarahreyfingin og framtíðin 2. september 2009

Fært af arikuld undir Óflokkað. 3 ummæli

Það er eins og að bera í bakkafullan lækinn eða reyna selja sand í Sahara að tjá sig um þær deilur og ágreining sem vaðið hefur uppi í Borgarahreyfingunni að undanförnu. Læt ég það því vera en vil segja að mér hefur fundist þessar deilur sárari en tárum taki og er afar óánægður með þróun mála þar á bæ undanfarið. Samt er of snemmt og ekki tímabært að segja sig úr hreyfingunni og vil ég halda lífi í henni eins lengi og mögulegt er og helst til langs tíma og vil veg hennar sem mestan. Ég hef því ákveðið að styða nýtt framboð til stjórnar sem býður sig fram á næsta landsfundi sem haldin verður þann 12 september næstkomandi. Til að sýna stuðning minn í verki þá ætla ég að birta eftirfarandi tilkynningu:

Þjóðin á þing

Borgarahreyfingin var stofnuð af fólki með hugsjónir og væntingar um að koma á lýðræðislegum umbótum, réttlátara samfélagi með gagnsæjum vinnubrögðum og umfram allt, heiðarleika að leiðarljósi

Slagorðið “þjóðin á þing” er engin tilviljun. Það var valið vegna þess að vildum að þjóðin fengi rödd inni á Alþingi Íslendinga. Þinghópur hreyfingarinnar var hugsaður sem brú frá grasrótinni þangað inn.

Að okkar mati hefur það mistekist.
Þess í stað hafa hugsjónir, stefna og kraftur hreyfingarinnar týnst í deilum og óánægju á alla kanta.

Við sem undir þetta ritum erum stolt af Borgarahreyfingunni eins og hún var hugsuð. Í stað þess að gefast upp fyrir þeim mistökum sem gerð hafa verið langar okkur að leggja okkar að mörkum til að hreyfingin finni uppruna sinn á ný og að vegur hennar verði sem mestur.

Þess vegna ætlum við að bjóða fram krafta okkar til stjórnar Borgarahreyfingarinnar.

Við komum fram sem hópur og gerum okkur vonir um að fá stuðning sem slíkur.
Engu að síður bjóðum við okkur hvert og eitt fram til starfsins sem einstaklingar.

Sem hópur höfum við sett saman grunn að stefnu þeirri sem við munum fylgja í störfum okkar og hana má skoða í tengdri skrá. (http://gandri.wordpress.com/files/2009/09/skipulagframtidarsyn.ppt )

Við munum kynna stefnuna nánar á næstu dögum og á landsfundi hreyfingarinnar.

Ásthildur Jónsdóttir, Bjarki Hilmarsson, Björg Sigurðardóttir, Guðmundur Andri Skúlason, Gunnar Gunnarsson, Gunnar Sigurðsson, Heiða B. Heiðarsdóttir, Ingifríður Ragna Skúladóttir, Jón Kr. Arnarson, Lilja Skaftadóttir Sigurður Hr. Sigurðsson og Valgeir Skagfjörð

Svo mun ég reyna vera duglegri að blogga á næstunni en bloggið hefur verið í eins konar sumarfríi - munaður sem ekki er víst að fólk hafi efni á á næstu árum.

Efnahagslegir flóttamenn. 5. ágúst 2009

Fært af arikuld undir Óflokkað. 4 ummæli

Þessa bloggfærslu setti ég á vísisbloggið mitt þann 24 nóvember 2008. Enhverra hluta vegna finnst mér hún eiga betur við í dag í ljósi þessarar fréttar:

“Allir eða a.m.k. flestir kannast við hugtakið “pólítískir flóttamenn,” hugtak sem notað er yfir fólk sem flýr sitt heimaland vegna þess að það telur sig og sína ekki örugga í heimalandi sínu. Hefur sætt ofsóknum af ýmsu tagi vegna stjórnmálaþátttöku sinnar eða fyrir það eitt að hafa aðrar skoðanir en valdhafar. Nú fer líklega að fæðast nýr hópur flóttamanna en af öðrum ástæðum en pólítískum. Sá hópur fólks hefur það eitt til saka unnið að vera fætt á íslandi, alist þar upp, hlotið menntun sína, lifað og starfað og helgað landinu krafta sína.

