Hið óumflýjanlega gerðist í gær. Teitur Þórðarson var rekinn. Stjórn KR Sports gat einfaldlega ekkert annað gert enda árangurinn, spilamennskan, framfarirnar og síðan kröfur þjálfarans til liðsins langt fyrir neðan væntingar. Það sem verra var þá versnaði liðið undir stjórn Teits og skotgrafarhernaður þjálfarans er ekki eitthvað sem hægt er að byggja ofan á.

Tímasetningin er umdeild eins og alltaf í slíkum málum. Ég tel að Teitur hefði átt að fjúka eftir HK-leikinn. Ég sagði reyndar hér áður að ef KR Sport ætlaði í þessa aðgerð yrði stjórnin að hafa annan þjálfara kláran á hliðarlínunni sem hún treysti. Það er aldrei gott að reka bara til að reka.

Svo virðist vera sem sá maður hafi ekki verið til staðar fyrr en nú. Síðuhaldari hefur heimildir fyrir því að leitað hafi verið til Loga áður en hann stefndi alls ekki í þjálfun aftur enda hefur hann það gott hjá knattspyrnuakademíunni og Sýn. Það þurfti því klárlega talsverða peninga til að lokka Loga í Vesturbæinn. KR virðist fyrst í gær hafa verið tilbúið að greiða nógu mikið til að fá hann í Vesturbæinn.

Það var einnig mjög dýrt fyrir KR að reka Teit. Samningur hans var ekki uppsegjanlegur fyrr en eftir þrjú ár samkvæmt heimildum. Teitur fékk því klárlega fínan starfslokasamning enda ekki á neinum lúsarlaunum í Vesturbænum. Þar var Teitur í fullu starfi við að þjálfa meistaraflokk og móta framtíð knattspyrnunnar hjá KR meðal annars með stofnum knattspyrnuakademíu.

Teitur hafnaði freistandi tilboðum erlendis til að taka við KR og það segir sitt um samninginn sem hann fékk frá KR. Þessi aðgerð KR-inga kostar því klárlega ansi margar milljónir og síðuhaldari hefur heyrt tölur á borð við 15-20 milljónir króna sem er líklega ekki fjarri lagi.

Það verður ekki tekið af KR sport að það var mjög metnaðarfullt skref hjá þeim að ráða Teit á sínum tíma. Með því var verið að horfa til framtíðar með meistaraflokk sem og alls starfs hjá félaginu. Hugmyndin var góð en árangur og spilamennska meistaraflokksins var svo átakanlega léleg að ekki var lengur við unað. Það varð að skipta um mann í brúnni. Teitur fékk alla þá aðstöðu og leikmenn til að byggja upp gott lið en honum mistókst verkið því miður.

Teitur Þórðarson er einstakt ljúfmenni og mikill heiðursmaður. Það er meiri klassi yfir honum en flestum öðrum íslenskum þjálfurum, sama í hvaða grein það er. Það var aðdáunarvert að fylgjast með honum í viðtölum í gær. Það hefðu ekki allir menn í hans stöðu gefið kost á viðtölum og síðan verið jafn hreinir og beinir í sínum málflutningi og hann var. Þvert á móti gefa fæstir þjálfarar kost á viðtölum í slíkri stöðu og eru eðlilega oft reiðir og fúlir.

Teitur höndlaði gærdaginn af sömu fagmennsku og hann hefur höndlað aðra hluti síðan hann tók við KR. Hann sagði ef þetta væri það besta fyrir KR þá væri hann sáttur. Það er mikill klassi yfir Teiti Þórðarsyni en því miður ekki sami klassi yfir spilamennsku KR undir hans stjórn.

Lúðvík S. Georgsson hefur verið settur varaformaður KSÍ til bráðabirgða vegna veikinda Halldórs B. Jónssonar. Sú staða er þar með komin upp að tvö æðstu embætti knattspyrnuhreyfingarinnar eru skipuð KR-ingum þar sem Geir Þorsteinsson, formaður sambandsins, er harður KR-ingur líkt og Lúðvík.

Það sem meira er þá eru Geir og Lúðvík góðir félagar og samstarfsmenn til fjölda ára, fyrst hjá KR og síðan hjá Knattspyrnusambandinu.

