Hér þarf tafarlausa rannsókn 20. nóvember 2008
Fært af Björn Friðfinnsson undir Óflokkað. rita ummæliBlaðafréttir um viðskipti Stíms ehf. kalla á tafarlausa rannsókn. Hvernig má það vera að ungur og lítt reyndur maður í Bolungarvík fær tuttugu og fimm milljarða lán í Glitni til hlutabréfakaupa án nokkurra trygginga og nýtir síðan andvirði lánsins til kaupa til að eiga hlutabréfaviðskipti við Glitni og FL.group þar sem slóð fjármunanna endar. Ungi maðurinn virðist sjálfur ekkert botna í þessum viðskiptum og neitar þvi að tjá sig um þau. Hann telur þó að hann muni ekki verða krafinn um endurgreiðslu lánsins sem verið hafi a nafni einkahlutafélags.
Ljóst virðist að hér hefur ungi maðurinn verið leikandi í sjónarspili sem sett hefur verið á svið í annarlegum tilgangi.
Hér er komið upp mál sem krefst tafarlausra viðbragða. Hvaða starfsmenn Glitnis banka fjölluðu um þetta mál og hvaða stjórnandi samþykkti lánveitinguna? Þessi og fleiri spurningar hljóta að vakna., sem kalla á opinbera rannsókn.
Að stinga skýrslum undir stól 19. október 2008
Fært af Björn Friðfinnsson undir Óflokkað. rita ummæliFréttir herma að stjórnendur Landsbankans hafi ákveðið að stinga skýrslum erlendra sérfræðinga undir stól þar sem sterklega var varað við framvindu mála í bankanum. Hér er um mjög alvarlegt framferði að ræða. Þær sögur ganga nú fjöllunum hærra að starfsmenn bankans hafi haldið áfram að fullvissa viðskiptavini hans um það að sáralítil áhætta fylgdi því að leggja fé inn á svokallaða peningamarkaðsreikninga. Hafi þeir jafnvel hvatt til þess að eigin frumkvæði að svo væri gert. Ljóst er að sé þetta rétt kann það að hafa bakað hinum vellaunuðu bankastjórum bankans og e.tv. öðrum stjórnendum hans skaðabótaábyrgð þar þeir hafi gegn betri vitund gefið þjónustufulltrúum bankans fyrirmæli um að mæla með vafasamri ávöxtunarleið á svokölluðum peningamarkaðsreikningum við viðskiptavini bankans. Þeir hafi þó vitað, að hér væri um vaxandi áhættu að ræða enda lúrðu þeir á upplýsingum sem almenningur hafði ekki aðgang að..
Undirbúningur aðildarumsóknar að ESB 18. október 2008
Fært af Björn Friðfinnsson undir Óflokkað. rita ummæliÍslendingar náðu ekki kjöri í Öryggisráð SÞ. Á sama tíma kemur í ljós mikill stuðningur þjóðarinnar við aðildarumsókn að ESB. Það má vera huggun harmi gegn úrslitunum í SÞ-kosningunni, að við þau losnar starfslið utanríkisþjónustu okkar til annarra verkefna. Það getur nú einbeitt sér að undirbúningi aðildarumsóknar að ESB. Er þar um að ræða skýrslugerð um ýmsa málaflokka og áhrif þeirra á stjórnsýslu okkar og þjóðlíf, ef til aðildar kemur. Í framhaldi af því mætti síðan virkja starfslið allra ráðuneyta til þess að móta samningsmið í aðildarviðræðum og hefja viðræður. Hér skal aðild Alþingis ekki gleymt, en að sjálfsögðu hlýtur að koma til ákvarðana þess í hvert sinn sem að tímamótum kemur í aðildarumræðunum og lokaniðurstaðan yrði síðan lögð undir þjóðina til samþykkis eða synjunar. Áður þyrfti lika stjórnarskrárbreytingu , þar sem bætt væri við stjórnarskrána svokölluðu “opnunarákvæði” á sama hátt og finna má í stjórnarskrám Danmerkur og Noregs svo dæmi sé tekið.
Hvar eru peningarnir? 7. október 2008
Fært af Björn Friðfinnsson undir Óflokkað. rita ummæliEitt viðfangsefni þeirra ráðstafana sem nú er unnið að í lausn á fjárhagsvanda bankakerfisins er að vinda ofan af svokölluðum ICESAFE innlánssreikningum Landsbankans í Bretlandi. Rætt er um það í breskum fjölmiðlum að hluti af innlánstryggingu af þessum innlánum falli á íslenskar herðar og er þar um háar fjárhæðir að ræða.
