Það er enginn afgangur af stéttaskiptingunni á þjóðarleikvangi Íslands, Laugardalsvelli. Þar hefur aðallinn lengi vel dreypt á Guðaveigum og dýrindis mat á meðan grútskítugur almúginn hefur greitt fyrir volgt kók og vondar pylsur. Þetta hefur allt verið gert í skjóli KSÍ. Þeir sem hafa reynt að smygla sömu Guðaveigum inn á völlinn hafa ítrekað lent í vörðum vallarins sem gera veigarnar upptækar. Ekkert áfengi nema fyrir aðalinn.

Tvískinnungurinn er ótrúlegur. Þess utan er ekkert áfengisleyfi, að því ég veit best, á Laugardalsvelli og menn því væntanlega að fremja lögbrot. Yfirvöld hafa kosið að loka augunum fyrir þessum skrípaleik sem hefur verið í gangi í áraraðir í Laugardal.

Skal svo sem ekki undra þar sem pólitíkusar eru í stórum hluta þess liðs sem situr í VIP-stúku KSÍ á landsleikjum og dreypir væntanlega á Guðaveigunum í leikhléi og fyrir leik. Gerir það eflaust líka næstkomandi laugardag þegar landsleikur fer fram á vellinum.

Ástandið fer versnandi. Nú er það ekki bara KSÍ sem blæs til veislu. Með tilkomu nýju stúkunnar, sem skartar glæsilegri VIP-stúku, hafa félögin - Valur og Fram í þessu tilviki - notað hvert tækifæri til þess að gera sér glaðan dag á leikdegi og þá er ávallt boðið upp á áfengi.

Á því var engin breyting í gær þegar Fram tók á móti FH. Þá voru heilu kassarnir af bjór klárir í VIPPINU. Myndin sem fylgir færslunni er af hluta bjórsins sem var í boði á leiknum. Þarna eru að lágmarki átta kassar af bjór.

Eins og þetta sé ekki nógu blaut tuska í andlit almúgans þá má hann einnig gera sér að góðu að horfa upp á VIP-liðið reykja úr sér lungun í leikhléi á meðan þeir fá ekki einu sinni að fara út í eigin bíl til að reykja. Þetta ástand hefur verið upp á teningnum í síðustu tveim leikjum og getur fjöldi áhorfenda vottað um það.

Þarf ekki einhver að svara fyrir þessa mismunum?

Ömurlegt gengi KR-liðsins í Landsbankadeildinni fer ekkert sérstaklega mikið í taugarnar á stuðningsmönnum annarra liða sem fagna hverju marki andstæðinga KR.

Slakur leikur KR-liðsins hefur einnig verið á milli tannanna á fólki og sumir gengið svo langt að líkja honum við leik Kidderminster Harriers.

Írekaðar langar sendingar leikmanna KR fram völlinn urðu til þess að einhver sá sig knúinn til þess að hanna nýtt lógó fyrir KR.

Það barst síðuhaldara í hendur og hann sýnir auðmýkt með því að birta það hér.

Hinn geðþekki blaðamaður Fréttablaðsins, Hjalti Þór Hreinsson, brá sér í ljósmyndarabúninginn í kvöld og myndaði stemninguna hjá blaðamönnum í Laugardalnum. Sjón er sögu ríkari.

Bóasinn mætti í miklu stuði og steig léttan dans við stuðlagið “Stöngin inn”.

Góð símaskrá er í blaðamannaherberginu en athygli vekur að fjölmiðlafulltrúar Fram og Vals virðast vera of frægir til að gefa upp númerið sitt fyrir blaðamenn.

Þétt setinn bekkurinn. Frá vinstri: Skúli MBL, síðuhaldari, Tom fótbolti.net og DV-mennirnir Elvis og Bóas.

Sauðnaut. Bóasi tókst að sjálfsögðu að sulla niður.

Það mátti vart á milli sjá hvort DV-menn hefðu meiri áhuga á leiknum eða bakkelsinu. Vel átu þeir, svo mikið er víst. “Djöfull átu þeir”.

Ef ekki að éta þá að rokka.