Sú risavaxna kjaraskerðing sem framundan er, verði ekkert róttækt að gert, mun að líkindum búa til stóran hóp íslendinga sem sjá ekkert annað í stöðunni en kjósa með fótunum þ.e. flýja land. Þennan hóp má þá skilgreina sem “efnahagslega flóttamenn.” Þessi hópur mun verða sá hópur íslendinga sem missir allt sitt í þeirri kreppu sem framndan er þ.e. missir vinnu, húsnæði og verður gjaldþrota í kjölfarið. Kreppan er víst bara rétt að byrja. Hversu stór þessi hópur mun verða er ómögulegt að spá um. En stór verður hann. Þær minningar sem þessi hópur tekur með sér héðan verða nöturlegar, gjaldþrota land, gjörspillt stjórnkerfi, spilltir stjórnmálaflokkar, vanhæfar ríkisstofnanir eins og seðlabankinn og fjármálaeftirlitið, ömurlegt og vanhæft bankakerfi, lamað þing og þingmenn osvfr. Hugsanlega verður það þannig hjá mörgum að þeir komist hreinlega ekki, hafi einfaldlega ekki efni á því. Þar með sjáum við hið gamla vistarband birtast okkur aftur en í örlítið breyttri mynd.

En það er ljós í myrkrinu, hreyfing er að myndast meðal fólksins. Fólk er farið að mótmæla ofríki, vanmætti, spillingu, þögn og aðgerðaleysi stjórnvalda af meiri krafti með viku hverri. Alls kyns hreyfingar og hópar fólks eru að myndast um hin ýmsu málefni hvort sem þau lúta að stjórnmálum, atvinnumálum, menningu, fræðslu um efnahagsmál því eðlilega vill fólk reyna skilja því fór sem fór. Það skyldi þó aldrei fara svo að fólkið reynist ríkisstjórninni snjallara og taki til sinna eigin ráða og hagi sínum málum eftir sínu höfði en ekki ríkisstjórnarinnar?”

Kveðja að norðan.

Hver á Ísland? 21. júlí 2009

Fært af arikuld undir Óflokkað. 3 ummæli

Spurði einn umdeildur stjórnmálamaður einu sinni. Ég er búinn að vera afar hugsi síðustu vikur og einkum og sér í lagi í dag eftir að fréttir bárust af því að náðst hefði samkomulag við lánardrottna gömlu bankana þ.e. Glitnis og KB-banka um eignarhlut þeirra í þeim nýju sem reistir voru upp úr rústum þeirra gömlu. Landsbankin skilin eftir enda baneitraður í bak og fyrir.  Fyrst í stað fagnaði ég eignaraðild erlendu aðilana en svo fóru að renna á mig tvær grímur ef ekki fleiri. Með þessari eignaraðild þá eignast þessir erlendu aðilar ísland meira og minna. Þeir fá bankana, fá fyrirtækin sem tekin hafa verið yfir og vald guðs yfir þeim sem eru í gjörgæslu bankana og munu lenda. Þeir fá vald yfir okkur, þessum venjulega íslending sem skuldar húsnæðislánin sín, bílalán og önnur lán sem hinn venjulegi maður og kona hafa tekið. Þeir fá vald yfir bóndanum sem veðsett hefur jörð sína, framleiðslu og búfénað. Þeir fá vald yfir útgerðinni, fiskvinnslunni og kvótanum.

Í raun held ég að þetta hafi verið löngu ákveðið eða strax á fyrstu vikum kreppunnar þegar ljóst var að erlendir kröfuhafar bankana væru að tapa þúsundum milljarða eða um 13.500 milljörðum á hruni bankana. Icesave, ESB og svo þessi “einkavæðing” bankana eru nátengd.

Í fyrsta lagi þá hafa erlendir kröfuhafar sett mikin þrýsting á yfirvöld í bretlandi, hollandi og öðrum ríkjum ESB auk ESB sjálfs til að endurheimta þá fjármuni sem íslensku bankarnir “stálu” frá þeim auk icesave reikningum almennings, líknarfélaga og opinberum aðilum í þessum löndum.

Í öðru lagi eru þessi lönd ásamt ESB svo sannfærð um rétt sinn og málstað að þau settu íslandi einhverja afar kosti sem íslensk stjórnvöld telja svo ægilega að þau geti ekki skýrt frá þeim opinberlega eins og berlega hefur komið í ljós. Þeir fáu sem fengið hafa að sjá þessa kosti verða skelfingu lostnir og snýst hugur um leið og hvetja til þess að við tökum á okkur ógnarskuldbindingar icesave samkomulagsins og bæta þannig icesavereikninghöfum tjón sitt.

