Fánýtar fabúleringar

Fór á hina prýðisgóðu Eastern Promises í kvöld. David Cronenberg leikstýrir og Viggo Mortensen leikur aðalhlutverkið, rétt eins og í History of Violence. Ég hef ekki séð hana en hún á að vera góð. Ég trúi því vel enda var verkið sem ég sá í kvöld nokkuð gott.

Myndin var þó allt öðruvísi en ég bjóst við. Ég vissi að þetta væri mynd um skipulagða glæpi en í raun var það ekki aðalatriðið í myndinni.

Naomi Watts fer á kostum í myndinni og er nú komin í mínar bækur sem einstaklega góð leikkona.

Viggo Mortensen er líklega svalasti maður á jarðríki. Hann leikur Rússa og hatar ekki að skipta á milli rússnesku og ensku í myndinni, eins og ekkert væri sjálfsagðra. Hápunktur myndarinnar er án ef þegar hann býður tveimur Rússum byrginn, kviknakinn í baðhúsi. Gjörsamlega stórkostlega absúrd atriði.

Sem ég segi var myndin ekki eins og ég bjóst við en það er alls ekki löstur á þessari ræmu. Kom mér þægilega á óvart. Hún vann á eftir fremur rólega byrjun en undir lokin er maður gjörsamlega búinn að gleyma stund og stað og er steinrunninn í óþægilegum sætum Háskólabíós.

- 82%

PS. Eftir að ég reyndi að horfa á Naked Lunch sem óharðnaður unglingur hélt ég að David Cronenberg væri mjög geðsjúkur maður. Kannski er ég bara þroskaðri í dag. Efast samt um það.

Ég hef verið að lesa um forsetaframboð meistara Stephen Colbert í Bandaríkjunum. Þetta er gjörsamlega stórkostlegt hjá honum en nú hefur komið í ljós að hann er í raun með meira fylgi en Ron Paul, alvöruframbjóðandi repúblíkana og demókratans Dennis Kucinich.

Colbert ákvað fyrir stuttu að bjóða sig fram í forvali beggja flokka í heimafylki sínu, Suður-Karólínu. Kosningabarátta hans gengur út á að hann sé “the native son of South-Carolina”.

Meðal kosningaloforða hans er að jafna fylki Georgíu við jörðu, enda fleiri ferskjur í Suður-Karólínu - og safaríkari þar að auki.

Fyrirtækið Rasmussen framkvæmir ýmsar skoðanakannanir sem kalla fram ýmsa athyglisverða vinkla.

Spurning 1: Ef þú þyrfti að kjósa á milli demókratans Stephen Colbert og Ron Paul úr repúblikanaflokkinum, hvorn myndir þú kjósa?

Colbert: 36%
Paul: 32%
Einhvern annan: 21%
Ekki viss: 10%

Spurning 2: Ef þú þyrfti að kjósa á milli demókratans Dennis Kucinich og Stephen Colbert úr repúblikanaflokkinum, hvorn myndir þú kjósa?

Colbert: 37%
Paul: 32%
Einhvern annan: 19%
Ekki viss: 11%

Gjörsamlega stórkostlegt. Rasmussen spurði einnig kjósendur á aldrinum 18-29 ára eftirfaranda spurninga:

1) Hvern myndir þú kjósa á milli þessara þriggja: Stephen Colbert, Hillary Clinton eða Rudy Giuliani?

Colbert fékk 28% atkvæðanna.

2)  Hvern myndir þú kjósa á milli þessara þriggja: Stephen Colbert, Hillary Clinton eða Fred Thompson?

Colbert fékk 31% atkvæðanna.

Svo má bæta við að einhver 16 ára stráklingur bjó til grúppu á Facebook sem heitir “1,000,000 Strong for Stephen T. Colbert”. Fjöldi notenda í grúppunni er nú 1,2 milljónir.

Kóreumaðurinn Jin-Soo Kwon mun láta lífið einhverntímann eftir áramót. Það verður skyndilegur og ótímabær dauðdagi. Einkar sorglegur því kona hans er ólétt.

Fyrir ykkur sem ekki vitið hver Jin er, hann er karakter í Lost-þáttunum.

Hér má lesa hvernig leikarinn, Daniel Dae Kim, var um daginn handtekinn fyrir ölvunarakstur á Hawaii, þar sem þátturinn er tekinn upp.

Hann er þó ekki sá fyrsti úr leikaraliði þáttarins sem lætur nappa sig sósaðan undir stýri - Michelle Rodriguez, Cynthia Watros og Adewale Akinnuoye-Agbaje, gerðu sig öll sek um hin ýmsu umferðarlagabrot. Og persónur þeirra, Ana Lucia, Libby og Mr. Eko, hlutu öll voveiflegan dauðdaga í þáttunum.

