Farinn á Eyjuna 11. febrúar 2009
Fært af Einar Mar Þórðarson undir Stjórnmál. rita ummæliSé að enn leggja fjölmargir leið sína hingað og ég er enn á topplistanum en ég er farinn að blogga á eyjan.is
http://blog.eyjan.is/einarmar/
Sjáumst þar!
Hér er kúla og allir sáttir! 18. desember 2008
Fært af Einar Mar Þórðarson undir Stjórnmál. 15 ummæliFékk tilkynningu frá Glitni áðan að ég gæti fengið kærleikskúlu í jólagjöf frá bankanum ef drattaðist í næsta útibú og myndi sækja hana. Nú hef ég oft fengið leiðinda tilkynningar frá Glitni (gula miða o.fl.) en hef sjaldan orðið eins fúll yfir bankabréfi.
Hvernig dirfist aðili eins og Glitnir sem er búinn að snúa mínu lífi og allra annarra viðskiptavina sinna á haus í einum vetfangi að senda út kærleiksboðskap. Bankinn heldur greinilega að viðskiptavinir hans séu fífl. Hér er kúla og allir sáttir.
Ég ætla að sækja kúluna og senda hana upp í viðskiptaráðuneyti með spurningu um hvort að þetta hafi verið gert með vitund og vilja þess. Hvet aðra til að gera það sama.
YFIRLÝSING VARÐANDI FRAMBOÐ TIL FORMANNS FRAMSÓKNARFLOKKSINS
Fært af Einar Mar Þórðarson undir Stjórnmál. 1 ummæli fram að þessuGunnar Bragi Sveinsson hefur sent frá sér yfirlýsingu þar hann gerir grein fyrir því af hverju hann sækist ekki eftir því að verða formaður Framsóknarflokksins. Í ljósi þess að enginn hefur komið að máli við mig um framboð í embættið tel þörf á því að gera hreint fyrir mínum dyrum.
Án þess að hafa nokkuð velt því fyrir mér hef ég ákveðið að gefa ekki kost á mér sem formaður Framsóknarflokksins.
Gunnar gefur upp tvær ástæður fyrir vanframboði sínu: aðgengi að ræðistól Alþingis og ferðakostnað.
Ég held reyndar að aðgengi að stólnum sé ofmetið en get tekið undir það að reglulegar ferðir á Klörubar eru ekki fyrir venjulegt launafólk.
Ég gef bara upp eina ástæðu: Í ljósi starfsmannaveltu síðustu missera held ég að þetta sé bara grautfúlt djobb.
Ég skora svo á aðra landsmenn að taka sem fyrst af alla vafa um framboð sitt til formennsku í Framsóknarflokknum.
P.s. í sparnaðarskyni (vegna kreppunnar) vil ég einnig taka fram að ég tel ekki líklegt á þessari stundu að ég bjóði mig fram sem formann Sjálfstæðisflokksins og alls ekki sem gjaldkera húsfélagsins
Útrýmum kynbundnum launamun - nú er lag
Fært af Einar Mar Þórðarson undir Stjórnmál. rita ummæliÞessi pistill eftir mig birtist á jafnretti.is um daginn:
Á dögunum var kynnt rannsókn sem sýnir að leiðréttur kynbundin launamunur á Íslandi er 19,5%. Þ.e. að teknu tilliti til vinnutíma, starfs, menntunar, aldurs, atvinnugeira, ábyrgðar í starfi og þess hvort fólk er sjálfstætt starfandi eða launþegar eru karlar að jafnaði með 19,5% hærri heildarlaun en konur. Rannsóknin var unnin af Félagsvísindastofnun Háskóla Íslands fyrir Félags- og tryggingamálaráðuneytið.
Þetta er í fyrsta skiptið sem gerð er rannsókn sem nær til alls vinnumarkaðarins og því er illmögulegt að að bera hana saman við aðrar rannsóknir á kynbundnum launamun sem hafa verið einskorðaðar við ákveðin stéttarfélög, fyrirtæki eða stofnanir. En þess ber þó að geta að þessi rannsókn sýnir mjög svipaðar niðurstöður og slíkar rannsóknir á kynbundnum launamun (sbr. kannanir VR, SFR o.fl.).