Mikill sómi að bakkelsinu.

Furðulegasta skýrsla ársins. Vantaði byrjunarliðsmann.

Blaðamenn mættu sitja hærra í stúkunni eða hreinlega lækka borðin.

Fjölmiðlafulltrúinn lék á alls oddi í VIPPINU. Ölið skammt undan.

Það var nóg að éta og drekka fyrir VIP-liðið.

Hemmi Hreiðars lét sjá sig á vellinum.

Óli Kristjáns fylgdist með leiknum í laumi. Honum tókst þó ekki að forðast linsur hins stóra fjölmiðils, blogg.visir.is/henry.

“Kaffið kemur svo á eftir,” var það síðasta sem heyrðist frá dýnamískum fjölmiðlafulltrúa Framara, Snorra Má Skúlasyni, á síðasta heimaleik Safamýrarliðsins. Kaffið kom aldrei og ekki sást frekar til fjölmiðlafulltrúans.

Það var víða pottur brotinn hjá Frömurum síðast og því ríkti nokkur spenna fyrir kvöldinu. Var búið að laga eitthvað?

Laugardalsvöllurinn er martröð fyrir fjölmiðla sem þurfa að hafa snarar hendur eftir leiki enda langt niður á völl og aftur upp í blaðamannastúku. Þarf meira að segja að taka lyftu.

Hún stoppar við VIP-svæðið og það fyrsta sem blasti við þar var fullt borð af Löwenbrau bjór. Allt að verða klárt fyrir fína fólkið sem einhverra hluta má drekka á vellinum þó svo ekkert sé áfengisleyfið.

Í blaðamannastúkunni beið ekkert. Engin skýrsla, ekkert kaffi, lélegt net og grútskítugir gluggar. Snorri Már datt inn með sýnishorn af skýrslum þegar leikurinn var byrjaður. Erum að tala um örfáar skýrslur og svo vantaði mann á skýrsluna hjá FH. Mjög furðulegt. Einhver pappírsfátækt greinilega í Dalnum.

Snorri slúttaði svo á setningunni frægu: “Kaffið kemur svo á eftir.” Stúkan titraði af hlátri svo hátt hlógu blaðamennirnir.

Þeir hlógu ekki mikið þegar Snorri birtist mjög óvænt 11 mínútum síðar með kaffikönnu og glös. Það tók sem sagt 101 leikmínútu að fá kaffi hjá Frömurum. Kaffið var gott. Snorri kvaddi síðan með þeim orðum að það gæti verið von á meiru. Hann laug engu um það því tíu mínútum síðar birtist hann með fullan bakka af ljúffengu bakkelsi. Mikil framför hér á ferðinni.

Þó má gera betur eins og í auðveldum hlutum á borð við skýrslur og svo þarf netið að komast upp því sambandið er mjög óstöðugt þarna uppi sem er ekki gott. Jói vallarstjóri mætti síðan ná sér í tusku og rúlla aðeins yfir gluggana sem eru ógeðslegir.

Stemningin á vellinum var ágæt og það ber aðallega að þakka Mafíunni sem var í banastuði. Lítið heyrðist í rækjusamlokuáhorfenum Fram sem náðu tvisvar að öskra hið frumlega “Framarar, Framarar…”. Entist í bæði skiptin í um 15 sekúndur.

Fram-FH:
Umgjörð: 3 stjörnur af 5 mögulegum.
Aðstaða: 2 1/2 stjarna af 5 mögulegum.

Leikur Blika og Vals er með leiðinlegri leikjum síðari ára og rennur öllum sem hann sáu vonandi fljótt úr minni. Blikar stóðu þó vaktina í umgjörðinni ágætlega þó gætt hafi á örlitlu kæruleysi.

Blaðamaður fótbolta.net var mættur manna fyrstur á völlinn og eflaust feginn að vera laus við Samma ef eitthvað er að marka orð hans við færslu um síðasta leik. Í stað Samma var mættur Hallgrímur Indriðason sem komst lítið að þar sem allt var væntanlega að verða vitlaust vestur í bæ.