Samkvæmt því mun Jin ekki verða langlífur.

Já, ég ætla að blogga um veðrið. Get over it.

Snjórinn kom jafn skjótt og hann fór í dag. Fyrir þá sem hafa gullfiskaminni verður þetta svona fram að áramótum. Ef það kemur snjór fer hann innan tveggja daga með tilheyrandi slabbi og skemmtan. Það verða svo rauð jól og kannski snjóar eitthvað smá á milli jóla á nýárs.

Ef það snjóar eitthvað almennilega í vetur verður það ekki fyrr en eftir áramót.

Geir Þorsteinsson sagði að KSÍ hafi verið í tímapressu vegna Danaleikins og þess vegna hafi Ólafur Jóhannesson verið ráðinn nú. Ég stend við það sem ég sagði í fyrri færslu.

Ég spurði Geir af hverju KSÍ hafi ekki gefið sér meiri tíma til að ráða þjálfara. Hann sagði að erlendur þjálfari hafi komið til greina en þeir hafi litið á það sem betri kost að ráða þjálfara til frambúðar nú í stað þess að ráða einhvern í þennan eina leik gegn Dönum.

Enn og aftur vísa ég í fyrri færslu mína um málið.

Ég ítrekaði spurningu mína. Svar Geirs var að það væri álit KSÍ að þessi kostur hafi verið betri.

En ég vil þó taka skýrt fram að með þessu er ég ekki að gagnrýna Ólaf Jóhannesson. Ég býst við því að hann nái góðum árangri með landsliðið og er ég alls ekki búinn að afskrifa hann fyrirfram. Þetta snýst ekki um það. Þetta snýst um að KSÍ er að taka mikilvægar ákvarðanir um framtíð landsliðsins á afar litlum tíma.

Mér finnst að sú skoðun mín verði að koma fram.

Flest virðist benda til þess að Ólafur Jóhannesson verði ráðinn landsliðsþjálfari í dag og að Leifur Garðarsson verði aðstoðarmaður hans. Svo segir sagan allavega. Það verður blaðamannafundur hjá KSÍ í hádeginu í dag þar sem ráðningin verður formlega tilkynnd.

Atburðarrásin hefur verið hröð síðustu daga. Á laugardaginn var það endanlega ljóst að nýr þjálfari yrði ráðinn og nú, aðeins tveimur dögum síðar, hefur verið gengið frá ráðningunni.

Ég er nokkuð viss um að það var aðeins rætt við einn mann. Ég verð að fá að segja mína skoðun á því. Mér finnst að það hefði átt að fá einhvern innanbúðarmann hjá KSÍ til að stýra landsliðinu gegn Dönum (til dæmis Lúkas Kostic, Bjarna Jó, Sigga Ragga eða Guðna Kjartans) og taka sér svo góðan tíma í að ráða nýjan landsliðsþjálfara. Mér finnst að það sé farið fullgeyst í ráðninguna nú.

Ég hef ekkert út á Ólaf að setja enda er hann góður þjálfari sem hefur náð frábærum árangri síðustu ár. En ég neita því ekki að ég vildi fá erlendan þjálfara í starfið. Ég held að það hefði verið lítið mál að finna einhvern frambærilegan erlendan þjálfara, þekkt nafn, til að taka þetta að sér.

Ef að Egil Drillo Olsen er til í að fara til Íraks og Klaus Toppmöller til Georgíu, þá hlýtur það að teljast vænlegur kostur fyrir þessa menn að fara til Íslands. Þjálfarinn þyrfti ekki að búa á Íslandi, væri kannski með íslenskan aðstoðarmann, og myndi þess í stað ferðast á milli landa til að fylgjast með íslenskum leikmönnum í Evrópu. Svo kæmi hann til Íslands á sumrin til að sjá nokkra leiki í deildinni hér heima.

En ef það reynist rétt að Ólafur verði ráðinn þýðir ekkert væl. Menn gefa honum sitt tækifæri og vona að hann nýti það vel. Ég vona að Leifur verði aðstoðarmaður hans því góður rómur var gerður að samstarfi þeirra hjá FH.

Hlustaði á viðtal við einhvern fasteignasérfræðing á Rás 2 áðan. Hann hefur ætíð haldið því fram síðan að fasteignaverð fór að hækka úr öllu valdi að hækkunin sé bóla sem eigi eftir að hjaðna, ef ekki springa.

Ég hef fylgst mjög vel með markaðnum síðan að verðið fór að hækka enda hef ég keypt tvisvar á undanförnum fjórum árum.