Meðfylgjandi mynd er liðsmynd KR frá árinu 1992 en þar standa þeir félagar hlið við hlið. Geir var þá framkvæmdastjóri knattspyrnudeildar og Lúðvík formaður ef mig misminnir ekki. Annars er leikmannahópurinn stórskemmtilegur og má skoða myndina stóra með því að smella á hana. Mæli með því.

Svo má ekki gleyma því að gjaldkeri knattspyrnusambandsins, Guðrún Inga Sívertsen, er einnig KR-ingur sem og Sigurður Ragnar Eyjólfsson, fræðslustjóri og landsliðsliðsþjálfari. Klara Bjartmarz skrifstofustjóri ku líka vera KR-ingur en hún stóð meðal annars á milli stanganna hjá KR á sínum tíma.

Þess utan er aðalstyrktaraðili íslenskrar knattspyrnu, Björgólfur Guðmundsson, einnig glerharður KR-ingur en hann er klárlega einn áhrifaríkasti einstaklingurinn í íslensku knattspyrnulífi.

Það er oft talað um KSÍ-klíku en spurning hvort núna verði talað um KR-klíku?

Vesturbæjarstórveldið hefur náð völdum á knattspyrnuhreyfingunni. Röndóttir KR-ingar hafa komið sér vel fyrir í bestu stólunum og njóta stuðnings KR-ings með sína helstu söluvöru sem er Landsbankadeildin.

Spurning hversu vel það mælist fyrir hjá öðrum félögum?

Það er einnig áhugavert að Valur á ekki menn í neinum alvöru lykilstöðum þó svo síðasti formaður sambandsins, Eggert Magnússon, hafi verið Valsari.

Alltaf jafn ljúft að vera í sveitinni. Erum búinn að vera með fullt hús af góðum gestum og lítið annað gert en að leika sér, éta og hafa það gott. Opnaði loksins á golfið í dag er ég spilaði 9 holur í Úthlíð með systkinum mínum.

Talsvert langt síðan ég fór síðast og spilamennskan var eftir því. Ekki góð. Taldi reyndar ekki höggin en yrði út næstu viku að telja það saman ef ég hefði skráð höggin. Dapur hringur.

Innkomi dagsins sem átti kona á miðjum aldri sem hellti sér yfir holl sem var aðeins fyrir framan hana. Hún las þeim pistilinn með slíkum látum að mennirnir í hollinu áttu engin svör. Stórkostleg uppákoma. Gaman að svona golfdólgum.

Stefni á að gera betur á morgun en þá spilum við Eiki Geira væntanlega hinn skemmtilega völl á Geysi. Sá völlur kom mér talsvert á óvart þegar ég spilaði hann síðasta sumar.

Annars er ég hress. Er að taka lokahringinn á Íslandsmótinu í golfi á Sýn. Þvílík rigning. Engin rigning enn í sveitinni. Held með Hlyni Hjartarsyni aka Strípukálið sem er gamall félagi úr boltanum. Mamma hans er toppkona sem gaf Einari Gunnari Sigurðssyni fríar strípur þegar hann spilaði með Selfossi á sínum tíma. Sterkur fróðleiksmoli.

Eins gott að Strípan standi sig í dag en hann hefur oft verið á meðal efstu manna en síðan chokað undir lokin.

Íþróttafréttamenn eru með böggum hildar í dag eftir að þeim varð ljóst að þeir eru afgangsstærð hjá KSÍ. Knattspyrnusambandið bauð til hátíðarkvöldverðar í gær og íþróttafréttamenn fengu boð í dinnerinn einum 26 stundum áður en borðhald hófst og var ætlast til þess að menn gæfu umsvifalaust svar um hvort þeir kæmust.

Seth vinur minn vill meina að ég eigi sök á því að KSÍ býður íþróttafréttamönnum ekki lengur frítt í glas. Ef það er satt þá býð ég kollega mína afsökunar. Alltaf leiðinlegt að koma í veg fyrir að menn komist í gott partý. Seth, býð þér upp á bjór hið fyrsta.

Seth er reyndar líka á því að boðið hafi komið svona seint þar sem stór sponsor hafi ekki getað fyllt öll sætin sín og KSÍ hafi þar með ákveðið að bjóða íþróttafréttamönnum. Það lítur nefnilega betur út þegar sem flest sæti eru fyllt.

Íþróttafréttamenn hefðu þar með fengið sama eftirsótta verkefni og fólkið sem fyllir í sætin á Óskarnum þegar stjörnurnar fara á klósettið. Ekki amalegt það.

