Ævintýrið í Baunalandi

Vá hvað maður er ekkert að standa sig hér. Veit ekki af hverju, ekki er svo brjálað að gera hjá mér í skólanum. Kannski bara almenn leti? Er það ekki alltaf þannig að maður er rokna duglegur þegar mikið er að gera og öfugt? Alla vega í mínu tilfelli.

En ok, nú er vika í heimsóknina til Íslands og skipulegið komið á fullt, svona í huganum. Hvað á að taka með og svona. Verður gaman að hitta ykkur, langar bara ekkert í þetta krepputal ykkar. En það er önnur saga.

Nú erum við búin að búa hér í Álaborg í nærri 2 mánuði og farin að venjast þessu lífi, kynnast umhverfinu og fólkinu í kringum okkur. Eða ekki beint kynnast fólkinu, meira svona taka eftir því. Hér er nefnilega margvíslegt fólk og mjög fyndið að spá í það. Verð að útskýra aðeins hvernig þetta er hérna. Sko, við erum á fyrstu hæð í blokk með svalir til tveggja átta. Það eru fjórar blokkir í okkar „garði“ sem snúa saman utanum smá leikvöll og innganginn inn í blokkirnar. Þetti gerir það að verkum að maður sér hvern og einn einasta nágranna út á sínum svölum eða á leið um garðinn. Við Hanni höfum gert aðeins í því að sitja á svölunum, reykja, fdrekka kaffið okkar og spá í fólkið sem ber fyrir augum. Reynum auðvitað að láta eins og við séum bara að njóta veðursins, sem b.t.w. hefur verið ljómandi gott fram til þessa, bara svona hjón á svölunum sínum að fá sér kaffisopa (stundum rauðvín, ok). Makalaust hvað margir Grundfirðingar eiga tvífara akkúrat hérna á þessum bletti get ég sagt ykkur. Hér býr s.s. Ása í Koti, Siggi pé eftir grenningu og fleira fólk sem ég man ekki nöfnin á í augnablikinu. Makalaust alveg hreint! En svo erum við auðvitað umvafin vandrörum (innfluttum dönum) frá Grænlandi, Sómalíu, Pakistan og öllum þeim löndum í stórum bunum. Húsaleigan er með því ódýrara hér svo það er meira svona fólk hér. Ætla nú ekki að láta þetta hljóma sem rasista eitthvað, en svona er þetta bara að þessu fólki fylgir ýmislegt og ekki endilega jákvætt allt saman. Grænlendingarir hér í næsta stigagangi finnst t.d. áfengi sérstaklega góður mjöður, meira en svona okkur hinum. Því fylgir sóðaskapur og hávaði sem maður reynir bara að láta fram hjá sér fara ef það abbast ekki upp á okkur sem það hefur næstum ekkert gert. Þurftum reyndar að kvarta yfir ruslapokunum þeirra á svölunum sem voru farnir að bera ólykt yfir til okkar. Því var kippt í liðinn. Svo höfum við fundið fyrir að maður er ekkert að láta dótið sitt liggja á svölunum ef maður vill sjá það meir. Var stolið af okkur hálfum kassa af tómum bjórflöskum, skil nú ekki að nenna svona löguðu en sumum vantar bara pening hvað svo sem upphæðin er stór. En alla vega passar maður upp á sitt dót hér. Svona er þetta bara og greinilegt að við erum ekki lengur í smábæ. En það er meira jákvætt hér en neikvætt. Við höfum t.d. aldrei fengið eins marga í heimsókn á eins stuttum tímaog síðan við fluttum hingað, skólamálin eru í fínu standi hjá okkur öllum, strákarnir eru 4 mín í sinn skóla á hjóli, ég er 1 mín og Hanni þarf auðvitað að fara á skúternum en er samt alltaf komin heimum fjögur leytið sem er ekkert smá plús miðað við að skeinast heim um fimm eða jafnvel hálf sex á verstu dögunum. Svo er hér frábært útivistarsvæði í uppbyggingu bara rétt við húshornið með göngustígum, BMX braut, risa hjólabrettabraut (Grundó mætti nú skoða það og skammast sín svolítið fyrir þennan aumingja ramp sem þeir voru svo montnir af að setja upp á sínum tíma) Hanni er svo stoltur af því að eiga einn bekk í þessum garði sem hann ásamt fleirum tók þátt í að hanna og steypa í fyrra og var settur þarna. Fórum að skoða hann í gær, mjög flott!