Sérfræðingurinn sagði að fasteignaverð hefði byrjað að hækka haustið 2004. Ég og konan mín keyptum okkar fyrstu íbúð í febrúar 2003. Ásett verð á íbúðinni þá myndi teljast algerlega hlægilegt í dag en samt tókst okkur að minnka verðið um tæp 10%.

Ef kaupverðið okkar í febrúar 2003 er X seldum við íbúðina í nóvember 2006 á 1,8X. Við vorum mjög sátt við verðið sem við fengum enda söluhagnaður okkar 80% af kaupverðinu okkar.

Nú er kaupandinn okkar búinn að setja íbúðina á sölu. Hann vill fá 2,43X fyrir íbúðina (upphaflega kaupverð okkar frá febrúar 2003 margfaldað með 2,43). Okkur finnst það gríðarlega mikil bjartsýni en kannski er þetta bara eðlilegt verð. Hvað veit maður.

Íbúðin sem við keyptum í nóvember 2006 hefur örugglega hækkað í verði. Ekki veit ég hvort hún hefur hækkað um 35% á þessum tíma eins og eigandi gömlu íbúðinnar okkar vill meina að okkar gamla hefur gert.

Það væri samt forvitnilegt að setja nýju íbúðina okkar á markaðinn, smyrja eins og 20 milljónum á kaupverðið og sjá hvað myndi gerast. En hversu forvitinn sem ég kann að vera myndi ég aldrei taka þá áhættu því ég vil alls ekki selja íbúðina, hversu brenglaður sem markaðurinn kann að vera.

Ég hóf minn feril á fasteignamarkaðnum réttu megin við “bóluna” - sem betur fer. Ekki myndi ég vilja kaupa mína fyrstu íbúð nú, sérstaklega ef áðurnefndur sérfræðingur hefur síðan á endanum rétt fyrir sér og fasteignaverð hrynur einn góðan daginn.

Tilkynningin sem engum kom á óvart og allir biðu eftir hefur litið dagsins ljós. Eyjólfur fær ekki nýjan samning hjá KSÍ. Hann fær ekki einu sinni að stjórna liðinu í síðasta leiknum í undankeppninni. Geir Þorsteinsson hefur alltaf haldið því fram að Eyjólfur klári keppnina. Það er greinilegt að eitthvað hefur breyst í þeim efnum.

Síðan að Liechtenstein-leiknum lauk hafa menn ekki hætt að ræða um landsliðið og málum tengdum því. Umræðan um tapið í Liechtenstein entist í nokkra daga en öllu líflengri var umræðan um agavandamál leikmanna og ekki síst fyrirliðamálið sem ég skrifaði um á Vísi í gær.

Síðustu viku hef ég velt fyrir mér hvernig það yrði þegar Eyjólfur myndi mæta aftur í sviðsljósið til að stýra liðinu gegn Dönum. Myndi hann bara mæta á blaðamannafundi eins og ekkert hefði í skorist? Gæti hann stjórnað æfingum með eðlilegum máta? Ég held að allir hefðu vitað, landsliðsmenn og aðrir, að Eyjólfur yrði aldrei endurráðinn eftir Danaleikinn.

Nei, það hefði verið afar skrýtin uppákoma og því kemur tilkynningin í dag ekkert á óvart. Hún er í raun afar rökrétt. Til hvers að láta manninn halda áfram þegar allir vita að framtíð hans hjá landsliðinu er engin.

Eyjólfur náði tveimur góðum landsleikjum sem þjálfari. Gegn Norður-Írum í Belfast og Spánverjum hér heima í september. Aðrir leikir voru ekki nógu góðir. Við eigum að geta miklu, miklu betur miðað við þá knattspyrnumenn sem við eigum.

En eitt vil ég þó taka skýrt fram. Þetta mál allt saman snýst ekki um persónuna Eyjólf. Eftir þau samskipti sem ég hef átt við hann, bæði sem leikmann og þjálfara, get ég ekkert nema gott sagt um hann. Þetta er drengur góður sem sinnir sinni fjölmiðlaskyldu bara nokkuð vel. Hann er kannski ekki mikið fyrir að gera meira en hann þarf en því sem hann þarf að sinna gerir hann vel og samviskusamlega.

Þetta snýst um þjálfarann Eyjólf. Og það er alveg ljóst að þjálfarinn var ekki tilbúinn í verkefnið. Hann hafði trú á sjálfum sér og var fullviss um að hann gæti þetta.

Mistökin liggja hjá Eggerti Magnússyni. Hann réði hann til starfa á sínum tíma, fyrst hjá U-21 landsliðinu árið 2003 og svo A-landsliðinu tveimur árum síðar. Eyjólfur samþykkti að taka starfið að sér enda erfitt að hafna boði um að gerast landsliðsþjálfari þíns heimalands.

