Hætt og farin á aðrar slóðir… 19. júní 2007
Fært af Arna Schram undir Umræðan. 3 ummæliÉg er hætt að blogga á Vísi og fer á aðrar slóðir…nánar tiltekið í blogghóp nýs fréttavefjar: eyjan.is.
Sá vefur opnar innan tíðar. Sjáumst þar.
E.S: Já, vel á minnst, mér skilst að eyjan verði opnuð gestum og gangandi öðru hvoru megin við helgina.
E.E.S. (23. júní) Nýja slóðin mín er HÉR.
Karlar bjóða konum lægri laun
Fært af Arna Schram undir Umræðan. 4 ummæliKarlar bjóða konum lægri laun en körlum! Enga rannsókn þarf til að sýna fram á það. Staðreyndirnar tala sínu máli.
E.S: Jú, mikið rétt, ekki skárra ef konur feta í fótsporin…
Bleikir skór…
Fært af Arna Schram undir Umræðan. 1 ummæli fram að þessuÍ tilefni dagsins kom ég í bleikum skóm í vinnuna. (Ég hef verið að bíða eftir því að vinnufélagar mínir hér á Viðskiptablaðinu hrósi skónum - sem vel að merkja eru ótrúlega flottir - en það hafa þeir ekki gert…ekki enn).
Ég sé að fleiri hafa skipt um lit í tilefni dagsins: Fréttavefur Morgunblaðsins er orðinn bleikur og að hluta til Vísisvefurinn líka.
Fyrir þá sem ekki vita þá er þess minnst í dag að hinn 19. júní 1915 fengu konur, sem náð höfðu fertugsaldri, kosningarétt og kjörgengi til Alþingis. Stjórnarskrárfrumvarp um kosningarétt kvenna var samþykkt á Alþingi árið 1913. Tveimur árum síðar, nánar tiltekið hinn 19. júní 1915, samþykkti Kristján X konungur stjórnarskrána. Konur fengu síðan fullan og skilyrðislausan kosningarétt og kjörgengi til Alþingis árið 1920 þegar ný stjórnarskrá vegna sambandslaganna frá árinu 1918 gekk í gildi. Þar með höfðu þær jafnan rétt og karlar til að kjósa og bjóða sig fram til þings.
Ég vona að þeir sem styðji jafnréttisbaráttu kynjanna með því að sýna lit í dag, geri það ekki bara í dag, heldur allan ársins hring.
Viljinn er allt sem þarf!
Var náðargjöfin tvíeggjað sverð? 18. júní 2007
Fært af Arna Schram undir Umræðan. 1 ummæli fram að þessuEftirfarandi grein birtist í Morgunblaðinu í júní 1915. Tilefnið var nýfengið frelsi kvenna til að kjósa og bjóða sig fram til Alþingis.
Frelsi, frelsi?
Það er fallegur hljómur í því orði. Og það slitnar furðu seint þótt sífellt sé verið að tönlast á því. En frelsið er líka svo margs konar. Trúfrelsi, stjórnfrelsi, athafnafrelsi, kvenfrelsi!
Og nú er kvenfrelsið komið til lands vors. 19. júní er frelsisdagur íslenskra kvenna. Frelsið er komið til þeirra án þess að þær hafi eiginlega nokkuð fyrir því haft. Þær hafa kallað á það og það hefur komið sjálfviljugt. Hamingjusama kvenþjóð!
Ætla mætti nú að konurnar hefðu tekið svo góðum gesti tveim höndum. En þeim féllust alveg hendur. Kvennablaðið sendi þó út fregnmiða - og þar við sat.
Þykir konunum ekkert í þetta varið? Er þeim svona um og ó að taka við frelsinu? Ég vildi að svo væri. Með því sýndu konurnar það, að þær vissu að böggull fylgir skammrifi.
Nú verða þær að leggja á sig aukaerfiði - þær verða að fylgjast með í öllum stjórnmáladeilum landsins, lesa í þaula allar stjórnmálagreinar, flugrit og þess háttar, koma á fundi og halda ræður. Og allt þetta verða þær að gera milli þess sem þær mjalta, búverka, matreiða, gæta krakkanna, sauma og spinna.
Vesalings kvenþjóð! Ætli náðargjöfin verði ekki tvíeggjað sverð, sem syngur yfir sjálfs þín höfði? Við sjáum nú til.