Annars er það að frétta af öðrum Grunmdfirðingum hér í Ála að Imba átti sitt 6. barn á föstudagskvöldið, stúlku sem fær nafnið Sunneva. Myndarstúlku sem við fjölskyldan fórum að skoða áðan. Heilsast öllum vel og mikil gleði í gangi með þetta allt saman. Kata var hérna í heimsókn á föstudaginn, héldum henni í gislíngu fram eftir kvöldi, drógum hana í storcenter, tróðum í hana mat og neyddum svo til að glápa á Vild með dans með okkur áður en hún fékk fararleyfi heim aftur. Nei, auðvitað vorum við ekkert að neyða Kötu litlu í þetta. Áttum barasta góðan dag hérna saman og hún fékk að reyna tilraunaeldamennsku okkar hjóna sem heppnaðist gríðar vel að þessu sinni.  Ótrúlegasta samsetning fæðutegunda sem einhvern veginn passaði bara svona skemmtilega saman. Pangasius fiskur í sítrónu með osta og rasphjúpi í ofni, hvítlaukskartöflustappa, soðinn ferskur aspas, spænskt tómat, rauðlauks og mosarellasalat og veltisteikt grænmeti með peru og sultuðum kínverksum engifer. Ótrulegt en satt að þetta samansull var alveg ferlega gott og ekki spillti að þetta var svona samsuðu eldamennska sem allir viðstaddir tóku þátt í af miklum móð. Yfir Vild med dans var svo smakkað á brendum möndlum sem eru algjört hitt hér hjá fjölskyldunni, svo mikið að nú er bara leytað að svona potti til að brenna möndlur í í gríð og erg.

Annars var ég að byrja á Facebook (ok, ég er lengi að taka við mér) og skemmti mér þetta ljómandi við að hitta og uppgötva hinn og þennan þarna inni, gerast vinir og svona. Verð örugglega meira þar inni en hér næstu vikurnar svo þaðer um að gera þeir sem ekki eru búnir að koma sér upp Facebook að skella sér í það hið snarasta og finna mig svo.

Jæja, ég er búin að vera að skrifa þetta með hléum í allan dag. Fórum s.s. að skoða nýja baby hennar Imbu niður í bæ, tókum góðan göngutúr um miðbæinn í leiðinni fyrst við vorum komin þangað á annað borð og nú er Hanni algjörlega búinn á því og grjót sofnaður inn í rúmi. Heyri hroturnar hingað inn, úbbs! hann hrýtur jú víst ekki að eigin sögn. Það er bara hávaða rok hérna og frekar kalt í dag. Hanni spurði mig, þegar ég var að kvarta yfir rokinu niður í bæ áðan, hvort ég vissi ekki að það væri stormur í DK núna?  da! HVAD? Neibb, þetta er sko ekki stormur, þetta er rok. Hér hefur ekki komið alemnnilegur stormur síðan ég flutti, en hver veit kannski kemur hann síðar í dag. Þetta er alla vega fyrstu merki haustsins hér núna að mér finnst. Búið að vera frekar milt og gott veður fram að þessu og ég bara verið á sumarjakkanum en núna þarf að fara ða grafa upp hvert trefillinn lenti ég er líka að fara til Íslands eftir 6 daga svo það er eins gott að vera komin með vetrarfötin á tært.

Læt þetta nægja í bili, enda orðið mun lengra en í upphafi var ætlað.

Þangað til næst

Hrafnhildur Jóna

Bara láta vita af okkur. Höfum það fínt. Erum eitthvað þreytt þessa dagana hjónin, erfitt að byrja svona í skólanum eftir langt „frí“. Frídagur á morgun reyndar, eða svona íþróttadagur skólans og þar með frí hjá okkur antisportistunum. Jónas á að spila Stomp í Karolínulundi á morgun svo við ætlum að kíkja þangað að sjá strákinn. Stomp er svona spilað á tunnur og svoleiðis svo þetta verður vonandi flott hjá krökkunum. Rúnar verður á ferðalagi allan daginn í vandratur svo það er byrjað að vera doltið mikil dagskrá hjá okkur. Skráði Jónas í  trommukennslu og svo ætlar hann að skella sér í Karate tvisvar í viku í vetur. Rúnar er ekkert búin að finna hvað hann vill gera en það kemur sjálfsagt. Ég fer að byrja í 5 vikna glerbræðslunámskeiði svo nú á bara að taka á því í vetur.

