Get a life!

Harðir andstæðingar samninga um Icesave innan Sjálfstæðisflokksins hrósa þeim tveimur þingmönnum flokksins sem greiddu atkvæði gegn samningnum en segja alla hina ættu að ganga í Samfylkinguna. Þeir hrósa jafnframt formanni Framsóknarflokksins fyrir hans framgöngu.

Væri ekki nærtækara að þessir tveir þingmenn færu í Framsókn?

Sagt er að bankaleynd sé nauðsynleg því trausti sem þarf að ríkja á milli banka og viðskiptavina hans. Undir það er hægt að taka almennt og yfirleitt.

En þegar bankarnir hrundu í fyrra þá hvarf allt traust eins og dögg fyrir sólu, þannig að það var ekki af miklu að taka.

Það voru ekki aðeins bankarnir sem misstu traust. Eftir hrunið er skynsamlegt að tortryggja allt og alla. Ef við gætum treyst því að stjórnvöld á öllum stigum rannsökuðu öll mál af festu og hlutleysi og dæmt yrði í þeim algjörlega án tillits til þess hverjir ættu í hlut, þá væri hægt að sætta sig við óbreytta bankaleynd.

En ég er alls ekki viss um að við getum treyst því.

Nú er svo komið að öll leynd er tortryggileg.

Á sama hátt og manni er fyrirmunað að sjá tengsl ef það hentar illa, er ofurauðvelt að sjá tengsl sem henta vel, þótt lítill fótur sé fyrir þeim.

Skjálftasjáandinn spáði svona (feitletranir eru mínar):

Mér hefur verið sýnt að það komi stór skjálfti þarna (á Krýsuvíkursvæðinu), ég stend á þessu svæði og upp í hugann kemur dagsetningin 27. júlí. Einnig finn ég fyrir tímasetningunni 23:15 en þori þó ekki að staðhæfa að það verði rétt. Ég hef ekki fengið sterk skilaboð um tímann en finnst þessi síðasta klukkustund fyrir miðnætti eitthvað sérstök. Ég stend í Krýsuvík og á vinstri hönd sé ég Strandakirkju og hægri hönd Grindavíkursvæðið. Þessi tala hverfur ekki frá mér. […] Þennan dag mun eitthvað magnað gerast, ég bara veit það. Ég hef tilfinningu fyrir stórum skjálfta og mér finnst að hann verði þarna.

Í gærkvöld, þann 31. júlí klukkan 23:46 varð jarðskjálfti á Reykjanesi upp á 3,2 á Richter-kvarðanum. Sjáandinn lítur greinilega svo á að spádómurinn hafi þar með ræst:

“Það hlaut að vera. Sá hlær best sem síðast hlær”

Spádómurinn rættist sem sagt að hennar mati þrátt fyrir að skjálftinn hafi orðið fjórum dögum eftir þann tíma sem spáð var og þrátt fyrir að skjálftinn hafi verið frekar vægur — í það minnsta er hæpið að segja að eitthvað magnað hafi gerst í gærkvöld.

“Ég sagði þetta!” sagði sjáandinn. Nei, þetta var ekki það sem sjáandinn sagði.

Jarðskjálftar af þessari stærð verða mörgum sinnum á ári hér á landi. Þegar við bætist að undanfarna mánuði hefur verið óvenjumikil jarðskjálftavirkni á þessu svæði þá þarf maður ekki að vera mjög spámannlega vaxinn til þess að búast við að skjálftar af þessari stærð geti orðið þessar vikurnar. Jafnstórir og stærri skjálftar urðu 19. og 25. júní. Það varð skjálfti upp á 4,7 þann 29. maí. Ég spái því hér með að magnaður skjálfti verði á Reykjanesi síðari hlutann í ágúst. Smáskjálftar fyrri hluta ágúst eða fyrri hluta september munu teljast uppfylla spádóminn að mínu hógværa mati.

Næst segir sjáandinn að verði eldgos. Hún nefnir enga dagsetningu í þetta skiptið. Ég get tekið fyllilega undir þennan spádóm, og ég spái því jafnframt að það eigi eftir að rigna. Ég ætla meira að segja að taka svolitla áhættu og spá því að það muni rigna í ágúst. Einhverstaðar.