En nú langar mig til að spyrja: Er rétt að láta hér staðar numið með rýmkun kosningaréttarins? Ég held tæplega. Börnin eiga einnig að fá kosningarétt, eða foreldrarnir fyrir þeirra hönd. Eða er það ekki ranglátt að sá maður, sem ekkert barn á, skuli hafa jafnt atkvæði um framtíðarmálefni landsins eins og sá, sem á 10 – 12 börn? Framtíðin er barnanna eign og því er rétt að láta þá, sem flest börnin eiga, hafa mest atkvæði um landsmál. Þeir eru þörfustu mennirnir – og auðvitað eiga þá konurnar óskilið mál – því þeir eru máttarviðir þjóðarinnar.
Þetta á ekki að vera „pólitískt“. Það eru aðeins bendingar. Morgunblaðið meltir ekki „pólitík.“
Elendinus
Hann vann…
Fært af Arna Schram undir Umræðan. rita ummæliPaul Potts sem heillaði Breta með söng sínum í keppninni Britain’s Got Talent. Söngur hans er sýndur í færslu hér að neðan.
Hann hefur fram að þessu ekki átt sjö dagana sælana. Fram kemur í þessari frétt að hann muni meðal annars nota verðlaunapeningana til að borga skuldir og laga í sér tennurnar.
Og sex ára stelpan sem reyndi líka…
Fært af Arna Schram undir Umræðan. 4 ummæliað sýna hvað í henni bjó í keppninni Britain’s Got Talent. Hér er hún.
Maðurinn sem heillaði Breta
Fært af Arna Schram undir Umræðan. 1 ummæli fram að þessuMyndbandið af manninum sem heillaði Breta, í keppninni Britain’s Got Talent er alveg þess virði að horfa á aftur og aftur. Denni benti á þetta á sínum vef.
En þeir sem ekki hafa þegar séð það, verða að kíkja. Frábært að fylgjast með viðbrögðum dómnefndarmanna, sem áttu svo sannarlega ekki von á miklu, þegar þeir sáu bara ósköp venjulegan og óöruggan símasölumann, stíga upp á sviðið. Þetta dæmi sýnir hins vegar, svo ekki verður um villst, að draumar geta ræst og að sumir átta sig ekki alveg á því hvaða hæfileika þeir hafa.
Hvar er Össur? 17. júní 2007
Fært af Arna Schram undir Umræðan. 2 ummæliÍ bloggheimum velta menn því fyrir sér hvar Össur Skarphéðinsson nýr iðnaðarráðherra sé. Þá á ég við: Hann virðist vera hættur að blogga. Í bili að minnsta kosti.
Bloggið hans var einn af viðkomustöðum mínum í bloggrúntinum. Og því velti ég fyrir mér, eins og aðrir hér í bloggheimum, hvar hann sé niðurkominn?
Annars er þessi bloggheimur merkilegur. Ég held að þeir sem séu að blogga, lesi hvern annan, en er ekki viss um að aðrir þar fyrir utan, séu mikið hér á ferð.
Sjálfri finnst mér þó nauðsynlegt að fylgjast vel með blogginu eins og öðrum þjóðfélagsumræðum. Í blaðamennsku skiptir nefnilega máli að fylgjast vel með, og eru umræðurnar í bloggheimum þar engin undantekning. Þær geta í raun varpað ljósi á svo ótrúlega margt…
Stóra spurningin þessa dagana er því: Hvar er Össur? Því ekki er hann hér.
E.S: Hann er kominn í leitirnar.
Sungu fyrir gamlar konur sem grétu 16. júní 2007
Fært af Arna Schram undir Umræðan. 4 ummæli
Mynd/Stella
“Við sungum í kirkjunni í Flórens og þar voru bara gamlar konur sem grétu við sönginn,” sagði dóttir mín, sem nú er stödd á Ítalíu, með Stúlknakór Reykjavíkur, undir stjórn Margrétar J. Pálmadóttur.
Ég sé þetta alveg fyrir mér: Heill stúlknakór frá Íslandi í gamalli kirkju í Flórens. Allar í hvítum kjólum. Á þær hlusta dökkklæddar ítalskar eldri konur, sem gráta, þegar þær heyra fallegu, saklausu barnsraddirnar. Já, hver yrði ekki meyr við slíkar aðstæður?
Stúlknakórinn er semsé í tveggja vikna æfinga- og tónleikaferð í Toscana á Ítalíu. Ekki leiðinlegt!
E.S. Fréttavefir Morgunblaðsins og Vísis segja frá tónleikum kórsins á vefjum sínum í dag.