Biðjum að heilsa bara

Þangað til næst

Hrafnhildur Jóna

Nú er allt að koma á réttan kjöl hér hjá okkur í Baunalandinu, búið að mála allt hátt og lágt, laga og gera fínt. Þetta er farið að líkjast heimili, meira að segja heimilinu okkar. Íbúðin er nú reyndar ekki með miklu skápaplássi og þar sem húsfrúin hefur alla tíð verið dugleg að sanka að sér heimilistækjum og öðru smádóti var farið í leiðangur að redda skápum og skúffum. Imba hafði sagt Hanna frá vefsíðu með notað og nýtt, síðan sem hann fann skúterinn góða á. Gul og gratis var því bara sörfuð hátt og lágt og kennir þar ýmissa grasa. Við erum s.s. búin að fjárfesta í hillusamstæðu fyrir 200 kall (3300 isk) sem gegnir nú hlutverki skenks, nánast nýrri kommóðu úr Ikea á 500, loftljósi sem enn var í pakkanum á 100 kall og gömlum eldhússtólum heilum 5 stk á 200. Nú er s.s. í gangi að lakka og yfirdekkja stólana og svo auðvitað stofuborðið góða sem við fengum á loppemarkaði fyrir 35 kallinn. Annars hefur verið rigningarsuddi síðustu daga svo það hefur ekki vel viðrað til að lakka. En þetta kemur allt saman. Hér eru engin ljós eða slíkt þegar maður flytur inn svo það þurfti auðvitað að redda nokkrum ljósum svo við rötuðum hér um íbúðina. Fundum ljósin í herbergin á útsölu í Dan-bo sex stykki á minna en eitt átti að kosta upphaflega. Þegar maður er fátækur námsmaður þýðir sko ekkert annað en að þræða útsölur, Jysk og slíka staði. Höfum bara verið heppin með þessa hluti sem upp á vantaði og nú eigum við bara eftir að finna eitthvað fyrir strákana, svona diskastanda og hillur. Nennum ekki í Ikea sem er í Árhúsum.

Ég byrjaði í skólanum í gær, frekar stutt eða einn og hálfan tíma. Fengum verkefni sem er að hanna logo fyrir Jomfru Ane Teater sem er alvöru leikhús og alvöru viðskiptavinir sem er mjög spennandi. Hittum fólkið sem ræður á morgun og fáum að spyrja þau spjörunum úr. Hanni byrjaði á mánudaginn og fékk líka verkefni strax og er í gang með að teikna hús og svoleiðis. Mikil inspiration og hönnun í gangi á heimilinu þessa dagana, bæði persónulega viða ð koma sér fyrir og svo faglega í skólanunum. Gott að vera komin í gang aftur í þetta venjubundna amstur þótt auðvitað sé gott að fá sumarfrí.

Sit hér og bíð eftir að Imba mæti með bumbuna í heimsókn, held þetta sé lengsta meðganga ever, alla vega einn mánuður eftir enn. Vá hvað ég er EKKI að öfunda hana með eitt krílið enn. Er búinn með þann pakka bara algjörlega. Nóg vesenið með þessa tvo sem við eigum. Bara að koma þeim í skólann getur tekið gríðarlega á. Mikil ró yfir þegar þeir eru loksins farnir og manni gefst smá tími til að taka sjálfan sig til. Annars er ég eins og ég minntist á áðan heima í dag. Held ég skreppi í Jysk (Rúmfatalagerinn) að shoppa eina hillu fyrir Rúnar. Nenni ekki að hafa allt playmoið svona út um öll gólf mikið lengur. Koma order á þetta dótarí.

Verð að fara að hasta mér í föt, Imba var víst búin að hóta snemm heimsókn og betra að taka ekki á móti gestum á náttfötunum.

Þangað til næst.

Hrafnhildur Jóna

Þá er maður loksins fluttur heim. Heim til okkar og ekkert fengið að láni. Það er þó ekki alveg átakalaust. Við Hanni vorum búin að vera með einhverja slæma tilfynningu fyrir þessu með íbúðina en vorum þó með allt klárt á föstudagsmorgun, búin að leigja flutningabíl og fá Úlfar í lið með okkur að bera dót. Vorum svo mætt á tröppurnar eins og okkur var boðið kl. 10:30. Eftirlitsmaðurinn og varmemeistarinn  voru líka mættir en enginn fyrrverrandi leigjandi og þar með komumst við ekki inn. Þurfti að kalla til lásasmið til að komast inn.  Vá og það sem mætti okkur var ekki par glæsilegt. Ógeðsles lykt, allt grútskítugt og hreinlega ónýtur ísskápur auk ýmisslegs annars miður fallegu. Hundaskítur á svölunum t.d. og Hanni minn hreinlega með gubbuna upp í hálsi. Það er þannig hér að fyrrverandi leigjandi á að skila af sér nýmáluðu og hreinskúruðu, en það er því miður ekki alltaf svoleiðis og heppnin í okkur og þessi tilfynning var s.s. staðfest akkúrat þennan morgun um að þetta yrði eitthvað vesen. En við vorum auðvitað bara þarna á tröppunum og áttum hvurgi heima svo það varð bara að gera það besta úr því sem komið var. Leigufélagið hefur 14 daga til að laga húsnæðið og vegna aðstæðna hjá okkur erum við því flutt inn, fengið var hreingerningarfólk, 2 menn í 2 tíma, til að reyna að krafsa í yfirborðið á skítnum og dótið okkar er hér komið í hús. Helgin hefur svo að mestu farið í að sótthreinsa skápa, svalirnar og sitthvað fleira til að við getum minnkað kassafjöldann svo hreingerningar- og málaralið getum athafnað sig hérna þó við séum hér líka. Smá útilega ennþá bara hjá okkur en við erum þó með þak yfir höfuðið, sofum í rúmunum okkar og getum meira að segja horft á handboltann Sit nefnilega hér alein um miðja nótt og horfi á leik Íslands og Egypta sem er ekki alveg að fara nógu vel. Eitthvað slappir í vörninni strákarnir í dag. Fyndið svolítið að horfa á þennan leik með danska þuli sem rembast eins og rjúpan að láta ekki í ljós vonbryggðin með jafnteflið á laugardaginn. Halda þó með okkur og hrósa sóknarmönnunum okkar og segja þá vera eina þá bestu í heiminum. En samt smá öfund svona að skína í gegn og ekki alveg búið að fyrirgefa málið. Komu meira að segja með innskot leikhléinu þar sem þjálfari og fyrirliði danska liðsins voru að afsaka sig eitthvað og kenna örðum um slakt gengi sitt á OL. Æ greyin, jafna sig eitthvað seint á þessu.