Ástæða er til að spyrja hvað hafi orðið af því fé sem breskir sparendur lögðu inn á þessa reikninga. Hvernig ráðstafaði Landsbankinn þessu fé? Sé eitthvað óljóst í því efni, er e.t.v. ástæða til til sérstakrar rannsóknar um það atriði og jafnvel lögreglurannsóknar á því hvort hér hafi verið um einhvers konar “píramída”svikastarfsemi að ræða.
Yfirlýsing um aðildarumsókn í ESB 5. október 2008
Fært af Björn Friðfinnsson undir Óflokkað. rita ummæliÞað er meginatriði í yfirstandandi aðgerðum til viðreisnar krónunni, að opinberlega settur verði endapunktur á þá hagstjórn, sem fyrirsjáanlega verður banamein hennar. Aðgerðunum verður að fylgja yfirlýsing um að íslensk stjórnvöld muni á þegar í stað hefja undirbúning að formlegri aðild að ESB og í því sambandi verði kappkostað að fylgja Maastricht skilyrðunum sem eru forsenda aðildar að myntbandalagi bandalagsins. Verði slíkar aðgerðir m.a. látnar ná til næstu fjárlaga lýðveldisins.
Forsætisráðherra taldi í viðtali við fréttamenn að umsókn um ESB aðild kæmi væntanlegum viðreisnaraðgerðum ekki við og væru alls óskylt mál. En svo er alls ekki. Hér er spurningin um að þjóðin ávinni bankakerfi sínu traust, sem nú hefur glatast. Yfirlýsing um þokukennd áform í efnahagsmálum myndi litlu úr bæta. En aðild að myntbandalagi ESB myndi setja efnahagsstjórnina undir þann aga sem skort hefur. Og þótt nokkur ár muni líða þar til að Ísland gæti gengið í myntbandalagið, fæst hér samanburðarstaðall, sem þegar mætti taka í notkun og sem eftirlitsstofnanir og viðskiptamenn íslenskra bankakerfisis geta borið raunárangur hagstjórnarinnar saman við á hverjum tíma.
Aðild að myntbandalaginu er þó aðeins eitt af fjöldamörgum atriðum, sem sem hníga að því að Íslendingar ættu að sækja um aðild að sambandinu hvort eð er.
Krónan í frjálsu falli 18. september 2008
Fært af Björn Friðfinnsson undir Evrópusambandið. rita ummæliGengi krónunnar er í frjálsu falli. Hverju sem um er að kenna , er ljóst að fallið verður ekki stöðvað nema með því að ríkisstjórnin breyti stefnu sinni í Evrópumálum. Með því að lýsa því yfir að hún stefni að aðild að Evrópusambandinu og að hagstjórn ríkisins muni verða aðlöguð Evrukröfum, myndi draga úr þrýstingnum á krónuna. Ákvæðin í stjórnarsáttmála um að ekki verði sótt um aðild á kjörtímabilinu verða einfaldlega að víkja í ljósi ríkjandi aðstæðna. Ferð sendinefndar til Brussel til þess að spyrja um hvort hægt sé að taka upp evru án aðildar, er aðeins biðleikur í stöðunni. Forsætisráðherra var búinn að spyrja að þessu í heimsókn sinni til Brussel og fékk neikvætt svar.
Það er líka aulasvar við þeim ábendingum sem Jónas H.Haralz kom nýlega á framfæri, að hann hafi lengi verið þeirrar skoðunar. Sú staðreynd breytir engu um réttmæti ábendinga hans nú. En aðalatriði málsins er að stefnubreyting ríkisstjórnarinnar er nú nauðsyn. Meiri hluti þjóðarinnar er nú hlynntur aðildarumsókn og það verður að taka alvarlega í stað þess að leika endalausa biðleiki.
Ummæli Jónasar H. Haralz 10. september 2008
Fært af Björn Friðfinnsson undir Efnahagur, Evrópusambandið. 1 ummæli fram að þessuUmmæli Jónasar H.Haralz í viðtölum við fjölmiðla um síðustu helgi eru eftirminnileg. Í fáum orðum fjallaði þessi valinkunni og reyndi sérfræðingur um kjarna þess vanda , sem þjóðin á við að etja um þessar mundir.
Hann nefndi stjórntæki við efnahagsstjórn þjóðarbúsins, sem tekin hefðu verið úr sambandi og hann nefndi einnig ósamræmið í aðgerðum ríkisstjórnar og Seðlabanka. Hann taldi að eina ráðið til að losna úr hinni eilífu þrætubókarlist í umræðum um aðild að ESB væri að sækja um aðild. Þá myndu hin aðkallandi svör fást sjálfkrafa. Ef stjórnvöld vilja ekki fylgja þessu ráði, er sjálfsögð krafa sú að þau rökstyðji þá afstöðu.