En svo kemur ískyggilegur spádómur. Einhver atburður mun verða sem er miklu verri en eldgos. Nánari upplýsingar fást ekki að sinni. Já, ef jarðskjálftinn í gærkvöld var stór og magnaður atburður, þá get ég alveg tekið undir að líklega eigi einhvern tímann eitthvað eftir að henda sem er miklu verra en flest eldgos. Enda er ég nokkuð viss um að síðustu 30 ár sé hægt að tína fjölmarga atburði til á Íslandi sem rétt sé að telja miklu verri en þau eldgos sem hafa orðið á þeim tíma. Til dæmis hvert einasta banaslys.

Nú er spádómsandinn aldeilis að hellast yfir mig: mér hefur verið sýnt að hörmulegir atburðir muni verða í Vestmannaeyjum klukkan 2:13 aðfaranótt sunnudagsins 2. ágúst. Öll ofbeldis-, kynferðis- og fíkniefnabrot sem gerast frá því ég birti þessa bloggfærslu og þar til síðustu gestir Þjóðhátíðar eru farnir með Herjólfi teljast uppfylla spádóminn.

Eygló Harðardóttir, þingmaður Framsóknarflokksins, kvartar yfir því að Gylfi Magnússon sé með greinaskrifum sínum að taka þátt í pólitík.

Ég verð að segja að ég treysti Gylfa langbest af öllum þeim sem fá að sitja þingfundi. Eða ætti ég kannski að segja, á þessum tortryggnitímum, að ég vantreysti honum langminnst?

Ég myndi frekar vilja 63 Gylfa Magnússyni á þing heldur en einn Framsóknarþingmann.

Og ég vil endilega að hann tjái sig sem mest, vegna þess að ég vil hlusta á orð þeirra öðrum fremur sem ég ber nokkuð traust til. Ég myndi hins vegar lítt sýta það ef Framsóknarmenn færu í langt þagnarbindindi.

Ætli það megi ekki orða það þannig að ég vilji pólitíkusa úr pólitík, en fólk eins og Gylfa Magnússon í hana.

Um daginn kom frétt um það að fyrrverandi stjórnendur Landsbankans litu ekki á Björgólf Thor sem tengdan aðila þegar þeir tóku ákvörðun um að bankinn skyldi lána fyrirtæki hans 43 milljarða króna.

Daginn eftir jarðskjálftann sem ekki varð tók Harmageddon á Xinu viðtal við sjáandann góða. Það er óhætt að segja að þeir hafi hrist upp í henni. Þeir byrjuðu á að tala um jarðskjálftaspádóminn og sneru sér svo að jarðskjálftahúsafyrirtæki hennar:

Xið: En ég er meira spenntur fyrir heimasíðunni icelandearthquakehouse.123.is. Er það ekki fyrirtæki sem þú og maðurinn þinn eruð með?
Sjáandi: Það er þar sem maðurinn minn er já — með mér sko.
X977: Og þið eruð að selja sumarbústaði sem eru jarðskjálftahús eins og þið kallið það?
Sjáandi: Já, það er það. Það kemur ekkert þessu við sko.
X977: Nei, það er alveg ótengt?
Sjáandi: Ha já elskan mín góða! Hvað, af hverju halda það allir?

Já af hverju skyldi fólk halda það? Það er bara næstum því jafn fáránlegt og að Björgólfur Thor hafi tengst Landsbankanum!

Eins og Upton Sinclair sagði: Það er erfitt að fá mann til að skilja hlut sem launin hans velta á að hann skilji ekki.

Viti menn! Jarðskjálftinn mikli varð ekki klukkan 23:15 í gær. Ekki heldur klukkan 23:16. Ekki heldur klukkan 23:17. Ekki heldur klukkan 23:18. Ekki heldur klukkan 23:19. Ekki heldur klukkan 23:20. Ekki heldur klukkan 23:21. Ekki heldur klukkan 23:22. Ekki heldur klukkan 23:23…

Merkilegt nokk hefur enginn stór jarðskjálfti orðið enn þegar meira en 700 mínútur eru liðnar.

En í Fréttablaðinu í dag sá ég svolítið áhugavert. Þar var bent á að ef sjáandanum er flett upp á ja.is þá má þar finna hlekk (að vísu pínulítið rangan) á heimasíðu þar sem boðið er upp á jarðskjálftaheld sumarhús. Húsin eiga víst að þola jarðskjálfta sem er tólf stig á Richter kvarðanum. Slíkur jarðskjálfti hefur aldrei verið mældur, en talið er að tólf stig svari um það bil til orkulosunarinnar sem varð við loftsteinaáreksturinn á Yucatan skaganum fyrir 65 milljónum ára, en hann skildi eftir sig einn stærsta loftsteinagíg á jörðinni. Spurning hvort sumarhúsin séu varin fyrir kílómetraháu flóðbylgjunni sem mun hafa fylgt árekstrinum. Útitex dugar ekki alveg til.