Líkt og Seth sá ég boðið allt of seint og náði því ekki einu sinni að láta vita að ég kæmist ekki.

Sorglegt að fylgjast með síðu Gaddans síðustu daga. Þrá hans í vinsældir á Moggablogginu er orðin svo mikil að hann hefur fallið í þann fúla forarpytt að linka á allar fréttir og skrifa eina til tvær línur. Það skilar ávallt fleiri heimsóknum á Moggablogginu enda eru linkar bloggaranna áberandi við hlið fréttarinnar. Sorglegt að fylgjast með bloggurum sem “lifa” á þessari taktík.

Þetta heitir að taka einn Stebbafr á þetta en það er til marks um úrkynjun Moggabloggsins að sá maður var vinsælasti Moggabloggarinn um tíma. Hann linkar á allar fréttir og endurritar síðan það sem stendur í fréttinni. Segir í raun ekki neitt um neitt en þykist hafa skoðun á öllu. Alveg ótrúlegur bloggari. Klárlega innihaldslausasti og leiðinlegasti bloggari landsins.

Skilst að hann hafi gert sér lítið fyrir og básúnað á síðu sinni fyrstur allra að Einar Oddur væri látinn. Af andlátinu vissi ákveðinn hópur manna og fjölmiðlar sem birtu ekki neinar fréttir af andlátinu strax af virðingu við ættingja Einars sem ekki vissu af andláti hans.

Stebbifr gaf skít í þessa hegðun fjölmiðlanna og hugsaði sig greinilega ekki tvisvar um áður en hann bloggaði um málið. Veit til þess að einhverjir aðilar gagnrýndu Stefán fyrir þessa hegðun á kommentakerfinu hans en hann fleygði því öllu út. Smekklegt.

Garðar vinur minn er að feta í spor þessa bloggara sem er miður því hann var einhver alskemmtilegasti bloggari landsins. Hvet hann til að láta af þessum leiðindum og halda sig við gömlu, góðu, hressandi færslurnar. Þetta er ekki hann. Come on, maður.

Við fjölskyldan erum enn á vergangi þar sem við sjáum ekki fram á að geta flutt inn í nýtt húsnæði fyrr en um miðjan ágúst. Meiriháttar skemmtilegt.

Munum búa á þrem stöðum fram að þeim tíma. Erum að yfirgefa áfangastað númer eitt til þess að fara í sumarbústað í sveitinni. Þegar þeim tíma lýkur flytjum við á þriðja staðinn og svo loks á áfangastað… vonandi.

Verður snilld að komast í sveitina og ekki skemmir fyrir að Eiki Geira og family verða í næsta nágrenni. Við Eiki eigum eftir að dusta rykið af kylfunum og grillinu næstu vikuna.

Eins gott að veðrið verði í lagi.

Að gefnu tilefni vill síðuhaldara taka fram að íþróttadeild Fréttablaðsins er að leita að starfskrafti í fullt starf.

Ég hvet alla þá sem telja sig eiga erindi í stétt íþróttafréttamanna að sækja um en umsóknarfrestur rennur út 31. júlí.

Umsóknir sendist á vinnumailið mitt: henry@frettabladid.is

Túníska dagblaðið La Presse er eitt af mínum uppáhaldsblöðum. Í ekki minna uppáhaldi hjá mér er einvaldur landsins, Ben Ali. Hann er stórkostlegur. Ívar Ben, kollegi minn og félagi, er reyndar mun meiri aðdáandi Alis en áhugi Ívars á þjóðhöfðingjanum á sér enga hliðstæðu. Sómi að því.

Túnis á að heita sjálfstætt ríki, og fagnar einmitt 50 ára sjálfstæðisafmæli í dag, en það dylst engum sem þar kemur að aðeins einn maður ræður í landinu og það er Ben Ali.

Hann ræður einnig yfir fjölmiðlunum og hann nýtir þá óspart sér til framdráttar með jákvæðum fréttum af sjálfum sér. Stórblaðið La Presse er líklega helsta áróðursrit meistarans og birtir daglega fréttir af afrekum þjóðhöfðingjans skemmtilega.

Ekki bara fréttir heldur líka myndir en myndir af Ali birtast daglega og það fleiri en ein og fleiri en tvær.

Oft hafa verið birtar margar myndir af Ali með sömu fréttinni en La Presse sló sennilega heimsmet í dag er það birti 43 myndir af kappanum með sömu fréttinni. Það sem meira er þá eru allar myndirnar eins. Stórkostleg blaðamennska.