DJ Muggz talaði um mannaskítssól í Kópavogi í eftirminnilegum pistli og ég þreytist ekki á að ítreka að sólin sést aðeins í Kópavogi meðan á leik stendur. Á því var engin breyting í gær, sólin skein beint í grímuna á blaðamönnum allan leikinn. Alveg magnað.

Blaðamaður Moggans, Seth, lá óvígur eftir síðasta leik með mígreni og var óvinnufær daginn eftir. Svo halda menn að blaðamennskan sé eitthvað grín.

Skýrslur komu því miður áfram á tveim blöðum en fjölmiðlafulltrúinn lofaði bót og betrun eftir vinsamlega ábendingu undirritaðs. Hann var mættur með tvær djúskönnur í hitann, tvær kaffikönnur en klikkaði eitthvað þar sem þeir voru báðar með vatni en ekkert var kaffið. Hann sást ekki aftur þannig að ekki reyndist unnt að bjarga kaffinu. Það var miður.

Kruðeríið var samt hefðbundið og vel þegið, þá sérstaklega af Gussa Jalla, blaðamanni DV, sem skartaði stórkostlegum Dior gleraugum í sólinni sem vöktu mikla lukku. Myndin segir meira en mörg orð.

Eitthvað var búið að ræða við hina illa uppöldu krakka sem Muggz minntist á því hurðin fékk að vera í fríi í þetta skiptið. Gummi Hilmars hefði líklega hrist krakkana til ef þeir hefðu ætlað að æra hann annan leikinn í röð og lái honum hver sem vill.

Netið svínvirkaðiu, rúðurnar voru hreinar og umgjörðin fín þó svo skólahljómsveit Kópavogs sé að minnsta kosti þrem áratugum of sein á völlinn.

Breiðablik-Valur:
Umgjörð: 3 stjörnur af 5 mögulegum.
Aðstaða: 3 stjörnur af 5 mögulegum.

Ég fór á afmælisleik Fylkis í Árbænum í gær þar sem heimamenn tóku á móti ÍA. Fylkir fagnaði 40 ára afmæli félagsins um daginn og leikurinn þar að auki í beinni á Sýn. Umgjörðin var því með ágætasta móti, slatti af áhorfendum og fyrirtaksstemmning. Leikurinn var líka skemmtilegur fyrir áhorfendur, fullt af mörkum, rautt spjald og vítadrama í lokin. Fylkismenn eru þó örugglega ekki sáttir við að hafa misst af gullnu tækifæri að ná öllum stigunum en þeir geta prísað sig sæla að ekki fór verr yfirhöfuð.

Ónefnd hljómsveit spilaði einhver lög fyrir leik og var þar að auki ókeypis á völlinn. Nýstofnaður stuðningsmannaklúbbur reyndi sitt besta til að skapa góða stemmningu og sótti greinilega í smiðju Miðjunnar í KR. Ekkert að því enda Miðjan að gera gríðarlega góða hluti. Stuðningsmenn ÍA voru einnig fjölmennir og hressir þar að auki. Það hefði samt verið gaman að fá meira en tvö þúsund manns á völlinn fyrst tilefnið var svona gott.

Blaðamannaaðstaðan var eins og í fyrsta heimaleiknum til fyrirmyndar. Skýrslur komnar tímalega, netið í lagi, boðið upp á kaffi og meðlæti og gluggar voru hreinir. Svo var fjölmiðlafulltrúinn á staðnum til að hafa yfirumsjón með þessu öllusaman. Þá má einnig nefna að sólargluggatjöldin á blaðamannakofanum er gríðarlega skemmtileg viðbót og kemur sér afar vel á sólríkum dögum.

Það eina sem mætti setja út á aðstöðuna er að áhorfendatölur voru ekki gefnar upp í blaðamannaskýlinu áður en leiknum lauk. Þær voru hins vegar lesnar upp í hátalarakerfinu eftir leik og reddaðist það þannig.

Fylkir - ÍA:
Umgjörð: 4 stjörnur af 5 mögulegum.
Aðstaða: 4½ stjarna af 5 mögulegum.

Eiríkur Stefán Ásgeirsson