Jónas sagði einnig að aukin stóriðja og og meðfylgjandi framkvæmdir leysi ekki hinn aðkallandi vanda eins og margir hyggja.
Þau orð hans hvetja til aukinnar aðgátar og gera þá kröfu til ríkisstjórnarinnar að hún birti og rökstyðji stefnu sína í málinu. Telji hún ábata af aukinni stóriðju þarf hún að rökstyðja það og leggja þar öll spil á borðið. Sérstaklega ættu menn að gjalda varhug við frekari álbræðslum um þessar mundir, enda er nú álverð á hraðri niðurleið á hrávörumörkuðum heimsbyggðarinnar.
Ríkisstjórnin gefur ekki neitt 29. ágúst 2008
Fært af Björn Friðfinnsson undir Óflokkað. rita ummæliÞað var einkennileg frétt í í Morgunblaðinu í dag, föstudag. Sagt var frá nýbyggingu fyrir Árnastofnun, sem ætlunin er að rísi á Melunum. Svo kemur þessi klausa: “Byggingin er gjöf frá ríkisstjórninni, fjármögnuð af hluta söluandvirðis Símans”
Hér hefur fávís fréttamaður haldið á penna. Ríkisstjórnin gefur ekki neitt, nema ráðherrarnir taki upp sín einkaveski og leggi allir í púkk fyrir gjöf t.d. afmælisgjöf til samstarfsmanns. Svo er alls ekki í þetta skiptið. Hér er er einfaldlega ætlunin að byggja hús á vegum ríkisins í þágu rikisstofnunar. Og enn er það Alþingi sem fer með fjárveitingarvaldið, hvernig sem fjármunirnir komu í ríkissjóð.
Stefnt skal að því að fullnægja “EVRU”- skilyrðunum. 23. ágúst 2008
Fært af Björn Friðfinnsson undir Efnahagur. rita ummæliForsætisráðherra hefur nú lýst því yfir að stefnt skuli að því að Ísland uppfylli þau skilyrði , sem Evru-aðild myndu vera samfara, burtséð frá því hvort Íslendingar muni sækja um ESB-aðild eða ekki.
Þetta eru út af fyrir sig góðar fréttir. Spurningin er hvernig ríkisstjórnin hyggst ná þessu markmiði. Taka fyrirliggjandi drög að fjárlögum ársins 2009 mið af þessu markmiði? Eru menn reiðubúnir til þess að gera þann niðurskurð útgjalda sem þessu hlýtur að fylgja?
Eftirfylgni þessarar yfirlýsingar forsætisráðherra á næstu vikum, mun skera úr því, hvort ríkisstjórninni sé alvara að gera nú varanlegar umbætur á hagstjórn þjóðarbúsins. Ef menn ákveða að fresta aðgerðum í þessa veru, er voðinn vís.
Hjólreiðabrautir meðfram vegum
Fært af Björn Friðfinnsson undir Ferðalög. rita ummæliÁ ferðum mínum um landð í sumar hef ég orðið var við mjög aukna umferð hjólreiðamanna og ég hef orðið vitni að því að litlu hefur mátt muna að slys yrðu, þegar bifreiðastjórar hafa ekið fram úr hjólreiðamönnunum án þess að draga úr hraða.
Það er orðið mjög brýnt að leggja sérstakar brautir fyrir hjólreiðamenn meðfram helstu þjóðvegunum og um leið útbúa litla áningarstaði fyrir þá, þar sem þeir gætu áð og snætt nestið sitt. Slíkar brautir þarf að taka á vegaáætlun og síðan verði ákveðinn kílómetrafjöldi þeirra lagður árlega.
Þeir hjólreiðamenn, sem ég hef orðið var við eru flestir af erlendu bergi brotnir, þótt einnig sé hér um Íslendinga að ræða. Algengt er að þeir hjóli hringferð um landið. Með bættri aðstöðu hjólreiðamanna eins og hér er fjallað um, munum við með tíð og tíma auka fjölda Íslandsvina í nágrannaríkjum okkar um leið og gerðar eru sjálfsagðar ráðstafanir til að draga úr slysahættu.
Ég er fæddur 23.des. 1939. Stúdent frá MA 1959. Lögfræðipróf 1965. Hef starfað sem sjómaður, blaðamaður, dómarafulltrúi, bæjarstjóri, framkvæmdastjóri, fjármálastjóri Reykjavíkurborgar, formaður Sambands íslenskra sveitarfélaga, formaður skipulagsstjórnar ríkisins, ráðuneytisstjóri í þremur ráðuneytum og framkvæmdastjóri ESA í Brussel. Einnig verið stjórnarformaður í ýmsum nefndum og ráðum á vegum hins opinbera og einkaaðila.