Sjón er sögu ríkari.

Skellti mér á leik Blika og KR í kvöld. Sá reyndar aðeins síðari hálfleikinn. Það er erfitt að segja það en mikið djöfulli er leiðinlegt að horfa á KR-liðið spila. Spilamennska liðsins er einfaldlega ekki boðleg og ég veit ekki hvaða braut Teitur er með liðið á. Að mínu mati er hann fjarri því að vera á réttri braut og staðan er ekki boðleg.

Teitur sagði eftir leikinn í kvöld að það væri ágætt að liðið hefði farið eftir því sem lagt var upp með - sem var að berjast og sækja hratt. Standardinn er kominn þetta neðarlega hjá KR-liðinu. Það er ekki ætlast til meir af liðinu en þetta. Úfff.

Menn hafa tínt til ýmsar skýringar á gengi KR og óþarfi að tíunda þær upp aftur. Ein af ástæðunum að mínu mati er sú að þjálfarinn er einfaldlega að veðja á of marga ranga hesta í liðið. Það eru of margir leikmenn í liðinu sem eru því miður ekki nógu góðir eða hreinlega ekki klárir í slaginn.

Byrjum á vörninni. Þar hafa verið bakvarðavandræði frá upphafi sumars. Eggert og Mummi eru aftur á móti að finna sig ágætlega þar í síðustu leikjum þó þeir séu brothættir á stundum. Eggert hefur hrifið mig en ég hef mínar efasemdir um Mumma og hvort hann sé framtíðarmaður hjá KR.

Gunnlaugur Jónsson hefur að mínu mati verið frábær í sumar og á köflum verið að vinna að lágmarki tveggja manna vinnu. Hann hefur æði oft þurft að hreinsa upp ruslið eftir félaga sína í sumar og oft minnt meira á ruslakarl en knattspyrnumann. Frábær frammistaða.

Við hlið Gunnlaugs í nánast allt sumar hefur verið Pétur Marteinsson. Hann hefur því miður verið átakanlega lélegur. Miðað við væntingar þá er Pétur líklega mestu vonbrigði sumarsins. Mitt mat er að hann hafi verið mesti dragbíturinn á KR-liðinu. Pétur hefur verið 2-3 skrefum á eftir andstæðingunum í allt sumar og á þar að auki sök á of mörgum mörkum sem hafa kostað liðið stig. Tryggð Teits við Pétur hefur verið aðdáunaverð en þar hefur Teitur veðjað á rangan hest og tapað stórt. Varnarleikur KR hefur verið mikið mun betri í þeim leikjum sem Pétur er fjarverandi.

Miðjuspilið hefur einnig verið í molum þó svo margir menn hafi reynt sig þar. Bjarnólfur byrjaði ekki vel, meiddist síðan en var ekki í byrjunarliðsklassa þegar hann datt út. Teitur hefur haldið tryggð við Kristin Magnússon sem hefur ekki skilað miklu. Kristinn er kominn með talsverða reynslu en tekur litlum framförum. Hann er ekki nógu góður fyrir KR að mínu mati.

Að setja enn óreyndari mann við hliðina á honum er ekki að virka. Ásgeir Örn er efnilegur en  myndi virka betur með betri mann við hliðina sér. Kristinn er því miður ekki að ná sér á strik sem er miður því Kiddi er duglegur og leggur sig alltaf allan fram. Þeir tveir eru að tapa flestum orrustum á miðjunni og voru í eltingarleik í allt kvöld.

Svo er það Rúnar Kristinsson. Hann líður að mörgu leyti fyrir leiðinlegan leikstíl KR-liðsins. Engu að síður mætti hann vera aggressívari og spila framar á vellinum. Það hefur sýnt sig að KR-liðið hefur dottið í gírinn þegar Rúnar er framarlega og lætur til sín taka, lætur boltann ganga hratt og notar ekki of margar snertingar á boltann sem hann gerir því miður of oft.

Sóknarleikurinn er síðan kapitúli út af fyrir sig. Teitur notaði tvo af minni framherjum liðsins lengi vel og dældi háum boltum á þá. Glórulaust. Grétar Ólafur er maður að mínu skapi, hleypur endalaust og er alltaf að reyna að spila fótbolta. Hann hefur því miður fengið allt of lítið af boltanum í fæturna í sumar.