Ekki þurfti að semja um hvalveiðar milli ríkisstjórnarflokkanna
Fært af Arna Schram undir Umræðan. rita ummæliÁrni M. Mathiesen fjármálaráðherra sagði á Alþingi í vikunni að hvalveiðar hér við land færu fram á grundvelli ályktunar sem samþykkt var á Alþingi í mars 1999. Því hefðu núverandi ríkisstjórnarflokkar ekki þurft að semja um hvalveiðimál í sinni stefnuyfirlýsingu.
Orð Árna féllu í umræðum í upphafi þingfundar á miðvikudag þar sem einstakir stjórnarandstæðingar gerðu það meðal annars að umtalsefni að stjórnarflokkarnir: Sjálfstæðisflokkurinn og Samfylkingin, ættu eftir að semja um hvalveiðar í atvinnuskyni.
Um þetta sagði Árni í lok umræðunnar: “Ég var dálítið hissa á því hvernig háttvirtir þingmenn tóku [hvalveiðar] inn í þessa umræðu eins og þær væru eitthvað sem hefði átt að semja um á milli ríkisstjórnarflokkanna. Ég held að háttvirtir þingmenn séu búnir að gleyma á hvaða forsendum hefur verið unnið í hvalveiðimálum á undanförnum árum. Það er unnið á forsendum þingsályktunar frá Alþingi frá 1999. Hún var þingmannamál og það voru svo margir þingmenn á þeirri tillögu að ég man eiginlega ekki hvað þeir voru margir.”
Þingsályktunin sem Árni vísar til var samþykkt á Alþingi hinn 10. mars 1999. Fyrsti flutningsmaður hennar var Guðjón Guðmundsson, þáverandi þingmaður Sjálfstæðisflokks. Meðflutningsmenn voru: Einar K. Guðfinnsson, Sjálfstæðisflokki, Stefán Guðmundsson, Framsóknarflokki, Siv Friðleifsdóttir, Framsóknarflokki, Kristinn H. Gunnarsson, Framsóknarflokki, Gísli S. Einarsson, Samfylkingu, Guðmundur Hallvarðsson, Sjálfstæðisflokki, Árni M. Mathiesen, Sjálfstæðisflokki, Ólafur Örn Haraldsson, Framsóknarflokki, Árni Johnsen, Sjálfstæðisflokki, Magnús Stefánsson, Framsóknarflokki og Pétur H. Blöndal, Sjálfstæðisflokki.
Samþykkt af þingmönnum Sjálfstæðisflokks, Framsóknarflokks og Samfylkingar
Texti tillögunnar breyttist aðeins í meðförum þingsins, en meginefni hennar - um að hefja skuli hið fyrsta hvalveiðar hér við land - stóð þegar hún var loks samþykkt, með 37 atkvæðum gegn sjö.Tólf þingmenn sátu hjá. Þeir sem samþykktu tillöguna komu úr öllum flokkum, nema þingflokki óháðra, þ.e. úr Sjálfstæðisflokki, Framsóknarflokki og þingflokki Samfylkingarinnar. (Þingmenn í þingflokki óháðra fóru flestir í VG seinna meir).
Þeir sem sögðu nei komu úr þingflokki óháðra, Framsóknarflokki og þingflokki Samfylkingar. Sjá nánar hér.
Ályktunin í heild sem samþykkt var hljóðaði svo: “Alþingi ályktar að hefja skuli hið fyrsta hvalveiðar hér við land og tekur fram að ályktun þess frá 2. febrúar 1983 stendur ekki í vegi fyrir því. Veiðarnar fari fram á grundvelli vísindalegrar ráðgjafar Hafrannsóknastofnunarinnar og undir eftirliti stjórnvalda.
Alþingi leggur áherslu á óskoraðan fullveldisrétt Íslands við nýtingu hvalastofna á íslensku hafsvæði í samræmi við alþjóðlegar skuldbindingar um sjálfbæra nýtingu lifandi auðlinda.
Alþingi felur ríkisstjórninni að undirbúa hvalveiðar, meðal annars með því að kynna málstað og sjónarmið Íslendinga meðal viðskiptaþjóða okkar. Undirbúningur miði að því að veiðar geti hafist sem fyrst. Kostnaður við kynninguna verði greiddur úr ríkissjóði. Öllu kynningarstarfi verði flýtt svo sem auðið er.”
Blaðamaður af lífi og sál.