Í þriðja lagi er verið að bæta þessum erlendu kröfuhöfum tjón það sem gömlu bankarnir ollu þeim með því að færa þeim innlendar eignir á formi skulda almennings og fyrirtækja í þeirri von að skaði þeirra verði bættur að fullu í fyllingu tímans.

Í fjórða lagi hefur stjórnvöldum verið gerð grein fyrir því að ísland fengi aldrei inngöngu í ESB með þessi mál óuppgerð og skaðin bættur að mestu eða öllu leiti. Jafnfram hefur stjórnvöldum verið gerð grein fyirr því að ísland gæti aldrei unnið sig út úr vandanum nema ganga í ESB sem verður þá væntanlega á ljóshraða svo við getum tekið upp evru sem fyrst. Upptaka evru verður svo tilkynnt innan nokkura missera því erlendir kröfuhafar vilja ekki eiga allar þessar eignir og alla þessa rentu af þeim í ónýtri mynt.

En hverjir gætu þessir afarkostir verið fyrir utan það að einangra landið á öllum sviðum og svelta það til hlýðni. Eins og það sé ekki nægilega slæmt þá gæti ég sem best trúað því að þessir hryllilegu afar kostir væru einfaldlega þeir að íslenskum stjórnvöldum hafi verið hótað málssókn sem ísland gæti ekki annað en tapað og yrði dæmt til til greiðslu allra skulda bankakerfisins eða um 13.500 milljarðar auk algerrar einangrunar á öllum sviðum. Gelymum því ekki að stjórnvöld hafa aldrei gefið annað í skyn en að íslensku bankarnir væru með ríkisábyrgð og jafnvel lýst því yfir opinberlega sbr viðtal við DO á sínum tíma við einhverja erlenda sjónvarpsstöð í fyrravetur. Málssókn sem ísland myndi tapa og alger einangrun eru kostir sem ég held að engin stjórnmálamaður vildi takast á við og hvað þá sannfæra þjóð sína um að það væri besta leiðin út úr kreppunni. En eins og sagt er þá setur sá sem á gullið reglurnar og við erum sem sagt að komast alfarið í eigu erlendra aðila hvort sem okkur líkar betur eða verr. Mig skortir einfaldlega ímyndunarafl til að ímynda mér aðra afar kosti eða eitthvað annað sem fær hárin til að rísa á þeim sem séð hafa afarkostina.

 

Spurningu Jóns Baldvins Hannibalssonar hefur því verið svarað. Landið er í eigu erlendra fjármálastofnana, bankar eða vogunarsjóðir? Dulítið slæmt að vita ekki hver á mann. Vantar andlit á viðkomandi.  HFF!

Göldrótt ríkisstjórn 30. maí 2009

Fært af arikuld undir Óflokkað. 4 ummæli

Ríkisstjórnin stendur sig vel. Hún stendur sig afskaplega vel í varðstöðu sinni fyrir fjármálakerfið. Á örfáum klukkutímum jók hún eignir fjármálastofnana um 8 milljarða. Ríkisstjórnin er göldrótt. Skrítið hvernig hún getur galdrað fram pening sem er í raun ekki til. Það er engin verðmætasköpun þarna á bak við, heldur hagræði/fjármálagaldrar áranna 2001-2007 sem kom okkur til andskotans og ömmu hans.

Ég hef oft sagt það áður að óvenjulegir tímar kalli á óvenjuleg ráð. Hví er þá ekki hægt að aftengja tímabundið þessa þætti sem hækka lánin og auka verðbólguna meðan þessi óáran gengur yfiir? Líklega vegna þess að AGS vill það ekki. AGS veit sem er að aðgerðir sem þessar auka eignir fjármálastofnana og það lítur þá betur út  í þeirra áætlunum og þessari svokölluðu endurreisn þeirra. En eitthvað verður ríkisstjórnin að gera, engin vafi á því en þá er lámark að hún taki tillit til almennings og fyrirtækja í landinu og geri raðstafanir til að lán þeirra hækki ekki meira en orðið er, nóg er samt. Það er ekki laust við að löngun bæri á sér til að taka fram makindos dósina og sleifina.