Við fengum ansi skemmtilega heimsókn í gærkvöldi. María frænka mín Egilsdóttir mætti hér létt eftir áhorf á landsleikinn. Var stödd hér í Álaborg og kíkti aðeins á okkur og pappakassana. Frábært að sjá hana frænku, takk fyrir kíikkið María, og Jónasi Elís finnst þú kúl frænka og hlakkar til að heimsækja þig sem við verðum nú að fara að láta verða af, ekki hægt annað. Æ, hvaða vesen er þetta með íslenska liðið, ætla þeir ekki hrista af sér slenið og ná yfir egyptana? Ferlega slappur leikur yfir heildina og Guðjón Valur er bara að halda liðini uppi núna. fjand…. hvað hann er nú magnaður strákurinn og auðvitað er ég sammála þulunum sem segja hann einn þann besta í heimi. Sko, þetta eru strákarnir okkar svo mikið núna. Noh!!! í þessum skrifuðum eru þeir búnir að jafna 27 - 27, fer kannski bara að horfa á þennan leik með báðum augunum og hætta þessum skrifum.

En svona til að eyða öllum áhyggjum ykkar þá líður okkur ljómandi vel hérna þrátt fyrir ástandið á íbúðinni, Hanni er búin að koma sér upp nágranna sem hann fær allar upplýsingar hjá, bara bjóða öl og spjalla þá koma þeir eins og flugur til hans. Alveg ótrúlegur eiginleiki að laða að sér nágranna. Skrifa meira um úllaballana og grænlendingana sem búa hér síðar og þegar stuðið er meira.

Þangað til næst.

Hrafnhildur Jóna

Jæja, meira af búsetumálum okkar. Nú erum við að skríða inn í fjórðu nóttina í tjaldlegunni og höfum ekki hlotið nein varanleg sár ennþá. Bara búið að vera rigningarsuddar á okkur inn á milli sólarinnar. Aðra nóttina hellirigndi svoleiðis að meira að segja ég vaknaði við herlegheitin. Ekkert smáræði sem buldi á tjaldinu okkar. Mikið sem þetta er nú ljómandi fínt tjald. Við erum á tveggja stjörnu tjaldsvæði sem þýðir að þjónustan er engin en á móti kemur að verðið er með því lægra sem við höfum séð, sem kemur sér vel fyrir fátæka námsmenn erlendis þessa dagana. Erum auðvitað bara með okkar lagi hér og höfum lagt undir okkur farfuglaheimiliseldhúsið sem er smá spöl frá tjaldinu en hver veit hvar við gistum? Ekki farfuglarnir sem eru að kokka þarna svo mikið er víst. Annars leiðist okkur hrikalega en þó er þetta fljótt að líða. Fórum að skrá strákana í skólann á föstudaginn, glæsilegur skóli og okkur öllum líst rosalega vel á allt þarna. Jónas fer í frítidsklubb eftir skóla og hann fékk leyfi til að mæta strax eftir helgi þótt skólinn sjálfur byrji ekki fyrr en á miðvikudaginn. Vá, sögðum við Hanni þegar við föttuðum að sumarið er langt komið og skólinn bara að fara að byrja. Tíminn æðir bara eitthvað svo áfram að það er ekki við neitt ráðið. En alla vega í fyrramálið brunum við með dreng í skólann að leika sér. Ætlum að tékka hvort Rúnar getur fengið að fara í sinn eftirskóla. Myndi auðvelda þeim lífið að þurfa ekki að hanga hér yfir okkur á tjaldsvæðinu allan daginn. Erum frekar blönk eftir að fjárfest var í tryllitæki handa húsbóndanum fyrir helgi svo það er lítið hægt að vera að gera því allt kostar sama hvað er. Jamm tryllitækið hans Hanna er scooter að einhverri ítalskri gerð. Greyið þarf nefnilega að fara lengst í skólann sinn núna svo það varð að leyfa honum að fá sér svona tæki. Mjög fínt og við fengum það á fínum prís af gömlum karli sem ekkert hafði notað það og vildi bara losna við það. En Hanni er hæst ánægður með þetta hávaðatæki og verður flottastur í vetur það er ég viss um. Hann fann þetta á gul og gratis síðunni og nú er bara legið yfir þeirri síðu og allt skoðað. Búin að finna 50’s spisestóla á 450 kr. 6 stk sem ég ætla að tékka á eftir innflutning ef enn verða á sölunni. alveg ótrúlegt hvað er til sölu þarna og Hanni er bara að missa sig yfir þessu öllu saman