Þar sem rannsóknin náði yfir allan vinnumarkaðinn var hægt að bera saman kynbundinn launamun í einkageira og opinbera geiranum og á höfuðborgarsvæðinu og landsbyggðinni. Kynbundinn launamunur er 22,4% í einkageiranum en í opinbera geiranum mældist kynbundinn launamunur aðeins meðal starfsmanna með framhaldsskólamenntun (28,4%). Ástandið er því skárra í opinbera geiranum en betur má ef duga skal.
Mest sláandi í þessari rannsókn er kynbundinn launamunur á landsbyggðinni, en karlar eru með 38% hærri heildarlaun en konur þegar tekið hefur verið tillit til þeirra þátta sem taldir voru upp hér að ofan. Munurinn á höfuðborgarsvæðinu er 10,3%. Þessi munur á landsbyggðinni er í raun skelfilegur og ég minnist þess ekki að hafa séð svo háa tölu áður í þessu samhengi.
Er kreppan ógn eða tækifæri?
Reynsla annarra ríkja kennir okkur að í kreppu er mikil hætta á að kynbundinn launamunur aukist þ.e. konur eru líklegri til að hverfa af vinnumarkaði og þær sem eftir eru taka á sig meiri kjaraskerðingu en karlar. Leiða má líkur að því að skýra megi gríðarlegan launamun á landsbyggðinni með þessu. Enda má segja að góðæri síðustu ára hafi ekki náð til landsbyggðarinnar nema að litlu leiti og stór hluti hennar hefur í
raun búið við kreppu undanfarna áratugi.
Kynbundinn launamunur er mikið mein á íslensku samfélagi og nú þegar að kreppan skellur á með fullum þunga verða aðilar vinnumarkaðarins ásamt stjórnvöldum að gera allt sem í þeirra valdi stendur (og meira) til að kynbundinn launamunur aukist ekki.
En hverri ógn fylgja tækifæri! Nú þegar að fyrirtæki og stofnanir eru að draga saman seglin þurfa mörg þeirra að lækka laun starfsmanna sinna. Ýmis fyrirtæki hafa notað tröppugang í lækka laun, þ.e. hinir hæst launuðu lækka mest en þeir sem hafa lægst hafa launin lækka minna eða ekkert. Þessi aðferð kemur örugglega til með að minnka kynbundinn launamun e-ð þar sem konur hafa lægri laun en karlar. Samt er ástæða til þess að hvetja stjórnendur fyrirtækja sem þurfa að grípa til þessara aðgerða að hafa kynbundinn launamun sérstaklega í huga og skoða hvort ekki sé ástæða til þess að lækka konur minna en karla þannig að kynbundni launamunurinn minnki enn frekar.
Ég hvet alla stjórnendur til að taka mið af þessu en tel þetta vera skyldu þeirra sem nú eru skyndilega orðnir stjórnendur hjá ríki. Ríkisstjórnin ætti að fylgja því mjög fast eftir að launmun kynjanna verði eytt í nýju ríkisbönkunum og öðrum fyrirtækjum sem kunna að komast í ríkiseigu (vegna skulda við bankana). Nú hafa stjórnendur fyrirtækja og stjórnvöld kjörið tækifæri til að minnka verulega og jafnvel eyða kynbundnum launamun á íslenskum vinnumarkaði. Ríkisstjórnin setti fram metnaðarfull markmið um launamun kynjanna í stjórnarsáttmálanum. Nú hefur hún verkfæri til að ná þessum markmiðum. Þrátt fyrir að það séu ekki óska aðstæður sem skapa þetta verkfæri ber ríkisstjórninni skylda að nota það.
Líklega finnst mörgum þetta róttækar og jafnvel óréttlátar hugmyndir að ekki skuli látið eitt yfir alla ganga. En það hefur ekki verið hingað til. Nú er talað um að við þurfum að standa saman og byggja upp nýtt Ísland sem verður til lengri tíma litið betra og réttlátara samfélag en „hið gamla“. Slíku markmiði verður ekki náð nema með fullu jafnrétti kynjanna og þar eru laun engin undantekning.
Skýrsluna má nálgast hér.
