Bensi

Átökin um Hitaveitu Suðurnesja staðfesta með mörgu öðru að orkugeirinn og útrásarvæntingarnar eru framtíðarvettvangur fjármagns og arðsvonar. Um leið sjá menn að söluverð á hlut Akureyrarbæjar og Reykjavíkurborgar í Landsvirkjun var mjög lágt - líklega þannig að tugir milljarðar hafa farið hjá þessum sveitarfélögum. Spyrja má líka hvað þeim gekk til að selja þegar allir áttu að sjá að við værum á þröskuldi nýrra möguleika - bæði í sölu á orku til fleiri aðila en álvinnslu og einnig og ekki síður vegna þess að við eygjum nú möguleika á að standa fyrir þekkingarútflutningi og þróun sem býður upp á mikilvæg fjárfestignartækifæri -með alþjóðlegum fjármagni innan og utanlands.

—-
Viðskiptaráðherra hefur auglýst eftir princip-umræðunni og ákvarðanatöku sem styðst við einhverja heildarsýn og vill stöðva einkavæðingu almannahlutverks vatsveitu, rafveitu og hitaveitu - á Suðurnesjum jafnt sem annars staðar á landinu.

Reynsla annarra þjóða af einkavæðingu orkumála og samgöngukerfis hefur verið slæm - og svo slæm að í USA og Bretlandi grípa menn ítrekað til takmarkandi löggjafar til að stemma stigu við gróðahugmyndum einkakapitalsins og fræg er reynslan af hlut Enron sáluga við að framkalla orkuskort í tilteknum hlutum Bandaríkjanna. Enron hrundi - og takmarkanir á umsvifum einkaaðila í orkugeiranum og sérstaklega takmarkanir á heimildum til að taka hagnað út úr rekstri slíkrar almannaþjónustu - hafa haldið skipulega innreið í ríkjum sem fóru fram úr sér í einkavæðingar-bulli Reagan-Thatcher tímabilsins. Jafnvel á Nýja-Sjálandi og í Chile reyna menn ákaft að bjarga sér undan mistökum og þeirri óskilvirkni - sem græðgisvæðing siðlausra fjárfesta og skrímsla - hefur leitt yfir hagkerfi þessarra landa.

—-
Nú þurfum við að passa upp á okkar framvindu; - gerum það með öflugri greiningu og rannsókn á staðreyndum. Látum ekki frjálshyggju-trúboð og áróður (þó hann komi frá Viðskiptaráði og Alþjoðagjaldeyrissjóðnum) vill okkur sýn.

Sýnist hann Stefán Snævarr alltaf skarpur í sínum greiningum á orðræðunni og bendi á grein hans í Lesbók Morgunblaðsins 30. júní sl. - þar sem hann andæfir enn og aftur yfirborðsvaðli Hannesar Hólmsteins og félaga hans. Einnig er vefur Stefáns oft býsna skemmtilegur - þar sem hann opnar á hugmyndir og skrif annarra - þannig að maður fer að leita.   Minni í því samhengi á ágætan pistil um bók David Harvey, A Brief History of Neoliberalism, sem Stefán birti sl. vetur.

Sjáumst
Bensi