Kantararnir Skúli Jón og Simmi hafa fengið mikið að spila og það virðist engu máli skipta hvað þeir eiga lélegan leik. Þeir eru nánast alltaf í liðinu. Simmi hefur átt of fáa góða spretti og flestir leikirnir hafa verið slakir af hans hálfu. Skúli Jón er reynslulítill, ekki tilbúinn og einfaldlega ekki nógu góður í slaginn eins og staðan er í dag. Fínt að gefa honum tækifæri en það er fátt sem réttlætir að hann sé fastamaður líkt og Sigmundur, Kristinn og Pétur til að mynda.

Það er óskiljanlegt af hverju maður eins og Óskar Örn fær ekki að spila meira en hann hefur verið mjög líflegur í flest þau skipti sem hann hefur fengið tækifæri en það eru ekki margar mínútur sem hann hefur fengið.

Sama með Jóhann Þórhallsson og að ég tali nú ekki um Atla Jóhannsson sem var furðu fljótur að fara í frystinn en ég beið mjög spenntur eftir að sjá hann í sumar. Fróðir menn tjáðu mér að hann hefði litið mjög vel út í undirbúningum og miðað við það var búist við honum í lykilstöðu. Einhverra hluta vegna missti Teitur fljótt trúna á honum.

Til hvers var Teitur að fá alla þessa menn til félagsins? Mig grunar að bekkurinn hjá KR í kvöld hafi verið sá dýrasti í sögu íslenskrar knattspyrnu.

Málið er að stóru leyti það að mínu mati að Teitur teflir fram of mörgum mönnum sem annað hvort eru ekki nógu góðir eða tilbúnir. Ég skil vel að Teitur sé að að reyna að finna  sitt ellefu manna lið og af hverju hann fækkar breytingum á byrjunarliðinu og ég er stuðningsmaður þess að félög noti sem mest af uppöldum leikmönnum en blandan verður að vera rétt. Það þýðir ekki að henda of mörgum óreyndum leikmönnum í djúpu laugina á sama tíma og ég tala nú ekki um að halda tryggð við menn sem skila ekki því sem til þeirra er ætlast.

Teiti hefur mistekist að finna réttu blönduna og rétta liðið. Hann veðjar á of marga ranga hesta að mínu mati á meðan öflugir gæðingar bíða á hliðarlínunni. Hann ber ábyrgð á gengi liðsins og spilamennsku. Eins og segir hér að ofan þá er hann að mínu mati á rangri braut með liðið og hann mun á endanum gjalda fyrir það með starfi sínu.

Þessi staða, spilamennska og væntingar þjálfarans til liðsins eru ekki boðlegar stórveldi á borð við KR sem hefur yfir gríðarlega öflugan leikmannahóp og að ég tali nú ekki um stuðningsmenn. Það er ætlast til meira af liðinu og þjálfaranum en þetta.

Við hjónin skelltum okkur í bíó áðan. Það er eitt sem fer hrikalega í taugarnar á mér þegar ég fer í bíó. Það er hvernig kvikmyndahúsin þröngva upp á mann auglýsingum með blekkingum. Ég var ekki að greiða morðfé til að horfa á auglýsingar heldur kvikmynd.

Það stendur skýrum stöfum hvenær kvikmynd hefst. Segjum að mynd eigi að hefjast klukkan 20 eins og í kvöld. Þar af leiðandi mætir maður í tíma til að ná ágætum sætum. Þegar klukkan slær 20 þá dofna ljósin og auglýsingaflóðið hellist yfir mann. Í kjölfarið koma síðan kynningar á næstu myndum eða auglýsingar fyrir bíóið.

Myndin sjálf hefst síðan ekki fyrr en klukkan 20.15 sem er ekki sá tími sem auglýstur var. Svo mikið er víst.

Þetta er óþolandi. Ég er að kaupa ákveðna vöru sem mér er að tjáð að hefjist klukkan 20. Ef ég vil sjá auglýsingar eða sýnishorn úr öðrum myndum þá ætti ég að geta mætt fyrir 20 til að sjá það.

Ég greiddi ekki 900 krónur til að horfa á auglýsingar klukkan 20 þegar varan sem ég var að kaupa á að byrja. Af hverju eru neytendasamtökin ekki að skipta sér af þessu?

Er að íhuga meiðyrðamál enda hef ég orðið fyrir andlegu áfalli vegna svikanna. Vill einhver góður lögfræðingur taka málið að sér?