Ég ætla ekki að halda því fram að sjáandinn sé meðvitað að ýta undir áhuga á slíkum sumarhúsum með spám sínum. Það má vera að það sé bara mögnuð tilviljun hvað hún hefur annars vegar mikinn hag af því að áhyggjur fólks af jarðskjálftum aukist og hins vegar hvað hún ýtir undir áhyggjur fólks að tilefnislausu að því er virðist.

En sumum kann að finnast slík tilviljun álíka líkleg og að spárnar hennar rætist.

Vegna stórfréttarinnar um sjáandann sem spáði fyrir um jarðskjálfta klukkan 23:15 í kvöld, þá hefur töluvert af áhyggjufullu fólki haft samband við yfirvöld. Deildarstjóri almannavarnadeildar ríkislögreglustjóra hafði þetta um málið að segja:

„Það hefur alla tíð mikið verið haft samband við Almannavarnir með svona spádóma en við eigum erfitt með að tengja þá við atburði sem orðið hafa. Það er allavega ekki mjög algengt“

Þetta var hóflega til orða tekið. Ég á ekki von á öðru en að yfirvöld gefi jafn varfærnar yfirlýsingar um minn spádóm:

Mér hefur verið sýnt að á nákvæmlega sama tíma og téður jarðskjálfti skellur á mun geimskip lenda á Austurvelli, leggja €1000.000.000.000.000 í ómerktum seðlum fyrir framan Alþingishúsið, ásamt yfirlýsingu um að ASB (Alheimssambandið) muni ætíð standa vörð um hagsmuni Íslands án nokkurrar fullveldisskerðingar. Á leiðinni í burtu (með útrásarvíkinga meðferðis til vísindarannsókna) mun geimskipið koma sjö olíuborpöllum haganlega fyrir innan íslenskrar efnahagslögsögu og úr þeim munu spýtast ógrynni af einstaklega umhverfisvænni olíu um ókomnar aldir.

Ég er ekki bara sjáandi heldur líka heyrandi svo það er ekki minna að marka minn spádóm, sem er þar að auki miklu jákvæðari (nema fyrir útrásarvíkinga).

Daginn eftir að þingmenn Sjálfstæðisflokksins lýstu í litríku myndmáli samúð sinni með þingmönnum VG fyrir það harðræði sem þeir væru beittir þá berast fréttir af því úr Valhöll að Þorgerður Katrín hafi fengið allnokkur vandarhögg fyrir það agabrot að sitja hjá í stað þess að hafna þingsályktunartillögu sem hún er efnislega sammála.

Ætli hún hefði verið grýtt ef hún hefði lagt í að fylgja sannfæringu sinni?

Það er áhugavert að Rússar skuli samþykkja lánveitingu í sama mund og Alþingi samþykkir aðildarumsókn að Evrópusambandinu, og eftir að hafa skoðað sig um á Drekasvæðinu.

Ég er óskaplega miklu hrifnari af því að við höllum okkur upp að Evrópusambandinu en Rússum.

Jæja, þá liggur niðurstaða um aðildarumsóknina fyrir. Af sextán þingmönnum Sjálfstæðisflokksins studdi einn þingmaður aðildarumsókn, einn þingmaður sat hjá en fjórtán voru andvígir. Það voru sumsé 6.25% þingmanna sem studdu aðildarumsókn.

Hversu vel ætli þingflokkur Sjálfstæðisflokksins endurspegli vilja almennra flokksmanna? Mig grunar að tífalt meira en 6.25% flokksmanna styðji aðildarumsókn. Sennilega er hlutfallið meðal kjósenda flokksins í síðustu alþingiskosningum jafnhátt eða hærra. Ást þingmannanna á lýðræði og virðing þeirra fyrir vilja þjóðarinnar hljómar þess vegna svolítið fölsk.

Sjálfstæðisflokkurinn missti traust mitt í október 2008. Hann endurvann það sannarlega ekki í styrkjahneykslinu. Hann endurvann það ekki í dag. Og ég sé ekki fram á að hann endurvinni það í fyrirsjáanlegri framtíð.