Við alla vegana erum á lífi í tjaldinu, Erum í einhverju basli með netsímann sem ekki vill tengjast hérna þó hann hafi gert það í sulsted áður en við fórum þaðan svo við erum ekki í símafæri. En við erum með fartölvurnar okkar og msn virkar fínt fyrir þá sem eru með okkur á skrá hjá sér og vilja hafa samband.

Nú er ég búin að skrifa nýja færslu þarna karl.

Þangað til næst

Hrafnhildur Jóna

Hið íslenska „þetta reddast“ flyst greinilega með manni þó á erlendri grundu sé. Eins og ég skrifaði í þar síðasta bloggi sáum við fram á 2ja vikna tjaldútilegu fjölskyldunnar og vorum ekkert allt of viss með hvað við ættum að gera við dótið sem ekki væri möguleiki að troða inn í þetta tjald okkar, jafnvel þótt stórt sé. En hvað gerist svo? Eigendur húsinns hér í Sulsted eru ekkert að flýta sér heim, eru núna í heimsókn í Hollandi og verða til 7. águst svo þau buðu okkur að passa húsið sitt þangað til og geyma dótið í bílskúrnum þangað til við fáum íbúðina. Júhú og já takk. Hanni var mikið glaður í gær að þurfa ekki að leggja það á blessað bakið að liggja í tjaldi í 2 vikur. Ekki það að hann hafi bara ætlað ða liggja flatmagandi stanslaust í þessar vikur í tjaldinu. En 8 nætur eru betra en 15 og svo er ekki öll von úti með að fá þessa íbúð eitthvað aðeins fyrr, löggðum um óskir um að komast inn eins fljótt og hægt væri hjá leigufélaginu því við værum gjörsamlega á götunni. Vorum voða aum og ræfilsleg á skrifstofunni og höfðum auðvitað strákana með svona til að auka aumingjaskapinn og höfða til fólksins að við þyrftum auðvitað eitthvað húsnæði. Ekkert heyrt samt ennþá.

Nóg af húsnæðismálum, er á leið í fyrramálið á Loppemarkað í Álaborg aust með Imbu og co. Ætla að líta eftir spisestoler og sofabord ef ég sé eitthvað slíkt á góðum prís. Vantar svollis. Erum að bíða eftir blessaðri rigningunni sem virðist nú eitthvað láta bíða eftir sér. Er spá að mig minni þrumum á morgun með tilheyrandi.

Varð fyrir truflunu við skrifin og þessi færsla hefur tekið eina 2 daga. Nú er s.s. kominn sunnudagur, búið að fara á loppemarkað og fjárfesta í sófaborði fyrir heilar 35 kr. Alveg merkilegt hvað var hægt að kaupa þarna og á nánast ekki neitt. Enda fór fólk heim með heilu sófasettin á bakinu. Skemmtilegt að upplifa alvöru loppemarkað, loksins. Sófaborðið er bara flottí laginu, auðvitað gamalt og þarfnast málunar. Við hjónin erum svona að velta fyrir okkur hvaða lit við eigum að skella á borðið. Ég hafði látið mér detta í hug að ef ég fengi borð myndi ég mála það fallega bleikt, var búin að selja Hanna hugmyndina en svo runnu á mig tvær grímur í gær. Væri það ekki bara svolítið takkí að hafa æpandi bleikt borð í stofunni? Kannski væri það ekkert sérstaklega lekkert svo nú vill mín bara spreyja það glansandi svart og vera eins og allir aðrir.  Bara play it safe! Úff, er ekkert allt of viss með þetta.

Það er byrjað að rigna, eitthvað smá og bara annað slagið. En það voru samt þrumur hér í dag með tilheyrandi 10 mínútna helli, hellidembu. Rosaleg rigning sem fylgir þrumunum. Þetta var auðvitað um miðjan dag svo maður heyrði bara þrumuhljóðin en þau voru ansi nálægt og hávær. Strákunum fannst þetta spennandi og hlupu út í dembuna á naríunum.