Fjölmiðlar éta vitleysuna upp eftir hver öðrum! 22. nóvember 2008
Fært af Einar Mar Þórðarson undir Stjórnmál. rita ummæliMeð brotthvarfi Bjarna og Guðna úr þingflokki Framsóknar eru konur komnar í meirihluta í þingflokknum og kona formaður sem eru ánægjuleg tíðindi fyrir áhugafólk um aukin hlut kvenna í stjórnmálum. Ég held að Fréttablaðið hafi fyrst talað um um konur hefðu ekki verið í meirihluta í blönduðum þingflokki áður og síðan hafa margir fjölmiðlar og bloggarar étið það upp. Ekki þarf að leggjast í miklar rannsóknir til að sjá þetta er ekki rétt. Eftir kosningarnar 1999 voru fleiri konur í þingflokki Samfylkingarinnar en karlar eða 9 konur í 17 manna þingflokki. Mér finnst skrýtið að Samfylkingarfólk hafi ekki leiðrétt þennan misskilning. Annað hvort eru allir í flokknum búnir að gleyma þessu eða það sem er líklegra að leiðrétting myndi vekja athygli á slökum hlut kvenna í núverandi þingflokki.
Hlutfall kvenna í þingflokkum eftir Alþingiskosningar 1999, 2003 og 2007.
Evrópusinnar yfirgefa Sjálfstæðisflokkinn 21. nóvember 2008
Fært af Einar Mar Þórðarson undir Stjórnmál. 2 ummæliÉg er að glugga í skoðanakönnun sem Capacent gerði fyrir Samtök iðnaðarins er það kemur fram að 52% þjóðarinnar er fylgjandi inngöngu í Evrópusambandið, 27% andvíg og 21% tekur ekki afstöðu. Það sem er athyglisvert við þessa könnun er að meirihluti þeirra sem ætla að kjósa Sjálfstæðisflokkinn er andvígur aðild að sambandinu. Í sambærilegri könnun sem gerð var fyrir ári Var helmingur þeirra sem sögðust ætla að kjósa flokkinn hlynntur aðild, 33% á móti en 17% óákveðnir.
Stuðningur við ESB eftir því hvað fólk ætlar að kjósa
Þrátt fyrir að fylgi flokka sé ekki tilgreint í skýrslunni frá Capacent má reikna það nokkurn veginn út og eins og sjá má myndinni hér að neðan mælist Sjálfstæðisflokkurinn aðeins með 23% í þessari könnun. Ég held að það megi draga þá ályktun að Evrópusinnar séu að yfirgefa flokkinn í stórum stíl. Þessi könnun er reyndar gerð áður en tilkynnt var um Evrópunefnd flokksins og spurning hvort einhverjir snúi til baka ef flokkurinn breytir afstöðu sinni til sambandsins.
Stuðningur við flokka samkvæmt könnuninni
Ísland tilraunastofa í hagfræði? 29. október 2008
Fært af Einar Mar Þórðarson undir Stjórnmál. 2 ummæliSamkvæmt könnun sem Stöð 2 birti í gær virðist vantraustið á Seðlabankann algjört og hún er samt gerð áður en vaxtahækkun gærdagsins var tilkynnt. Eins og ég sagði í pistli í gær bendir svona hringlanda háttur ekki til þess að menn viti hvað þeir eru að gera. Tala nú ekki um þegar að gengið var fest en horfið frá því eftir sólahring. Fólk fær það á tilfinninguna að hagkerfið sé að verða tilraunastofa í hagfræði: En ef við prófum að … ?
Traust til Davíðs og Seðlabankans mælist á svipuðum slóðum og traust borgarstjórnar eftir alla ringulreiðina þar.
Spurning hvort Lóa Pind ætti ekki að skora á Davíð að þau myndu hætta bæði. Reyndar yrði eftirsjá af Lóu.
Mæli annars með leiðara Þorsteins Pálssonar í Fréttablaðinu í dag þar sem hann segir m.a. „Seðlabankinn á eftir eðli sínu að vera fjármálaleg kjölfesta efnahagslífsins. Hann minnir nú meir á korktappa.“
Alþingi ræðir það sem brennur á þjóðinni
Fært af Einar Mar Þórðarson undir Stjórnmál. 2 ummæli“Sakaði Guðna um að sitja í kjöltu seðlabankastjóra”
“Vilja að listaverkasafn bankanna verði í eigu þjóðarinnar”
Má ég vera reiður af því að ég á ekki flatskjá? 28. október 2008
Fært af Einar Mar Þórðarson undir Stjórnmál. 3 ummæliFlatskjáir eru orðnir merki um óhóf íslensku þjóðarinnar og gera okkur öll samsek í sukkinu sem setti þjóðina í þrot. Þið getið sjálfum ykkur um kennt af því að þið keyptuð flatskjá. Þar sem ég á ekki flatskjá ætla ég að leyfa mér að vera reiður.