Icesave og landráðin 12. maí 2009

Fært af arikuld undir Óflokkað. 6 ummæli

Ég hef áður skrifað um landráð útrásartröllana tengt icesave og fleiri málum, bæði á þessu bloggi og fengið það birt á smugunni, sjá hér. Um talsverðan tíma hef ég haft af því áhyggjur að ríkisstjórnin nýja myndi ganga til svokallaðra samninga við breta um ábyrgð þjóðarinna á þessum ránreikningum landsbankans í bretlandi. Í nýjum stjórnarsáttmála er skýrt kveðið á um að gengið verði til samninga við breta um fullnaðargreiðslu íslensku þjóðarinnar á innistæðum þessarar reikninga. Margir og þar á meðal ég eru á þeirri skoðun að okkur komi þessir reikningar ekki við, landsbankinn var einkafyrirtæki og var ekki með neina ríkisábyrgð. Tryggingakerfi það sem dekka átti innistæður þessara reikninga var hannað til að grípa inní ef einn banki lenti í vandræðum - ekki að heilt bankakerfi heillrar þjóðar hryndi til grunna þannig að ekkert stæði eftir. Á þessu er mikil munur. Íslenska þjóðin telur aðeins um 300-320 þúsund einstaklinga, fjöldi þeirra bresku einstaklinga sem átti innistæður í þessum reikningum í bretlandi er um 300 þúsund fyrir utan alla þá aðra aðila sem áttu fé á þessum reikningum.

Heildarinnistæður á þessum reikningum námu við hrunið um 600-700 milljörðum. Sitt sýnist hverjum um heimtur á þessum reikningum þ.e. hve mikið innheimtist og á hve löngum tíma. Bjartsýnisspá formanns skilanefndar landsbankans segir að um 70 milljarðar falli á íslensku þjóðina, það er 70 milljörðum of mikið. Íslenska þjóðin getur ekki greitt þetta og á ekki að reyna það.Við eigum ekki að velta þessum vanda og stuld útrásartröllana yfir á okkur sjálf og börn okkar.

Mér er spurn hvort nýkjörin ríkisstjórn ætli að fremja síðbúin “landráð” með því að leggja þessar byrgðar á þjóðina ofan á allt annað. Í lögum um landráð segir að:

100. gr. almennra hegningarlaga hljóðar svo:”100. gr. a. Fyrir hryðjuverk skal refsa með allt að ævilöngu fangelsi hverjum sem í þeim tilgangi að valda almenningi verulegum ótta eða þvinga með ólögmætum hætti íslensk eða erlend stjórnvöld eða alþjóðastofnun til að gera eitthvað eða láta eitthvað ógert eða í því skyni að veikja eða skaða stjórnskipun eða stjórnmálalegar, efnahagslegar eða þjóðfélagslegar undirstöður ríkis eða alþjóðastofnunar fremur eitt eða fleiri af eftirtöldum brotum, þegar verknaðurinn í ljósi eðlis hans eða með hliðsjón af aðstæðum þegar og þar sem hann er framinn getur skaðað ríki eða alþjóðastofnun alvarlega:

1. manndráp skv. 211. gr.,

2. líkamsárás skv. 218. gr.,

3. frelsissviptingu skv. 226. gr.,

4. raskar umferðaröryggi skv. 1. mgr. 168. gr., truflar rekstur almennra samgöngutækja o.fl. skv. 1. mgr. 176. gr. eða veldur stórfelldum eignaspjöllum skv. 2. mgr. 257. gr. og þessi brot eru framin á þann hátt að mannslífum sé stefnt í hættu eða valdið miklu fjárhagslegu tjóni.
Hér er talað um hryðjuverk. Stofnun og rekstur þessara reikinga er ekkert annað en fjárhagslegt  hryðjuverk. Burtséð frá því og taki maður orðið hryðjuverk í burtu og horfir á hugsanlega samninga við breta og setur orðið samningur í staðin þá lítur þannig út að nýkjörin ríkisstjórn hafi í huga að fremja ómeðvitað, meðvitað eða af einskærum ótta við alþjóðasamfélagið landráð. Samningur af þessari stærðargráðu sem vegur alvarlega að undirstöðum samfélagsins, leggur velferða- og efnahagskerfið í rúst, skaðar stjórnskipulegar undirstöður og veldur uppnámi eða jafnvel uppreisn í samfélaginu kemst ansi nálægt því að vera tilræði við samfélagið.