Held ég fari nú að skella þessari færslu á bloggið og hætta þessu í bili.

Þangað til næst

Hrafnhildur Jóna

eins og titillinn ber með sér er hafin útflutningur hér í Sulsted og dagar okkar hér í Tvedens alle fara fækkandi. Þetta með nærbuxurnar hefur svo ósköp eðlilega skýringu. Við erum ekkert að flytja út neinar nærbuxur, nema þá okkar eigin. Við erum hreinlega og barasta á nærbuxunum við að flytja okkur héðan út. Jamm klæðlítil erum við þessa dagana og það hefur heldur ekkert með að gera að við erum yfirmáta dugleg að þvo þvottinn og eigum ekki til skiptana. Oneibb, hér er svo gjörsamlega óheyrilega brjálæðislega heitt alla daga að til að þola slíkan gjörninga sem að pakka niður er ekki hægt að vera í einni einustu spjör nema þá nærbuxunum. Hitastigið fer hækkandi með hverjum deginum og heiðskýr himinn svo það er enginn griður fyrir hita og svita. Þess vegna hefur þessi flutningur okkar fengið það nafn að vera nærbuxnaútflutningur. Við erum samt óheyrilega glöð með það að hafa ekki rigningu og geta því þrátt fyrir hitann og auðvitað útaf honum tekið góðar pásur inn á milli pakkanna og fengið okkur ölið góða. höfum líka tekið dagspásur og skroppið í Faarup sommerland og á ströndina fórum við í dag og skildum útflutninginn eftir heima. Sitjum svo núna hjónin á terrassinum og drekkum romm í klaka og Faxi kondi, Hanni smá brunninn á öxlunum, ég á nefinum sem alltaf skagar út. Nota bene, við erum á nærunum og engu öðru. Rúnar Alexander er mikill uppfinningarmaður og fann það fljótlega að pappakassarnir sem eftir er að fylla eru ljómandi góð uppistaða í butik og hefur því sett upp verslun í nánast tómri stofunni. Búinn að raða upp kössum, stilla upp hinum ýmsu vörum sem ekki hafa lent ennþá ofan í kössum og sett gula postit miða á með verðlagi dauðans. Held hann eigi alveg eftir að bjarga sér strákurinn með eitthvað merkilegt í framtíðinni. Pabbi hans skuldar honum nokkuð margar krónur í augnablikinu. Hefur verið drjúgur að selja karlinum varning svo skuldastaðan er ekki góð þessa stundina. Jónas Elís á svo í viðureignum við flugur á klósettinu. Kom hér rétt í þessu með sögu frá einni ferð á dolluna vopnaður flugnaspaða. Hann vildi vera vel undirbúinn að eiga við þessa fjanda sem ráðast ævinlega á hann þegar hann teflir við páfann. Hann þóttist hafa lært af þeirri reynslu að þær sættust að honum með miklum móð í hvert sinn þegar  tafl væri í gangi. Hér er óheyrilega mikið af flugum sem eru að gera okkur öll brjáluð og koma frá hestabúgarðinum hinum megin við limgerðið. En altsvo, Jónas vopnaður fór á klósettið, viti menn engar flugur. Lagði spaðann frá sér og settist og bara um leið voru tugir flugna mættar og allar veittust þær að ræflinum sem aungva björg gat sér veitt. Makalaust! Sko en sagan er ekki öll með þennan spaða. Upp komst um kauða að hann hefði rænt þessum flugnabana úr búð bróður síns sem að sjálfsögðu kærði málið til kviðdóms götunnar (sjálf síns) og þar með var Jónas orðinn fangi, bundinn og leiddur til aftöku útí garði. Þar sem sjálfskipaður böðull var við það að binda fangann gerði fanginn sig lítið fyrir og leisti sig og hljóp útí buskann. Nú er s.s. eltingarleikur bræðra um víðann völl og mikill hamagangur í öskjunni.

Enn svo þið getið aðeins gert ykkur í hugarlund hvernig góðar stundir hafa verið hér hjá okkur þessa helgi sem Grundarfjörður heldur sína hátíð og við í annað sinn erum ekki viðstödd. Þá er það svo að hér er bara heitt, heitt, heitt, eða 26 7 stig og heiskýrt, sófinn okkar ásamt ferðatöskum, ísskáp eigendanna og fleira dóti er hér uppstillt í viðringu á terrasinu. Við rembumst við að koma einhverju af dótinu okkar ofan í kassa, drekkum öl og romm inn á milli (til kælingar auðvitað) og finnum að óþfluga eru enn einar breytingar framundan hjá okkur, breytingar sem við horfum glöð fram á. Vonum að flutningurinn inn í Álaborg verði ánægjulegur, Álaborg er frábær borg með mörgum möguleikum. Bara jákvætt framundan, vonandi.