Eyjólfur hefði frekar átt að fara út í þjálfun hjá félagsliði hér heima. Ef það hefði gengið vel, hefði ég gjarnan viljað að hann myndi kannski reyna sig hjá litlu liði í Þýskalandi. Safna sér reynslu víða að og taka svo við landsliðinu síðar á ferlinum - ef hann væri búinn að gera nóg á sínum þjálfaraferli til að eiga það skilið.

Hver tekur við? Ég hef talað við marga knattspyrnumenn á síðustu dögum og flestir telja líklegast að Willum taki við, hvort þeir kunni að vera sammála því eða ekki.

19.58 - Viðbót: Bendi mönnum á færsluna um Martin Jol hérna að neðan. Í kjölfarið býð ég upp á samsæriskenningu dagsins: Tilkynningin um Eyjólf kom í dag svo að Geir gæti farið í það að ganga í viðræður við Martin Jol um að taka að sér starf þjálfara íslenska landsliðsins.

Ég rakst á það fyrir slysni um daginn að það er haldið utan um Elo-stig fyrir knattspyrnulandslið. Þetta er nákvæmlega sama kerfið og er notað fyrir skákina.

Styrkleikalisti FIFA notaðist eitt sinn við Elo-formúluna en gerir það ekki lengur. Ja, reyndar er notast við Elo-formúluna í kvennaflokki.

Það kom mér gjörsamlega í opna skjöldu að samkvæmt nýjum styrkleikalista stendur íslenska landsliðið í stað (eða svo gott sem) þrátt fyrir 4-2 tap fyrir Lettum á heimavelli og 3-0 niðurlægingu í Liechtenstein.

Það meikar gjörsamlega engan sens.

Formúlan sem FIFA notast við gengur út á að reikna út úrslit síðustu fjögurra ára. Það þýðir að við útgáfu hvers lista detta gömul úrslit úr formúlunni og ný koma inn. Þetta á við um allar þjóðir. Það þýðir að það er gjörsamlega ómögulegt að spá fyrir um nýjan lista. Góð úrslit detta úr hjá sumum en slæm hjá öðrum.

Ég held að Elo-kerfið sé öðruvísi. Þar vinna menn stig og tapa í samræmi við úrslit hverrar viðureignar. Ísland tapaði til dæmis 54 stigum á tapanu í Liechtenstein og féll um níu sæti á listanum. Ísland tapaði 44 stigum eftir tapið fyrir Lettum og féll þá niður um tólf sæti.

Fyrir þessa leiki var Ísland í 85. sæti Elo-fótboltalistans en er nú í því 106. með 1381 Elo-stig.

Þessi listi reiknar út styrkleika allra landsliða í heiminum, líka þeirra sem ekki tilheyra FIFA. Í 107. sæti, sæti fyrir neðan okkur, er landslið Norður-Kýpur. Ég lýg engu um það. Það er virkilega til knattspyrnusamband norðurhluta Kýpurs. Þeir eru með deildakeppni og landslið og allt.

Þetta er semsagt tyrkneski hluti Kýpurs sem þetta samband tilheyrir. Þeir drógu sig úr kýpverska sambandinu og stofnuðu sitt eigið. Enn þann daginn í dag fá þeir ekki inngöngu í FIFA, þökk sér þvermóðsku Sepp Blatter.

Ísland og Norður-Kýpur eru nágrannar á lista þekktasta styrkleikaröðunarkerfi heimsins.

Oft áður hefur verið sagt frá því hvaða lönd eru nágrannar Íslands á FIFA-listanum (oft ýmis smáríki í Afríku eða Asíu) en sá samanburður nær nýjum hæðum nú.

Ísland og Norður-Kýpur.

Nánari lesning:
http://www.eloratings.net/world.html
http://en.wikipedia.org/wiki/Cyprus_Turkish_Football_Federation

Martin Jol er laus. Fljótur, Geir - gríptu hann áður en hann fer eitthvert annað.

Ímyndið ykkur fyrirsagnasæluna sem við íþróttafréttamenn fengum ef hann yrði ráðinn sem landsliðsþjálfari Íslands.

„Ekki alltaf Jol-in“

„Höldum helg Jol“

„Sveinar Jols voru hlægilegir“

„Engin Jolahugvekja“

„Á Jolunum er gleði og gaman“

„Ég sá mömmu kyssa Jol“

„Jolastjarnan Eiður Smári“

„Jolasveinar einn og tíu“

„Bráðum kemur blessaður Jol“

Fleiri tillögur vel þegnar.