Hvað er þá til ráða? Jú, við eigum að lýsa því yfir við alþjóðasamfélagið að við ætlum ekki að leggja þjóðfélagið í rúst með því að taka á okkur skuldir bankana. Við ætlum ekki að koma hér á viðvarandi fátækt og hneppa þjóðina í skuldafangelsi um ókomin ár. Við ætlum hins vegar að sjá til þess að þessir peningar verði sóttir hvar sem til þeirra næst í veröldinni og biðjum alþjóðasamfélagið um aðstoð til þess. Við ætlum einnig  að sækja útrásartröllin og leppa þeirra til saka fyrir landráð, fjársvik, umboðssvik, þjofnað, fjárdrátt, ólögmæta viðskiptahætti osvfr. Við ætlum einnig að bjóða bretum, hollendingum og öðrum þjóðum sem urðu fyrir barðinu á þessum glæpamönnum að sækja þá til saka fyrir þau lögbrot sem þeir kunna að hafa framið í þeim löndum. Á þennan hátt öðlumst við virðingu umheimsins aftur og eftir skamman tíma öðlumst við traust alþjóðasamfélagsins á ný ásamt því að taka rækilega til í okkar stjórnsýslukerfi.

Ísland og AGS 6. maí 2009

Fært af arikuld undir Óflokkað. rita ummæli

Jæja, hér hefur ekkert verið skrifað síðan um miðjan apríl. Stafar það einkum af tvennu: var erlendis í 2 vikur í afar slæmu netsambandi og svo tímaskorti eftir að ég kom heim. Reyndi þó að fylgjast með fréttum að heiman þegar ég var erlendis eins og kostur var. Svo þegar heim var komið þá tók við botnlaus vinna.

Ég hef verið að velta fyrir mér þeim aðgerðum sem ríkisstjórnin er að móta og hefur mótað fyrir almenning í landinu. Sitt sýnist hverjum en flestum finnst sem ekki sé nóg að gert og velt því fyrir sé af hverju ríkisstjórnin sé svo treg í taumi sem reyndin er. Jónas Kriistjánsson, fyrrum ritstjóri telur að nóg sé gert og ríkisstjórin geti ekki gert meira en fólk viti einfaldlega ekki af því eins og fram í fréttum í dag. Þá spyr maður sig: af hverju getur ríkisstjórin ekki gert meira fyrir fólkið í landinu? Af hverju vill og getur ríkisstjórnin ekki komið á réttlæti í lánamálum í landinu?

Eins og það horfir við mér þá er skýringin sú að ríkisstjórn íslands ræður engu í efnahagsmálum landsins og þá heldur ekki skuldastöðu almennings því hann á að borga sitt að fullu og vel það þrátt fyrir óeðlilega hækkun lána. Hér ræður ferðinni Alþjóðagjaldeyrissjóðurinn ferðinni. Meginmarkmið þessarar svokölluðu aðstoðar hans er að endurreisa traust á krónunni, endurreisa bankakerfið osvfr. Til að svo megi heppnast þarf að setja hér á gjaldeyrishöft eins og við öll þekkjum orðið, skera niður í samneyslunni og ríkissbúskapnum. Þess vegna kemur ekki til greina af hálfu AGS að leyfa nokkuð sem hugsanlega gæti haft í för með sér útgjöld fyrir ríkissjóð eða afskriftir í bönkunum umfram það sem þegar var ákveðið í byrjun kreppunnar. Tillitssemi gagnvart kröfuhöfum þ.e. fjármagseigindum er einnig ofarlega í huga AGS og því samþykkir hann ekki afskriftir, niðurfellingu eða aðra leiðréttingu á skuldum almennings umfram þá sem óhjákvæmilega fara á hausinn. Þess vegna er ríkisstjórn VG og SF svo treg til aðgerða umfram lengingu í lánum, greiðsluaðlögun, lengingu aðfararfrests osvfr. Aðgerðir sem miðast að því að láta fólk borga hvað sem það kostar. Og þetta eru flokkar sem kenna sig við jöfnuð og réttlæti sem með stjórnina fara.

Þegar almenningur í landinu gerir sér grein fyrir þessu þá hefst búsáhaldabylting hin síðari.

Vísir Fréttir Lífið Íþróttir Viðskipti Vefmiðlar
Blogg.Vísir.is Innskráning Nýskráning