En auðvitað er það erfitt að missa af bæjarhátíðinnni, bláa hverfinu sem er auðvitað alltaf lang flottast og þeirr skemmtun sem er þessa helgi. Við reynum að fá þetta svolítið í æð með því að hlusta á Útvarp Grundarfjörður á netinu (n.b. gríðalega flott logo sem útvarpið er með í ár ;-)) en við stefnum að því að vera á Íslandi næsta sumar og vera með á góðri stund og á landsmótinu sem verður þá í Grundó.

En nú er mál að linni og vona að allir hafi haft góða helgiþ

Þangað til næst

Hrafnhildur Jóna

Og áfram heldur hið meinta sumarfrí okkar. Strákarnir hangsa, Hanni líka og innanum um karlpeninginn reyni ég að vinna eitthvað af viti. Er erfitt á stundum að vera mjög kreative með sjónvarpið á fullu við hliðina á manni, krakka sem leiðist og eiginmann sem þarf að fá sín athygli lon og don. Er eiginlega bara að gefast upp á ástandinu og ætla með liðið í eina útilegu í viðbót fram á sunnudag. Í þetta sinn er förinni heitið til Silkiborgar sem er í miðju Jótlandi. Þar er víst mjög fallegt og mikið að skoða svo við hyggjum á góða daga. Jafnvel þó það sé rigningarspá. Erum að æfa okkur fyrir 2ja vikna tjalddvöl í ágústmánuði. Þá verðum við hreinlega að búa í tjaldi því við verðum húsnæðislaus í eina 15 daga eða svo. Já fljótt skipast veður í lofti hér í Baunaveldi. Erum nefnilega komin með aðra íbúð sem hentar okkur mun betur en sú sem við vorum komin með. Eiginlega óskaíbúðin því hún er aðeins stærri, í næsta nágrenni við skólann minn,Rúnar getur verið áfram í sama skóla og síðastliðinn vetur, stutt er fyrir Hanna að hjóla í skólann og það sem er allra best er það að við þurfum ekki að borga eins mikið í leigu og við höfum gert. Svo er einn stór plús að þetta er hjá leigufélagið svo við getum fengið indskud lánað hjá Kommúnunni vaxtalaust auk þess sem við þurfum ekki að punga út hálfri milljón til þess eins að komast inn í íbúðina eins og var með hina. Eina slæma við þetta er að íbúðin losnar ekki fyrr en 15. ágúst og við þurfum að fara hér út þann fyrsta svo það er eins gott að það verði sól og sumarylur í byrjun ágústmánaðar hér því við þurfum að brúa bilið í tjaldi einhverstaðar. Reddast auðvitað. Dótið fær að vera í bílskúrnum hér á meðan, eða það vona ég. Vorum bara búin að fá loforð í einn dag en á ekki von á að það verði mikið vandamál.

Alla vega, alltaf eitthvað smotterí að gerast hér. Nú á ég bara eftir að pakka öllu bakkelsinu sem við hjónin bökuðum í gær fyrir útileguna, pakka fötum, gera vikublaðið og 2 veggspjöld, auglýsingu og eitthvað fleira fyrir góðar stundir í Grundarfirði og svo er það Silkiborg með tengdamömmuboxið á toppnum.

Þangað til næst

Hrafnhildur Jóna

Sæl öll sömun, erum á blússandi ferð í sumarfríi hér í Sulsted. Heimsókn sexmenninganna frá Grundar- og Hafnarfjörðunum var sérdeilis skemmtileg og annasöm. Við fórum bara nokk víða þessa fáu daga með þeim Fjalari, Hjördísi, Særós, Ægi, Villu og Kristjönu. Fyrsta daginn í Tívolíið í Álaborg þar sem krakkarnir fengu að fara í öll tækin nokkrum sinnum meðan við fullorðnu röltum um, spjölluðum og drukkum øl (nema Villa að sjálfssögð, hún fékk Pepsi) Svo þurfti að skoða Bilka á mánudeginum svo Storcenter varð fyrir valinu og var hægt að eyða nokkrum dönskum krónum þar og í HogM. Vegna brakandi góðrar veðurspár var ákveðið að fara í Fårup Sommerland á þriðjudeginum og reynt að taka daginn snemma til að ná sem bestri nýtingu, Hanni var driver og fór með liðið í tveim hollum. Allir ferðalangarnir nutu sín vel sýndist mér og áður en farið var heim var búið að fara í Rafting, rólur, vatnalandið og grilla kengúru og svín ofan í alla saman. Veðrið var frábært og allir fengu smá lit. Ekkert annað var svo í stöðunni vegna stig vaxandi hita hér að fara á ströndina síðasta daginn okkar saman. Var það sérlega skemmtilegur dagur og flatmagað, synt og eitthvað drukkið fram eftir deginum og fengu allir sinn skammt af sólbrúnku, roða og hraustleika í kynnum, janfvel þeir sem aldrei fá lit á sólaströndum urðu brúnir og sællegir. Það var svo brottfarardagur á fimmtudeginum og var það erfitt fyrir minsta fjölskyldumeðliminn að sjá á eftir uppáhalds frænku sinni upp í lestina. Það sem eftir var dags mátti hann hafa mikið að gera svo hann yðri ekki sorgmæddur svo hann dundaði sér inn í herbergi viða  snúa þar öllu við. Við hin sváfum að mestu þann daginn, eða réttara vorum í yfirliði vegna hitans því 30 stig hér er nú ansi mikið. Allir hér vilja þakka kærlega fyrir frábæra heimsókn og nú er bara að fara að plana næstu og safna fyrir henni.