En þar sem flatskjár virðist ver orðinn sjálfstæð hagstærð í íslensku samfélagi er ágætt að hafa í huga:
Rekstrarkostnaður FL-group var 6 milljarðar árið 2007 og fyrir það hefði mátt kaupa flatskjá handa öllum fjölskyldum í þremur stærstu sveitarfélögum landsins (gerum ráð fyrir að meðal flatskjár kosti 150 þús.)
Vilhjálmur Bjarnason áætlar að kaupaukar stjórnenda fjármálafyrirtækja hafi numið 80 milljörðum á síðustu árum og fyrir það má kaupa tvo flatskjái fyrir hvern þann íslending sem hefur vit til að nota slíkt.
Með þessar tölur í huga mega flatskjár eigendur líka vera reiðir.
Fólk veit bara ekki hvert það á að beina reiði sinni þegar að leikar standa hæst í ekki benda á mig leiknum. Mótmæli undafarna daga hafa ekki verið burðug og merkilegt til þess að hugsa að þegar að olíuverð fór í hæstu hæðir ríkti hálfgert uppreisnar ástand í þjóðfélaginu en ekki nú.
Spurning hvað gerist núna þegar að Seðlabankinn hefur hækkað stýrivexti upp í 18%. Ekki kann ég að meta hvort það var nauðsynlegt en ég held að þeir kunni það heldur ekki í bankanum. Lækkuð vexti í síðustu viku og hækka aftur núna. Ef eitthvað traust hefur verið eftir á vinnubrögðum Seðlabankans er það örugglega fyrir bí nú. Spurning hvort Alþjóðagjaldeyrissjóðurinn ætti ekki að taka yfir stjórn bankans enda virðist hann hvort sem er hafa ráðið þessari vaxtahækkun.
Kröftug mótmæli eru ágætt tæki til sýna óánægju og fá stundarútrás fyrir réttláta reiði en þau virðast sjaldnast hreyfa mikið við ráðamönnun á Íslandi. Þess vegna vegna tel ég að þjóðin eigi að fá að kjósa eftir nokkra mánuði þegar að um hægist. Það er alveg ljóst að þeir sem eiga eftir að hafa mest að segja um uppbyggingu landsins á næstu árum verða að njóta til þess traust og hafa til þess umboð. Þegar að gengið var til kosninga á síðasta ári blasti við allt annar veruleiki og ljóst þau málefni og kosningaloforð sem þá voru gefin eiga fæst við í dag. Stjórnmálaflokkar (gamlir og nýir) þurfa að leggja fram skýra stefnu um framtíðarsýn í nýjum veruleika og sækja sér umboð til kjósenda til að koma henni í framkvæmd.
Þegar ljóst er hvert skal stefna getum við sett reiðina aftur fyrir okkur og tekið kúrs í átt að sameiginlegu markmiðum.
Að segja hlutinna eins og þeir eru 8. október 2008
Fært af Einar Mar Þórðarson undir Stjórnmál. rita ummæliÉg sé það í CNN að bandarískir kjósendur eru sammála mínu mati að Obama hafi haft betur í kappræður kvöldsins.
Eftir bölmóð undanfarna daga var bara hressandi að hlusta á annarra þjóða vandamál. Við Íslendingar glímum við tímabundna gjaldeyriskreppu en grunnstoðir samfélagins eru í lagi. Þrátt fyrir að Bandaríkin eigi dollara og lánstraust er verulegur fúi í þeirra grunnstoðum. Eins og einn af mínum uppáhalds þáttastjórnendum í Bandaríkjunum, Bill Maher orðaði það (nokkurn veginn eftir minni):
Með 700 milljarða dollara „bailout“ frá Washington erum við orðin sósíalískt ríki. En af hverju er sósíalismi þvílíkt bannorð í Bandaríkjunum að við fáum eingöngu neikvæðar hliðar sósíalisma? Svíþjóð er sósíalískt ríki en þar er þó boðið upp á fría heilbrigðisþjónustu, allir fá fría menntun og ríkið þvær jafnvel þvottinn þinn (sagt í háði).
Ég skal reynda finna rétta kvótið á morgun.
Annars fannst mér Davíð Oddsson góður í Kastljósinu í kvöld. Hvað sem fólki kann að finnast um Davíð held ég að hann hafi loksins útskýrt fyrir þjóðinni á mannamála hvað er í raun að gerast.
Stjórnmálafræðingur hjá 