Fjölskyldan hér tók svo þá ákvörðun að réttast í stöðunni væri að eyða deginum á ströndinni sl. föstudag því ekki var kaldara þann daginn. Bara meiri bakstur á kroppinn og aflsapp eftir innrásina frá Íslandi. Vegna áframhaldandi góðrar veðurspár var svo ákveðið að fara í okkar allra fyrstu útilegu hér í Baunaveldi. Imba og fjölskylda er búsett á tjladsvæðinu í Hirsthals í sumar því Steffan er að vinna þar og við vorum búin að boða komu okkar einhvern góðrviðrisdaginn sem var svo sl. laugardag. Við ætluðum nú bara að vera eina nótt sem svo breyttist í tvær nætur því veður og félagsskapur, aðstaða og fleira gerði það ekki eftirsóknarvert að fara heim í hitasvækjuna. Vorum svo að koma heim því búið er að spá rigningu eitthvað yfir daginn og við ekki alveg að nenna heim með blautt tjald. Rétt náður heim með allt okkar á þurru þegar fór að helli, helli rigna hér með tilheyrandi þrumum og eldingum. Þvílík læti og vatnsmagnið gríðarlegt á örfáum mínútum. En á korterinu var allt búið og stuttu seinna allt orðið skraufa þurrt því það er rúmlega tuttugu stig úti þó rigni. Nú þarf frúin bara að vinna eitthvað til fimmtudags og svo er bara að pakka niður í bílinn, tjaldi og græi í næstu útilegu eitthvað suður á bóginn því  veðurspá lofar að hér verður illþolanlegt að vera næstu helgi vegna hita. Já sko því með hitanum koma flugurnar frá hestabúgarðinum hérna hinum megin við limgerðið svo ekki er hægt að hafa opið út svo enn eitt atriðið sem bætist á listann að okkur hlakkar til að flytja sem er bara alveg á næsta leyti en við höfum ákveðið að standa ekkert í og eyða ekki öllu sumarfríinu okkar í þann gjörning.

Jæja, þetta er nú orðin langlopka mikil og nóg að sinni að ég held. Við s.s. höfum það eins og blóm í eggi að mestu leyti, njótum danska sumarleyfisins eins og hægt er. Já og við Hanni viljum þakka kærlega fyrir hamingjuóskir og tröllatrúna ykkar á okkur. Það gefur okkur mikið að heyra að við fáum stuðning ykkar.

Þangað til næst

Hrafnhildur Jóna

…og úrvinda skólafólk hér í Sulsted núna. Var í lokaprófinu í morgun, gékk ljómandi vel og fékk hæstu einkunn, 12, sem ég er þvílíkt ánægð með og glöð að ég var ekki dregin niður vegna dönskunnar sem ég var hræddust við. Mikið stress að baki síðustu vikur og nú tekur bara við að liggja í leti út vikuna og gera okkur klár til að taka á móti ættingjum á laugardag. Hér er leiðinda veður búið að vera síðustu daga, rok og rigningaskúrir annað slagið. Svo inn á milli koma þessar þvílíkur dembur að Grundfirðingar gætu orðið stoltir af. Sem betur fer vara þær nú aðeins í 10 til 15 mínútur í senn svo þetta er nú bara hressileg gusa að okkur finnst, en mikið vatn sem niður fellur á örskömmum tíma. Reyndar hressandi að fá bleytu eftir mánaðar þurrk og upp í 30 stig. Bara ef það blési ekki svona mikið, er þreytt á því.

Er orðinn eins og aðrir íslendingar, talandi um veðrið. Héðan er svosum ekkert markverkt heldur. Mikill tími farið síðustu vikur við undirbúning þessara prófa og helgarnar notaðar til afslöppunar. En nú er s.s. sumarfríið að detta inn hjá strákunum líka, bara þessi vika og þá verður takið á því og markt brallað. Ætlum að njóta sumarsins hérna eins og við mögulega getum. Reyni að vera dugleg að skrifa inn þegar eitthvað gerist.

Þangað til næst

Hrafnhildur Jóna